កីឡា

ក្រុមបាល់ទាត់នារីកម្ពុជា ប៉ះ ឡាវ រសៀលថ្ងៃនេះដើម្បីឱកាសឡើងវគ្គផ្តាច់ព្រ័ត្រ AFF Women’s Cup លើកទី២

បានផុស

៩ នាទី មុន

នៅ

ថ្ងៃអាទិត្យ ១៩ កក្កដា ២០២៦

ដោយ

ក្រុមបាល់ទាត់ជម្រើសជាតិនារីកម្ពុជា ត្រូវប្រកួតជាមួយ ក្រុមនារី ឡាវ វេលាម៉ោង ៣:៤៥នាទីរសៀល ថ្ងៃអាទិត្យ ទី១៩ ខែកក្កដា នេះនៅវគ្គពាក់កណ្តាលផ្តាច់ព្រ័ត្រ ពានរង្វាន់ AFF Women’s Cup ឆ្នាំ ២០២៦ នៅប្រទេសម៉ាឡេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមនារីកម្ពុជា បានឡើងវគ្គពាក់កណ្តាលផ្តាច់ព្រ័ត្រ ក្នុងនាមជាក្រុមលេខ ១ ពូល B បន្ទាប់ពីឈ្នះ ទីម័រខាងកើត ដោយលទ្ធផល ៣-១ និង ស្មើជាមួយ ឥណ្ឌូណេស៊ី ដោយលទ្ធផល ១-១។ ចំណែក ក្រុមនារី ឡាវ ជាក្រុមលេខ ២ ក្នុងពូល A ដែលរកបាន ២ ពិន្ទុប៉ុណ្ណោះ បន្ទាប់ពីស្មើម្ចាស់ផ្ទះ ម៉ាឡេស៊ី ១-១ និង ស្មើ សិង្ហបុរី ១-១។

ចំណែក ក្រុមនារី ឥណ្ឌូណេស៊ី លេខ ២ ពូល B មាន ៤ ពិន្ទុ បន្ទាប់ពីឈ្នះ ទីម័រខាងកើត ២-០ និងស្មើ កម្ពុជា ១-១ ឡើងទៅកាន់វគ្គពាក់កណ្តាលផ្តាច់ព្រ័ត្រ ជួប ក្រុមនារីសិង្ហបុរី ដែលជាក្រុមលេខ ១ ពូល A។ ក្រុមនារីសសិង្ហបុរី បានស្មើ ឡាវ ១-១ និង បានឈ្នះម្ចាស់ផ្ទះ ម៉ាឡេស៊ី ៣-១។

ក្រុមនារីកម្ពុជា និង នារីឡាវ ធ្លាប់មានប្រវត្តិជួបគ្នាតែ ២ ដងប៉ុណ្ណោះ ក្នុងនោះ ឡាវ មិនធ្លាប់ឈ្នះ កម្ពុជា ឡើយ។ ជួបគ្នាលើកទី១ ក្នុងពានរង្វាន់ AFF Women’s Championship ឆ្នាំ ២០២២ ក្រុមទាំងពីរបញ្ចប់ដោយលទ្ធផលស្មើគ្នា ១-១ និងការជួបគ្នាលើកទី២ កម្ពុជា បានឈ្នះ ឡាវ ដោយលទ្ធផល ២-០ ក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ ២០២៣ ដែលកម្ពុជាធ្វើម្ចាស់ផ្ទះ។

ផ្អែកលើគុណភាពរបស់ ក្រុមទាំងពីរ គឺ កម្ពុជា មានកម្រិតល្អជាង ឡាវ ដូច្នេះមានសង្ឃឹមខ្ពស់ក្នុងការទទួលបានជ័យជម្នះដើម្បីឡើងទៅកាន់វគ្គផ្តាច់ព្រ័ត្រជាលើកទី២ បន្ទាប់ពីបានឡើងវគ្គផ្តាច់ព្រ័ត្រ លើកទី១ កាលពីឆ្នាំ ២០២៤។ ជាមួយគ្នានេះ ក្រុមនារីឥណ្ឌូណេស៊ី ក៏សង្ឃឹមច្រើនក្នុងការទទួលបានជ័យជម្នះលើក្រុមនារី សិង្ហបុរី ដែរ។ ទោះបីជាយ៉ាងណា ការជួបគ្នាចុងក្រោយ ឥណ្ឌូណេស៊ី បានចាញ់ សិង្ហបុរី ២-០ ក្នុងជំនួបមិត្តភាពកាលពីដើមខែមិថុនាកន្លងទៅថ្មីៗនេះ។

សូមបញ្ជាក់ថា ពាន AFF Women’s Cup លើកទី១ កាលពីឆ្នាំ ២០២៤ ក្រុមនារីឥណ្ឌូណេស៊ី ជាម្ចាស់ជើងឯក ក្រុមនារីកម្ពុជា លេខ ២ និងក្រុមនារី សិង្ហបុរី លេខ ៣។ ក្រុមដែលទទួលបានចំណាត់ថ្នាក់លេខ ១ លេខ ២ និងលេខ ៣ ទទួលបានកៅអី ឡើងទៅប្រកួតពានរង្វាន់នារីកម្រិតទី១ប្រចាំតំបន់អាស៊ាន AFF Women’s Championship ឆ្នាំ ២០២៦៕

កម្មវិធីប្រកួតវគ្គពាក់កណ្តាលផ្តាច់ព្រ័ត្រ ថ្ងៃទី១៩ ខែកក្កដា ឆ្នាំ ២០២៦