អ្នកឧកញ៉ា គួច ម៉េងលី ណែនាំឱ្យមនុស្សរៀនឱ្យច្រើន នាំឱ្យពួកគេចេះពិចារណា និងវិភាគបានត្រឹមត្រូវ

អ្នកឧកញ៉ា គួច ម៉េងលី អគ្គនាយកប្រតិបត្តិនៃក្រុមហ៊ុន ម៉េងលី ជេ. គួច អេឌ្យូខេសិន បានលើកឡើងថា ការគិតស៊ីជម្រៅ និងជំនាញវិភាគ គឺជាជំនាញដែលមិនអាចកាត់ថ្លៃបាន។ ទាំងនេះ សុទ្ធតែបានមកពីការរៀនសូត្រ។ នេះបើតាមការបង្ហោះនៅលើទំព័រហ្វេសប៊ុករបស់លោកនៅថ្ងៃទី២២ ខែឧសភានេះ។

តាមការសង្កេត ក្នុងសង្គមបច្ចុប្បន្ននេះ មនុស្សមួយចំនួនតូច ហាក់បាត់បង់ ឬ មិនមានទម្លាប់ក្នុងការអានសៀវភៅ ឬ រៀនសូត្រ និងអនុវត្តដោយខ្លួនឯងឱ្យបានច្រើនឡើយ។ កត្តាទាំងអស់នេះ ក៏អាចបណ្តាលឱ្យពួកគេ មិនសូវមានការគិតវែងឆ្ងាយ ខ្វះការពិចារណា និងវិភាគបានត្រឹមត្រូវ ព្រោះពួកគេមិនបានអានសៀវភៅ ឬ រៀនសូត្រអ្វីមួយដោយខ្លួនឯងបានច្រើន នាំឱ្យខ្វះបទពិសោធ។ មួយវិញទៀត មនុស្សមួយចំនួន តែងតែសំអាងលើទ្រព្យសម្បត្តិរបស់ម្តាយឳពុក ដែលមានស្រាប់ ដូច្នេះ ពួកគេមិនសូវខិតខំសង្វាតរៀនសូត្រឡើយ គឺតែងតែដើរផ្លូវកាត់ក្នុងការធ្វើកិច្ចការអ្វីមួយ។

ត្រង់ចំណុចនេះ អ្នកឧកញ៉ា គួច ម៉េងលី បានលើកឡើងថា៖ “ការគិតស៊ីជម្រៅ និងជំនាញក្នុងការវិភាគ គឺជាជំនាញដែលមិនអាចកាត់ថ្លៃបាន។ ជំនាញនេះ បានមកពីការរៀន អាន និងអនុវត្ត។ ដូច្នេះ សូមកុំដើរផ្លូវកាត់”។

ពិតណាស់ ការគិតស៊ីជម្រៅ និងការវិភាគ គឺជាជំនាញមួយដែលមនុស្សគ្រប់រូបគួរតែមាន និងមិនអាចខ្វះបាននៅក្នុងជីវិតរបស់ខ្លួន។ ទោះអ្នកធ្វើអ្វី ប្រកបការងារណាមួយ នៅពេលដែលអ្នកមានជំនាញទាំងនេះ នឹងធ្វើឱ្យអ្នកមានការគិត និងវិភាគមួយដែលត្រឹមត្រូវ មិនលំអៀង និងប្រកបដោយសច្ចភាព និងគុណធម៌នៅក្នុងខ្លួន។ ការគិតស៊ីជម្រៅ និងវិភាគបានល្អ គឺកើតចេញពីការខិតខំរៀនសូត្រ អានសៀវភៅឱ្យបានច្រើន និងអនុវត្តផ្សេងៗ ទើបអាចឱ្យអ្នកមានចំណេះដឹងច្រើន សម្បូរដោយគំនិតផ្សេងៗ និងការគិតទូលំទូលាយ មើលឃើញបញ្ហា និងដំណោះស្រាយទាំងអស់ដោយខ្លួនឯង៕