លោក ស៊ុន ចាន់ថុល ប្រាប់​អ្នកវិនិយោគ កុំទើសទាល់លើក​ពី​​បញ្ហា ដើម្បី​រួម​គ្នា​ដោះស្រាយ

ក្នុង​ដំណើរ​ទស្សនកិច្ចនៅ​តំបន់សេដ្ឋកិច្ចពិសេសចំនួន ៣ ទីតាំង ក្នុងខេត្តព្រះសីហនុ លោក ស៊ុន ចាន់ថុល ឧបនាយករដ្ឋមន្ត្រី និងជា​អនុប្រធានទី ១ ក្រុមប្រឹក្សាអភិវឌ្ឍន៍កម្ពុជា បាន​ជំរុញ​ឱ្យអ្នកវិនិយោគទាំងអស់​កុំ​ទើស​ទាល់​ក្នុង​ការលើក​ពីបញ្ហា​ប្រឈម​ផ្សេងៗ ដើម្បីស្វែងរកនីតិវិធីរួមគ្នាដោះស្រាយ។

ក្នុង​ដំណើរទស្សនកិច្ច​កាល​ពីម្សិលមិញ លោក​ឧបនាយករដ្ឋមន្រ្តី​បាន​ប្រាប់​ពី​ចក្ខុវិស័យរបស់រាជរដ្ឋាភិបាលកម្ពុជាក្នុងការសម្របសម្រួល និងដោះស្រាយបញ្ហាប្រឈមផ្សេងៗជូនដល់វិនិយោគិន។

​លោក​បញ្ជាក់​ចំពោះ​ក្រុមអ្នក​វិនិយោគ​ថា ដើម្បីស្វែងយល់ពីការអភិវឌ្ឍ បញ្ហាប្រឈម និងការស្វែងរកដំណោះស្រាយ​សមស្រប លោក​លើកទឹកចិត្តឱ្យអ្នកវិនិយោគទាំងអស់​កុំមានភាពទើសទាល់ក្នុងការជម្រាបជូនអំពីបញ្ហាផ្សេងៗ ដើម្បីអាចឱ្យរាជរដ្ឋាភិបាលស្វែងរកនីតិវិធីដោះស្រាយ រួមគ្នាបង្កលក្ខណៈអំណោយ​ផល​ក្នុងការបណ្ដាក់ទុននៅក្នុងប្រទេស​កម្ពុជា។

កាលពីថ្ងៃទី ១១ ខែកញ្ញា ឆ្នាំ២០២៣ លោក ស៊ុន ចាន់ថុល បាន​ចុះ​ទៅ​ពិនិត្យ​នៅ​តំបន់សេដ្ឋកិច្ចពិសេសចំនួន ៣ ក្នុងខេត្តព្រះសីហនុរួមមាន៖ ១.តំបន់សេដ្ឋកិច្ចពិសេសកំពង់ផែក្រុងព្រះសីហនុ ២. តំបន់សេដ្ឋកិច្ចពិសេសក្រុងព្រះសីហនុ និង ៣. តំបន់សេដ្ឋកិច្ចពិសេសខេមបូឌាន ចេជាង ហ្គ័រជី ព្រមទាំងការចុះពិនិត្យមើលសកម្មភាពផលិតកម្មរបស់ក្រុមហ៊ុនចំនួន ៥ នៅក្នុងតំបន់សេដ្ឋកិច្ចពិសេសទាំងនេះផងដែរ។

ឆ្លៀតក្នុងឱកាសនេះ លោក​ឧបនាយករដ្ឋមន្ត្រីបានបង្ហាញ​ពី​​គម្រោងថ្មីៗ​ដែលរាជរដ្ឋាភិបាលកម្ពុជា បានផ្ដួចផ្ដើមសិក្សា និងសាងសង់ឡើងរួមមាន គម្រោងកសាងមជ្ឈមណ្ឌលភស្តុភារកម្មភ្នំពេញ ការសិក្សាគម្រោងកសាងមជ្ឈមណ្ឌលភស្តុភារកម្មក្រុងព្រះសីហនុ គម្រោងពង្រីកកំពង់ផែទឹកជ្រៅក្រុងព្រះសីហនុ គម្រោងផ្លូវល្បឿនលឿន ការសិក្សាគម្រោងផ្លូវរថភ្លើងល្បឿនលឿនភ្នំពេញ-ក្រុងព្រះសីហនុ ជាពិសេសគម្រោងព្រែកជីកហ្វូណនតេជោ ដែលគម្រោងទាំងអស់នេះនឹងដើរតួនាទីសំខាន់ក្នុងការកាត់បន្ថយតម្លៃឡូជីស្ទិកនៅកម្ពុជា។

បច្ចុប្បន្នតំបន់សេដ្ឋកិច្ចពិសេសទាំង ៣ នៅ​ខេត្ត​ព្រះសីហនុ បានផ្តល់ការងារជូនដល់កម្មករនិយោជិតប្រមាណ ៣៣ ១០០​ នាក់៕