រាជធានីត្រៀមពង្រឹងសន្តិសុខសណ្តាប់ធ្នាប់ ខណៈចុងឆ្នាំមានកម្មវិធីសប្បាយភាពច្រើន

លោក ឃួង ស្រេង ជំរុញឱ្យកងកម្លាំង និងអាជ្ញាធរពង្រឹងសន្តិសុខសណ្តាប់ធ្នាប់បន្ថែម ខណៈចុងឆ្នាំនេះមានកម្មវិធីបុណ្យ និងកម្មវិធីសប្បាយភាពច្រើន។ ការជំរុញបែបនេះបានធ្វើឡើង នាព្រឹកថ្ងៃទី២៥ ខែធ្នូ ឆ្នាំ២០២៣ នេះ ក្នុងកិច្ចប្រជុំគណៈបញ្ជាការឯកភាពរដ្ឋបាលរាជធានីភ្នំពេញ នៅសាលារាជធានីភ្នំពេញ។

លោក ឃួង ស្រេង ប្រធានគណៈបញ្ជាការឯកភាពរដ្ឋបាលរាជធានីភ្នំពេញ បានជំរុញឱ្យកងកម្លាំង និងអាជ្ញាធរខណ្ឌទាំងអស់ ត្រូវពង្រឹងសន្តិសុខសណ្តាប់ធ្នាប់ឱ្យកាន់តែល្អ និងខ្លាំងក្លាថែមទៀត ខណៈដែលនៅចុងឆ្នាំ២០២៣ នេះ មានកម្មវិធីបុណ្យ និងកម្មវិធីសប្បាយភាពជាច្រើន ដែលកងកម្លាំងត្រូវការពារ សន្តិសុខជូនប្រជាពលរដ្ឋ និងថ្នាក់ដឹកនាំ។

លោក ឃួង ស្រេង មានប្រសើរថា ការងារសន្តិសុខ ជាការងារដែលយើងត្រូវធ្វើជាប្រចាំ ពិសេសនៅចុងឆ្នាំនេះ មានការងារ​ច្រើនណាស់ដែលយើងត្រូវអនុវត្ត ដើម្បីការពារសន្តិសុខសណ្តាប់ធ្នាប់ជូនប្រជាពលរដ្ឋ និងថ្នាក់ដឹកនាំ ដោយសារ​មានកម្មវិធីបុណ្យ និងសប្បាយភាពច្រើន ដែលកងកម្លាំងត្រូវការពារ។ ដូចជាការត្រៀមរៀបចំកម្មវិធីសម្ពោធដាក់ឱ្យប្រើប្រាស់ស្ថានីយ៍ប្រព្រឹត្តិកម្មទឹកកខ្វក់ជើងឯក នៅភូមិទួលរកា១ សង្កាត់ចាក់អង្រែក្រោម ខណ្ឌមានជ័យក្រោមហិរញ្ញប្បទានសហប្រតិបត្តិការឥតសំណងរបស់រដ្ឋាភិបាលជប៉ុន ក្រោមអធិបតីភាពដ៏ខ្ពង់ខ្ពស់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា នៅព្រឹកថ្ងៃទី២៧ ខែធ្នូ។

ជាមួយនឹងការត្រៀមកម្លាំងដើម្បីរក្សាសន្តិសុខ សណ្តាប់ធ្នាប់ចរាចរ នាថ្ងៃខួប ២៥ឆ្នាំ នៃការបញ្ចប់សង្គ្រាមនៅកម្ពុជា ក្រោមគោលនយោបានឈ្នះឈ្នះថ្ងៃ២៩ ខែធ្នូ (១៩៩៨-២០២៣) នៅវិមានឈ្នះឈ្នះ ក្នុងសង្កាត់ព្រែកតាសេក ខណ្ឌជ្រោយចង្វា ក្រោមអធិបតីភាពសម្ដេចមហាបវរធិបតី ហ៊ុន ម៉ាណែត និងត្រៀមកម្លាំងក្នុង ពិធីបុណ្យចូលឆ្នាំសកល បុណ្យ ៧ មករា រំលឹកខួបទី៤៥ឆ្នាំ នៃការរំដោះប្រទេសជាតិចេញពីរបប ប៉ុល ពត។

ជាមួយគ្នានេះ លោក ឃួង ស្រេង ក៏បានជំរុញឱ្យពង្រឹងលើវិធានការទប់ស្កាត់ក្មេងទំនើងនៅតាមសាលារៀន ដោយខាងសាលាបានភ្ជាប់ប្រព័ន្ធតេឡេក្រាមជាមួយអាជ្ញាធរ និងកងកម្លាំងរួចហើយ។ បន្ថែមពីនេះ ត្រូវដាក់កម្លាំងនៅទីតាំងណាដែលមានហានិភ័យ និងពិនិត្យឡើងវិញចំពោះការផ្តល់សេវាជូនប្រជាពលរដ្ឋ សំដៅធ្វើយ៉ាងណាឱ្យការផ្តល់សេវាតាមច្រកចេញ ចូលតែមួយ កាន់តែល្អប្រសើរ ទទួលបាននូវការពេញចិត្ត ពេញថ្លើមពីប្រជាពលរដ្ឋបន្ថែមទៀត។ ត្រូវចុះពិនិត្យមើលការដ្ឋានសាងសង់នៅក្នុងមូលដ្ឋាន មានច្បាប់អនុញ្ញាត្តិ ឬទេ សំដៅរក្សាសុវត្ថិភាពសំណង់ មិនបង្កហានិភ័យដល់ប្រជាពលរដ្ឋ៕

អត្ថបទ៖ ស្រីរ័ត្ន