ខ្សាច់​កម្ពុជា​មាន​គុណភាព​ខ្ពស់ អាច​ផលិតជាកញ្ចក់​​​សូឡាទាញយកថាមពល​ពី​ពន្លឺព្រះអាទិត្យ

កាលពី​រសៀលថ្ងៃថ្ងៃទី២០ ខែតុលា ឆ្នាំ២០២៣ លោក ស៊ុន ចាន់ថុល ឧបនាយករដ្ឋមន្ត្រី និង​ជា​អនុប្រធានទី ១ ក្រុមប្រឹក្សាអភិវឌ្ឍន៍កម្ពុជា បានជួបពិភាក្សាការងារជាមួយលោក Put Lee ប្រធានក្រុមហ៊ុន Xinyi Energy និងក៏ជាអនុប្រធានក្រុមហ៊ុន Xinyi Solar ក្នុង​ដំណើរ​ទស្សនកិច្ច​នៅ​ទីក្រុង Shenzhen ប្រទេសចិន។

តាមរយៈជំនួបនេះ លោក Put Lee ប្រធានក្រុមហ៊ុន Xinyi Energy បានលើកសរសើរអំពីគុណភាពខ្សាច់របស់ប្រទេសកម្ពុជា ដែលជាសមាសធាតុសំខាន់សម្រាប់ផលិតកម្មកញ្ចក់ ដោយក្នុងនោះក្រៅពីផលិតជាកញ្ចក់ធម្មតា ក៏អាចផលិតជាកញ្ចក់សូឡា (Solar Glass) ដែលអាចទាញយកថាមពលពន្លឺព្រះអាទិត្យយកមកប្រើប្រាស់បានផងដែរ។

ស្របការលើកឡើងនេះ លោក​ឧបនាយករដ្ឋមន្ត្រី បានចង្អុលបង្ហាញអំពីឱកាសវិនិយោគរបស់ក្រុមហ៊ុនក្នុងការបង្កើតរោងចក្រនៅប្រទេសកម្ពុជា ដើម្បីផ្គត់ផ្គង់កញ្ចក់សម្រាប់ទីផ្សារនៅក្នុងតំបន់ ដោយហេតុថាកម្ពុជាមានខ្សាច់ដែលមានគុណភាពខ្ពស់ សមស្របសម្រាប់សង្វាក់ផលិតកម្មកញ្ចក់។ ជាមួយគ្នានេះផងដែរ លោក​ឧបនាយករដ្ឋមន្ត្រីក៏បានអញ្ជើញលោកប្រធានក្រុមហ៊ុន Xinyi Energy ទៅទស្សនកិច្ចប្រទេសកម្ពុជា ដើម្បីស្វែងយល់អំពីសក្តានុពលសេដ្ឋកិច្ច និងការវិនិយោគបន្ថែមទៀតនៅកម្ពុជា។

បន្ទាប់ពីបានស្តាប់ការពន្យល់ណែនាំអំពីសក្តានុពលនិងបរិយាកាសវិនិយោគនៅកម្ពុជា ថ្នាក់ដឹកនាំ​ក្រុមហ៊ុន Xinyi Energy សន្យា​នឹង​មកទស្សនកិច្ចសិក្សានៅប្រទេសកម្ពុជាដោយផ្ទាល់ ដើម្បីស្វែងយល់បន្ថែមអំពីភាពខ្លាំងសក្តានុពលសម្រាប់ផលិតកម្ម ព្រមទាំងស្វែងរកឱកាសដើម្បីបណ្ដាក់ទុនវិនិយោគនៅកម្ពុជា។

ក្រុមហ៊ុន Xinyi Solar គឺជាក្រុមហ៊ុនមួយក្នុងចំណោមក្រុមហ៊ុនដែលផ្គត់ផ្គង់កញ្ចក់ធំផុតក្នុងប្រទេសចិន ដែលមាន​រោងចក្រផលិតចំនួន ១១ នៅទូទាំងប្រទេស។ ក្រុមហ៊ុនផលិតកញ្ចក់ប្រើសម្រាប់ទាញយកពន្លឺព្រះអាទិត្យប្រភេទ Photovoltaic ឈានមុខគេរបស់ពិភពលោក ហើយបើគិតត្រឹមថ្ងៃទី៣០ ខែមិថុនា ឆ្នាំ២០២៣ ក្រុមហ៊ុននេះមានសមត្ថភាពរំលាយប្រចាំថ្ងៃ (daily melting capacity) សរុបចំនួន ២១ ៨០០ តោន៕