ជិត​​បញ្ចប់​​​ទាំងស្រុង ការ​ស្ថាបនា​ផ្លូវវាង​ចំណុច​បាក់ស្រុតនៅលើកំណាត់​ផ្លូវជាតិលេខ ៧៦

ផ្លូវវាងប្រវែងប្រមាណ ១០០០ម៉ែត្រ នៅលើកំណាត់ផ្លូវជាតិលេខ៧៦ ត្រង់ចំណុចអូរងើយចន្លោះ PK94+080 – PK94+150 ដែលរអិលបាក់កាលពីខែសីហា ឆ្នាំ២០២៣ គ្រោងបញ្ចប់ការស្ថាបនាទាំងស្រុងនៅចុងខែធ្នូ ឆ្នាំ២០២៣។

កំណាត់ផ្លូវជាតិលេខ៧៦ ដែលបានបាក់ស្រុតប្រមាណ ១៦៦ ម៉ែត្រ ត្រង់ចំណុចអូរងើយ ភូមិអណ្ដូងក្រឡឹង ឃុំសែនមនោរម្យ ស្រុកអូររាំង ខេត្តមណ្ឌលគិរី ចន្លោះ PK94+080 – PK94+150 កាលពីថ្ងៃទី០១ ខែសីហា ឆ្នាំ២០២៣ ត្រូវបានដាក់ឱ្យប្រើប្រាស់បណ្តោះអាសន្នកាលពី ថ្ងៃទី០៨ ខែសីហា ឆ្នាំ២០២៣ កំពុងត្រូវបានបន្តការស្ថាបនាផ្លូវវាង ប្រមាណ ១០០០ម៉ែត្រ និងគ្រោងបញ្ចប់ការសាងសង់ទាំងស្រុងនៅចុងខែធ្នូ ឆ្នាំ២០២៣ នេះហើយ។

ផ្លូវជាតិលេខ៧៦ (ស្នួល -សែនមនោរម្យ) មានប្រវែង ១២៧គ.ម ជាប្រភេទផ្លូវ DBST បានចាប់ផ្ដើមការស្ថាបនា នៅក្នុងខែកុម្ភៈ ឆ្នាំ២០០៧ និងបញ្ចប់ការស្ថាបនា នៅក្នុងខែមីនា ឆ្នាំ២០១១ ដែលចំណាយថវិកាសាងសង់ចំនួន ៥១ ៩០០ ០០០ ដុល្លារអាមេរិក។ ផ្លូវនេះបានសម្ពោធបើកឱ្យប្រើប្រាស់ជាផ្លូវការ នៅថ្ងៃទី៣១ ខែមករា ឆ្នាំ២០១២។

គិតចាប់ពីពេលស្ថាបនារួចមក មានរយៈពេលជាង១២ឆ្នាំ ផ្លូវជាតិលេខ៧៦នេះ មិនធ្លាប់មានការខូចខាតដែលតម្រូវឱ្យមានការជួសជុលម្តងណាទេ ហើយតែងតែទទួលបានការថែទាំជាប្រចាំរហូតមកដោយមន្ទីរជំនាញ។

គួរម្លឹកផងដែរថា នៅយប់ថ្ងៃទី០១ សីហា ២០២៣ កំណាត់ផ្លូវជាតិខាងលើនៅត្រង់ចំណុចអូរងើយ ស្ថិតក្នុងភូមិអណ្ដូងក្រឡឹង ឃុំសែនមនោរម្យ ស្រុកអូររាំង នៃខេត្តមណ្ឌលគិរី ត្រូវបានផ្អាកចរាចរណ៍ជាបណ្តោះអាសន្ន ដោយសារការរអិលបាក់ដីចន្លោះ PK94+080 – PK94+150 និងបន្តមានស្នាមប្រេះបន្ថែមនៅថ្ងៃបន្ទាប់ ដែលសរុបការខូចខាតមានប្រវែង ១៦៦ ម៉ែត្រ (រអិលបាក់ដី ៧០ ម និងស្នាមប្រេះ ៩៦ម)។

កាលពីថ្ងៃទី០៨ ខែសីហា ឆ្នាំ២០២៣ លោក ស៊ុន ចាន់ថុល ឧបនាយករដ្ឋមន្ត្រី និង​ជាអតីតរដ្ឋមន្ត្រីក្រសួងសាធារណការ និងដឹកជញ្ជូន អាណត្តិទី ៦ បានដឹកនាំគណៈប្រតិភូក្រសួងដោយមានការចូលរួមពីលោក​ ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន អាណត្តិទី៧ ចុះពិនិត្យស្ថានភាពនិងត្រួតពិនិត្យការងារបច្ចេកទេសបន្ថែមលើទីតាំងបាក់ស្រុត និងការស្ថាបនាផ្លូវវាងប្រវែង ១ ០០០ម៉ែត្រ ដោយមានការឈូសឆាយចាក់ថ្មម៉ិច និងកៀរកិនបង្ហាប់ ដើម្បីភ្ជាប់ចរាចរណ៍ឡើងវិញ ដោយធានាគុណភាពស្របតាមបទដ្ឋាន និងផ្តល់នូវសុវត្ថិភាពក្នុងការធ្វើដំណើរឆ្លងកាត់ជាបណ្តោះអាសន្ន របស់បងប្អូនប្រជាពលរដ្ឋក្នុងតំបន់ក៏ដូចជាភ្ញៀវទេសចរទាំងអស់៕