ផ្លូវបេតុងជាង ២ គីឡូម៉ែត្រ​​ភ្ជាប់​ផ្លូវ​ប្របមាត់សមុទ្រនៅ​ភូមិ​អង្កោល សម្ពោធ​ដាក់​ឲ្យ​ប្រើប្រាស់

ផ្លូវបេតុងភ្ជាប់គ្នាជាមួយផ្លូវប្របមាត់សមុទ្រមួយខ្សែដែលមានប្រវែង ២,០៥០ម៉ែត្រ និងមានទទឹង ១១ម៉ែត្រ ស្ថិតនៅក្នុងភូមិអង្កោល ឃុំអង្កោល ស្រុកដំណាក់ចង្អើរ បាន​សម្ពោធដាក់ឲ្យប្រើប្រាស់ជាផ្លូវការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្លូវ​បេតុង​ដែលទើប​ស្ថាននា​រួចរាល់​សម្ពោធ​ដាក់​ឲ្យ​ប្រើប្រាស់​នេះ​ ជាផ្លូវដ៏សំខាន់ក្នុងការតភ្ជាប់រវាងផ្លូវប្របមាត់សមុទ្រដែលកំពុងស្ថាបនាក្រោមឥណទាន (ADB) ផ្លូវជាតិលេខ ១៣-៣២ ដែលមានប្រវែងជាង ១១ គីឡូម៉ែត្រ ជាមួយផ្លូវបេតុងក្នុងទិសដៅរុញទៅតំបន់ឆ្នេរអង្កោលឱ្យកាន់តែរីកចម្រើនថែមមួយកំរិតបន្ថែមទៀត។

លោក ងិន ងិនដា អភិបាលខេត្តស្តីទីបានថ្លែងថា ខេត្តកែបពីដើមឡើយជាទីតាំងចុងកាត់មាត់ញក ខ្វះខាតរាប់តាំងពីផ្លូវធ្វើដំណើរចេញចូល ហើយជីវភាពពលរដ្ឋក៏ខ្សត់ខ្សោយណាស់ដែរ តែបច្ចប្បន្នបានប្រែប្រួលគ្រប់យ៉ាងប្រែពីអត់ផ្លូវទៅមានផ្លូវ ពីផ្លូវគ្រួសក្រហមមកជាផ្លូវបេតុង ផ្លូវកៅស៊ូខ្វាត់ខ្វែង ដែលភ្ជាប់គ្នាប្រៀបដូចសរសៃឈាមជាហេតុធ្វើឲ្យ​ចរន្តសេដ្ឋកិច្ចមានការរីកចម្រើន ហើយជីវភាពធូធារ។

លោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ មានប្រសាសន៍​ថា ខេត្តកែបទទួលបាននូវសមិទ្ធផលថ្មីៗជាបន្តបន្ទាប់ លើការពង្រីកហេដ្ឋារចនាសម្ព័ន្ធ ជាប្រយោជន៍សម្រាប់បម្រើឲ្យវិស័យសេដ្ឋកិច្ច សង្គមកិច្ច បង្កភាពងាយស្រួលដល់ការ ធ្វើចរាចររបស់បងប្អូនប្រជាពលរដ្ឋ និងសិស្សានុសិស្សជាដើម។

ខេត្តកែបជាខេត្តដែលរាជរដ្ឋាភិបាលផ្តល់អាទិភាពជាទិសដៅទេសចរណ៍កំរិតខ្ពស់ ក្នុងចំណោមខេត្ត ២ នៅទូទាំងកម្ពុជា ដូចនេះហើយជាបន្តបន្ទាប់រាជរដ្ឋាភិបាលបានទម្លាក់កញ្ចប់ថវិការមករៀបចំខេត្តនេះ ដោយក្នុងអាណត្តិកន្លងទៅ ខេត្តបានសម្រេចនូវសមិទ្ធផលជាច្រើន។

ក្នុងនោះផ្លូវមួយខ្សែដែលបានសម្ពោធដាក់អោយប្រើប្រាស់នេះ ក៏ស្ថិតក្នុងចក្ខុវិស័យសម្រាប់អភិវឌ្ឍន៍តំបន់អង្កោលនេះដែរ។

បើតាមលោក ចម ប្រសិទ្ធ អ្វីដែលកំពុង​ជំរុញបន្ថែមនោះគឺទឹកស្អាត។ យ៉ាងយូរត្រឹមឆ្នាំ២០២៤ តំបន់អង្កោលត្រូវតែមានទឹកស្អាតចូលមកដល់ដើម្បីពន្លឿនការអភិវឌ្ឍន៍ ស្របតាមសក្តានុពលដែលតំបន់នេះមាន។

គួរបញ្ជាក់ថា អង្កោល ស្ថិតក្នុងប៉ួលទាំង ៤ នៃខេត្តកែបសម្រាប់អភិវឌ្ឍន៍វិស័យទេសចរណ៍ ដោយក្នុងនោះរដ្ឋាភិបាលក្រោមការដឹកនាំរបស់សម្តេចតេជោ កំពុងអនុវត្តន៍សាងសង់ផ្លូវបតុងមួយខ្សែដែលភ្ជាប់ពីឆ្នេរកែបមកឆ្នេរអង្កោល។

តាម​រយៈផ្លូវបេតុងដែលទើបសម្ពោធ តភ្ជាប់ជាមួយផ្លូវជាតិលេខ១៣-៣២ រួចឆ្ពោះទៅច្រកទ្វារព្រំដែនអន្តរជាតិ​ព្រែកចាក និងផ្លូវជាតិលេខ៣៣ ដែលកំពុងពង្រីកបន្ថែម គេជឿថាក្រោយពីការស្ថាបនារួចរាល់បានសម្រេច នឹង​ធ្វើ​ឲ្យជីវភាពប្រជាពលរដ្ឋកាន់តែធូធាររីកចម្រើនមួយកំរិតបន្ថែមទៀត៕

អត្ថបទ៖ សឹង រ៉ាត់