អភិបាលរាជធានី ជូនដំណើរ កម្មករ កម្មការិនី និងពលរដ្ឋ ឡើងជិះរថយន្តក្រុង​ទៅស្រុកកំណើត នាឱកាសបុណ្យភ្ជុំបិណ្ឌ

លោក ឃួង ស្រេង អភិបាល នៃ​គណៈ​អភិបាល​រាជធានី​ភ្នំពេញ រួម​ជាមួយ​មន្ត្រី​ជា​ច្រើន​រូប​ទៀត នា​ព្រឹក​ព្រលឹម​ថ្ងៃ​ទី ១២ ខែ​តុលា ឆ្នាំ ២០២៣ នេះ ពោល មុន​ថ្ងៃបុណ្យ​ភ្ជុំបិណ្ឌ ២ ថ្ងៃ បាន​អញ្ជើញ​ជូន​ដំណើរ កម្មករ កម្មការិនី និង​ប្រជាពលរដ្ឋ ឡើង​ជិះ​រថយន្តក្រុង​ទៅ​ស្រុកកំណើត​តាម​ខេត្ត​ក្រុង នានា នៅ​ទីលាន​ប្រជាធិបតេយ្យ ទល់មុខ​អតីត​ឃ្លាំង​សាំង ខណ្ឌ​ឫស្សី​កែវ រាជធានី​ភ្នំពេញ។

អនុវត្ត​តាម​អនុសាសន៍​ដ៏​ខ្ពង់ខ្ពស់​របស់ សម្តេច​មហា​បវរ​ធិបតី ហ៊ុន ម៉ាណែត នាយករដ្ឋមន្ត្រី នៃ​ព្រះរាជាណាចក្រ​កម្ពុជា រដ្ឋបាល​រាជធានី​ភ្នំពេញ បាន​បញ្ចេញ​រថយន្តក្រុង​ដឹក​អ្នកដំណើរ​ចំនួន ៤៥៥ គ្រឿង សម្រាប់​បម្រើ​សេវា​ដឹកជញ្ជូន​សាធារណៈ ដោយ​ដឹក​កម្មករ កម្មការិនី និង​ប្រជាពលរដ្ឋ រយៈពេល ០៥ ថ្ងៃ មិន​បង់​ប្រាក់ ​ចាប់ផ្ដើម​អនុវត្ត​ពី​ថ្ងៃ​ទី ១២ ដល់​ថ្ងៃ​ទី ១៦ ខែ​តុលា ឆ្នាំ ២០២៣។

តាម​សេចក្ដីជូនដំណឹង​របស់​រដ្ឋបាល​រាជធានី​ភ្នំពេញ បាន​ឲ្យ​ដឹង​ថា អនុវត្ត​តាម​ប្រសាសន៍​ដឹកនាំ​ដ៏​ខ្ពង់ខ្ពស់​បំផុត​របស់ សម្ដេច​មហា​បវរ​ធិបតី ហ៊ុន ម៉ាណែត នាយករដ្ឋមន្ត្រី នៃ​ព្រះរាជាណាចក្រ​កម្ពុជា កាលពី​ថ្ងៃ​ទី ០១ ខែ​កញ្ញា ឆ្នាំ ២០២៣ រដ្ឋបាល​រាជធានី​ភ្នំពេញ នឹង​រៀបចំ​រថយន្តក្រុង​ចំនួន ៤៥៥ គ្រឿង សម្រាប់​បម្រើ​សេវា​ដឹកជញ្ជូន​សាធារណៈ រយៈពេល ០៥ ថ្ងៃ ចាប់ពី​ថ្ងៃ​ទី ១២ ដល់​ថ្ងៃ​ទី ១៦ ខែ​តុលា ឆ្នាំ ២០២៣ ដោយ​មិន​បង់​ប្រាក់ ដើម្បី​ជួយ​សម្រួល​ដល់​ការ​ចំណាយ​ជូន​​កម្មករ​-​និយោជិត និង​ប្រជាពលរដ្ឋ ក្នុង​ការ​ធ្វើដំណើរ​ទៅលេង​ស្រុកកំណើត ជួបជុំ​បងប្អូន ក្រុម​គ្រួសារ ក្នុង​ពិធីបុណ្យ​ភ្ជុំបិណ្ឌ ប្រពៃណី​ជាតិខ្មែរ ដោយ​ក្នុង​នោះ ៖ ១-​សម្រាប់​សេវា​ដឹកជញ្ជូន​ប្រជាពលរដ្ឋ​នៅ​ក្នុង​រាជធានី​ភ្នំពេញ ៖ ប្រើប្រាស់​រថយន្តក្រុង​ចំនួន ៦០ គ្រឿង។

ឆ្លៀត​ឱកាស​នេះ រដ្ឋបាល​រាជធានី​ភ្នំពេញ បាន​អំពាវនាវ​ឲ្យ​ម្ចាស់​ក្រុមហ៊ុន និង​ម្ចាស់​រថយន្ត​ដឹក​ជញ្ជូន​អ្នកដំណើរ​ទាំងអស់ មេត្តា​រក្សា​តម្លៃ​ដឹកជញ្ជូន​នៅ​ដដែល ដោយ​ពុំ​តម្លើង​ថ្លៃ ក្នុង​ឱកាស​ពិធីបុណ្យ​ភ្ជុំបិណ្ឌ ប្រពៃណី​ជាតិខ្មែរ ខាងមុខនេះ ដើម្បី​រួមចំណែក​ជាមួយ​រាជរដ្ឋាភិបាល និង​រដ្ឋបាល​រាជធានី​ភ្នំពេញ ក្នុង​ការ​ជួយ​សម្រួល​ដល់​ជីវភាព​រស់នៅ​របស់​​ប្រជាពលរដ្ឋ៕

អត្ថបទ ៖ ស្រីរ័ត្ន