កម្មវិធី Open House របស់មជ្ឈមណ្ឌលផលិតកម្មឌីជីថលកម្ពុជា-ជប៉ុន (CJDM)

មជ្ឈមណ្ឌលផលិតកម្មឌីជីថលកម្ពុជា-ជប៉ុន (CJDM) បានបើកកម្មវិធី Open House នៅថ្ងៃទី២៤ ខែឧសភា ឆ្នាំ២០២៣ ក្រោមវត្តមានរបស់លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា និងលោក UENO Atsushi ឯកអគ្គរាជទូតជប៉ុនប្រចាំកម្ពុជា។

កម្មវិធី Open House របស់ CJDM បានអនុញ្ញាតឲ្យបណ្តាក្រុមហ៊ុន រោងចក្រសហគ្រាស និងសិស្ស និសិ្សត យល់កាន់តែច្បាស់អំពីផ្នែកផលិតឌីជីថល និងការវិនិយោគបច្ចេកវិទ្យាជាដើម។ គោលបំណងរបស់កម្មវិធីនេះ ដើម្បីឱ្យប្រទេសកម្ពុជាសម្រេចបាននូវកំណើនប្រកបដោយនិរន្តរភាពនាពេលអនាគត ព្រោះវាចាំបាច់សម្រាប់ប្រទេសក្នុងការប្រើប្រាស់បច្ចេកវិទ្យាឌីជីថល និងជំរុញវិស័យឧស្សាហកម្មរបស់ខ្លួន។

ក្នុងឱកាសនោះ លោករដ្ឋមន្ត្រី ហង់ជួន ណារ៉ុន បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាលជប៉ុន តាមរយៈក្រសួងការបរទេស និងក្រសួងសេដ្ឋកិច្ច ពាណិជ្ជកម្ម និងឧស្សាហកម្ម របស់ជប៉ុន សម្រាប់ការគាំទ្រដល់ការអភិវឌ្ឍធនធានមនុស្សក្នុងឧស្សាហកម្មផលិតឌីជីថលនៅកម្ពុជា។ លោករដ្ឋមន្ត្រី បានអគុណលោកបណ្ឌិត Masahiko MORI ប្រធានក្រុមហ៊ុន DMG MORI សម្រាប់កិច្ចសហប្រតិបត្តិការដ៏ល្អជាមួយសាកលវិទ្យាល័យភូមិន្ទភ្នំពេញ លើជំនួយបច្ចេកទេស និងការបណ្តុះបណ្តាលម៉ាស៊ីន CNC នៅមជ្ឈមណ្ឌលផលិតកម្មឌីជីថលកម្ពុជា-ជប៉ុន (CJDM) នេះ។

មជ្ឈមណ្ឌលផលិតកម្មឌីជីថលកម្ពុជា-ជប៉ុន (CJDM) ត្រូវបានបង្កើតឡើងជាមួយនឹងការរំពឹងទុកថា នឹងក្លាយជាមជ្ឈមណ្ឌលបច្ចេកវិទ្យាសម្រាប់ការផលិតឌីជីថលកម្រិតខ្ពស់នៅក្នុងតំបន់ ដោយផ្អែកលើ R&D ជាមួយនឹងម៉ាស៊ីន CNC ទំនើបចុងក្រោយបំផុត និងអាចកាត់បន្ថយកាកសំណល់ បង្កើនផលិតភាព និងបង្កើនគុណភាពនៃផលិតផល ដែលមានម៉ាស៊ីនទំនើបៗចំនួន៣គ្រឿង មានសមត្ថភាពផលិតគ្រឿងបន្លាស់ និងគ្រឿងបង្គំគ្រប់ប្រភេទ និងគ្រប់ទំហំពីសមាសធាតុលោហធាតុផ្សេងៗ ដោយប្រើបច្ចេកវិទ្យាឌីជីថល៕