ទី​បំផុត ភ្នំពេញ មាន​ក្រុមហ៊ុន​ដឹកសំរាម ៣ បែងចែក​គ្នា​ដឹកសំរាមចេញពីក្រុង

ក្រុមហ៊ុនប្រមូលសំរាម ចំនួន ៣ ដែលជាក្រុមហ៊ុនមានលក្ខណះអន្តរជាតិ នឹងចេញប្រតិបត្តិការ លើការ ប្រមូលនិងដឹកជញ្ជូនសំរាមនៅក្នុងរាជធានីភ្នំពេញក្រោយពីបានសម្រេចជ្រើសរើសអស់១ឆ្នាំ។ ក្រុមហ៊ុនដឹកសំរាម ទាំង៣ ត្រូវបែបចែកជា ៣ តំបន់ ដើម្បីធ្វើសកម្មភាពប្រមូលសំរាម។

ការសម្រេចនេះ បានធ្វើឡើង ក្នុងពិធីប្រគល់-ទទួលកិច្ចសន្យាស្តីពីការផ្តល់សេវាប្រមូល និងដឹកជញ្ជូនសំរាម សំណល់រឹង នៅរាជធានីភ្នំពេញ វាងរដ្ឋបាលរាជធានីភ្នំពេញ និងក្រុមហ៊ុន Cintri (Cambodia) / Everbright (China) ក្រុមហ៊ុន 800 SUPER/GAEA និងក្រុមហ៊ុន Mizuda Group Co.,Ltd នៅថ្ងៃទី០៥ ខែកុម្ភៈ ឆ្នាំ២០២១ នៅសាលារាជធានីភ្នំពេញ ក្រោមវត្តមានលោកឃួង ស្រេង អភិបាលរាជធានីភ្នំពេញ។

កន្លងមកក្រុមហ៊ុនប្រមូលសំរាមនៅរាជធានីភ្នំពេញ​គឺមាន​តែមួយគត់ គឺក្រុមហ៊ុនស៊ីនទ្រី , ប៉ុន្តែក្រោយមក រាជរដ្ឋាភិបាលបានសម្រេចឲ្យរដ្ឋបាលរាជធានីភ្នំពេញ ស្វែងរកក្រុមហ៊ុនថ្មីមកជំនួស និងបែងចែកការប្រមូលសំរាមនៅរាជធានីភ្នំពេញជា ៣តំបន់ផ្សេងៗគ្នា៕

អត្ថបទ៖ ស្រីរ័ត្ន