អាជ្ញាធរខេត្តស្ទឹងត្រែងរៀបចំព្រឹត្តិការណ៍ប្រណាំងទូក ងអបអរពិធីបុណ្យអុំទូកបណ្ដែតប្រទីបសំពះព្រះខែ

អភិបាលខេត្តស្ទឹងត្រែងលោក ស្វាយ សំអ៊ាង បានរៀបចំពិធីប្រណាំងទូកង អបអរពិធីបុណ្យអុំទូកបណ្ដែតប្រទីប សំពះព្រះខែ អកអំបុកដ៍ធំមួយនៅតាមដងទន្លេសេកុង និងចាប់ផ្ដើមពីថ្ងៃទី១៧ ដល់ថ្ងៃទី ១៨ វិច្ឆិកាឆ្នាំ ២០២៣នេះ។

លោក ម៉ែន គង់ អ្នកនាំពាក្យសាលាខេត្តស្ទឹងត្រែងបានឲ្យដឹងថា នៅក្នុងពិធីអបអរបុណជាតិនេះក៏មានការប្រកួតកីឡាបាល់ទះ កីឡាបាល់ទាត់ផ្នែកបុរសកាលពីល្ងាចក្នុងថ្ងៃទី ១៦ វិច្ឆិកាដែលជាថ្ងៃចាប់ផ្ដើម ដោយឡែកការប្រណាំងទូកគឺចាប់ផ្ដើមពីរសៀលថ្ងៃទី ១៧ដល់ថ្ងៃទី ១៨ វិច្ឆិកានៅមាត់ច្រាំងទន្លេសេកុងទីរួមខេត្តស្ទឹងត្រែង។

លោក ម៉ែន គង់ បានលើកឡើងពីការអបអរនៅក្នុងពិធីបុណដែលមានលោក ស្វាយ សំអ៊ាង អភិបាលខេត្តបានរៀបចំព្រឹត្តិការណ៍តាមប្រពៃណីដើម្បីឲ្យប្រជាពលរដ្ឋទូទាំងខេត្តបានចូលរួមសប្បាយរីករាយក្រោយពីសម្រាកពីការប្រមូលផលកសិកម្ម។

លោក សាយ កុសល អភិបាលក្រុងស្ទឹងត្រែងបានបញ្ចាក់ថា៖ ក្នុងពិធីរៀបចំប្រណាំងទូក ង នេះមានមកពីបណ្ដាស្រុកនានាមន្ទីរជុំវិញខេត្ត ហើយក៏មានរៀបចំស្តង់តាំងពិពណ៌ប្រគំតន្ត្រីធ្វើឱ្យមានភាពសប្បាយរីករាយ ក្នុងពិធីអបអរបុណ្យអុំទូកបណ្ដែតប្រទីបសំពះព្រះខែនេះផងដែរ។

លោកអភិបាលក្រុងបន្តថា ការរៀបចំប្រណាំងទូកងនេះ ដើម្បីបង្ហាញពីការរួមគ្នា អភិរក្ស ប្រពៃណីវប្បធម៌ ផ្សារភ្ជាប់នឹងការអភិវឌ្ឍបង្ហាញទំនៀមទម្លាប់ប្រពៃណីរបស់ខេត្តស្ទឹងត្រែងទៅកាន់ភ្ញៀវទេសចរណ៍ជាតិ និងអន្តរជាតិ។

លោកស្រីមិនា រស់នៅក្រុងស្ទឹងត្រែងបានគាំទ្រចំពោះការផ្ដួចផ្ដើមរៀបចំកម្មវិធីប្រណាំងទូកនេះព្រោះបានបង្កើនភាពកំសាន្តសប្បាយ និងបានបង្ហាញឲ្យ យុវជនជំនាន់ក្រោយ រួមគ្នាអនុវត្តបន្តនូវប្រពៃណីវប្បធម៌របស់ជាតិយើងបន្តទៀត។

សូមបញ្ជាក់ថា ការប្រណាំងទូកថ្នាក់ខេត្តចាប់ផ្ដើមពីថ្ងៃទី ១៧ ដល់ថ្ងៃទី ១៨ ដែលមានទូកចំនួន១៧ ទូកបានចុះឈ្មោះ ហើយទូកទាំងនោះ និងចាប់ផ្ដើមប្រណាំងនៅរសៀលម៉ោង ២ៈ00 ខែវិច្ឆិកានេះទូកភាគច្រើនមកពីតាមបណ្ដាស្រុក និងមន្ទីរស្ថាប័នជុំវិញខេត្ត៕

អត្ថបទ៖ ងិនលីម