មកដឹងមូលហេតុពិត ដែលលោក ស សុខា បញ្ជាឱ្យផ្អាកការបង្ក្រាបផលិតផលក្លែងក្លាយ

កាលពីព្រឹកថ្ងៃទី១៩ ខែកញ្ញា ឆ្នាំ២០២៣ លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបញ្ជាឱ្យផ្អាកការបង្ក្រាបផលិតផលក្លែងក្លាយ ដែលស្ថិតនៅក្នុងដែនសមត្ថកិច្ចក្រសួងមហាផ្ទៃ។

នៅជុំវិញការបញ្ជារបស់ លោក ស សុខា កាលពីព្រឹកថ្ងៃទី១៩ខែកញ្ញាកន្លងទៅនេះ លោក ទូច សុខៈ អ្នកនាំពាក្យរងក្រសួងមហាផ្ទៃបានចេញមកបញ្ជាក់បន្ថែមនៅរាត្រីទី១៩ខែកញ្ញានេះថា  “កន្លងទៅសមត្ថកិច្ចនគរបាលទទួលបន្ទុកចុះប្រតិបត្តិការតាមជំនាញ និងច្បាប់ ដើម្បីលើកកម្ពស់សុខមាលភាពសង្គម។ ទន្ទឹមនេះក៏មានបុគ្គលខ្លះរងការរិះគន់ថា ខ្វះចន្លោះក្នុងបេសកកម្ម។ លើសពីនេះទៅទៀត ក៏មានការលេចឮដំណឹងថា មានជនឱកាសនិយម ក្លែងបន្លំធ្វើជានគរបាលមានសមត្ថកិច្ច ចុះធ្វើសកម្មភាពអវិជ្ជមាននានា ដែលនាំឱ្យម្ចាស់អាជីវកម្មមានការភាន់ច្រឡំ”។

លោក ទូច សុខៈបន្តថា “ដើម្បីជម្រះមន្ទិលទាំងនេះ លោកស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានពិគ្រោះយោបល់ជាមួយថ្នាក់ដឹកនាំក្រសួង ឈានទៅសម្រេច ផ្អាកជាបណ្ដោះអាសន្នរាល់សកម្មភាពរបស់មន្ត្រីនគរបាល និងអង្គភាពជំនាញចំណុះក្រសួងមហាផ្ទៃមួយរយៈ ដើម្បីងាយស្រួលបើកការអង្កេតស្រាវជ្រាវតាមបណ្ដឹងរបស់ប្រជាពលរដ្ឋ”។

លោក ទូច សុខៈ បន្ថែមថា ការអង្កេតស្រាវជ្រាវនេះ លោកអភិសន្តិបណ្ឌិត ស សុខា បានប្រគល់ភារកិច្ចនេះ ទៅអគ្គាធិការដ្ឋានក្រសួងមហាផ្ទៃ មុខការអង្កេតស្រាវជ្រាវតាមជំនាញនិងនីតិវិធី ដើម្បីធ្វើរបាយការណ៍គោរពជូន ឯកឧត្ដមអភិសន្តិបណ្ឌិត ពិនិត្យសម្រេច និងឈានទៅចាត់វិធានការចំពោះមន្ត្រីណាដែលរកឃើញថាប្រព្រឹត្តិខុសតួនាទីភារកិច្ច និងគោលការណ៍ច្បាប់។ ទន្ទឹមនេះ ប្រសិនបើក្នុងពេលផ្អាកបណ្ដោះអាសន្ននេះ មាននគរបាលណា ឬអង្គភាពចំណុះក្រសួង ធ្វើសកម្មភាពទៀត លោក អភិសន្តិបណ្ឌិត ស សុខា  ប្រគល់សិទ្ធិជូនទៅខាងអគ្គស្នងការដ្ឋាននគរបាលជាតិ ចាត់ការលើបុគ្គលឬអង្គភាពដែលល្មើសនេះតាមច្បាប់៕