ព័ត៌មានជាតិ

ឯកឧត្ដម ហ៊ុន ម៉ានី ៖ អាណត្តិទី ៧ នេះ ជាឱកាសបោះជំហានទៅមុខ ឆ្ពោះកាន់ការធ្វើទំនើបកម្មប្រព័ន្ធរដ្ឋបាលសាធារណៈ

បានផុស

៣ ខែ មុន

នៅ

ថ្ងៃព្រហស្បតិ៍ ៤ មករា ២០២៤

ដោយ

ឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បញ្ជាក់ថា អាណត្តិទី ៧ នេះ ជាឱកាសមួយក្នុងការបោះជំហានទៅមុខ ឆ្ពោះទៅកាន់ការធ្វើទំនើបកម្មប្រព័ន្ធរដ្ឋបាលសាធារណៈទាំងថ្នាក់ជាតិ និងថ្នាក់ក្រោមជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបញ្ជាក់នេះ ក្នុងឱកាស ឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានជួបជាមួយក្រុមការងារកំណែទម្រង់ការគ្រប់គ្រងហិរញ្ញវត្ថុសាធារណៈ ដើម្បីពិនិត្យ និងធ្វើវឌ្ឍនភាពការងារពាក់ព័ន្ធទៅនឹងកំណែទម្រង់ហិរញ្ញវត្ថុរដ្ឋបាលសាធារណៈ កាលពីរសៀលថ្ងៃទី ០៣ ខែមករា ឆ្នាំ ២០២៤។

ឯកឧត្ដម ហ៊ុន ម៉ានី បានគូសបញ្ជាក់ថា «អាណត្តិទី ៧ នេះ ជាឱកាសមួយក្នុងការបោះជំហានទៅមុខ ការកែទម្រង់ជាជំហានៗ ឆ្ពោះទៅកាន់ការធ្វើទំនើបកម្មប្រព័ន្ធរដ្ឋបាលសាធារណៈ ទាំងថ្នាក់ជាតិ ទាំងថ្នាក់ក្រោមជាតិ ដោយរួមចំណែកក្នុងការកសាងខឿនបន្ថែមទៀត សម្រាប់ក្មេងជំនាន់ក្រោយ»។

ជាមួយគ្នានេះ ឯកឧត្ដម ហ៊ុន ម៉ានី បានវាយតម្លៃខ្ពស់ដោយកោតសរសើរលទ្ធផលការងារកន្លងមក និងជំរុញទឹកចិត្តឲ្យក្រុមការងារបន្តអនុវត្តការងារបន្ថែមទៀត ដោយយកចិត្តទុកដាក់ខ្ពស់ក្នុងការអនុវត្តការងារស្នូលរបស់ខ្លួនផង ដឹកនាំនូវការងារកែទម្រង់រដ្ឋបាលសាធារណៈផង ហើយជំរុញការងារគន្លឹះ នៃការងារអាទិភាពផ្សារភ្ជាប់ទៅនឹងការងារកែទម្រង់រដ្ឋបាលសាធារណៈជារួមផងដែរ។

គួរជម្រាបថា ជំនួបនេះ ប្រព្រឹត្តទៅនៅទីស្ដីការក្រសួងមុខងារសាធារណៈ ដោយមានការអញ្ជើញចូលរួមពី ឯកឧត្ដមរដ្ឋលេខាធិការប្រចាំការ ឯកឧត្ដម លោកជំទាវ ជារដ្ឋលេខាធិការ អនុរដ្ឋលេខាធិការ អគ្គនាយក អគ្គលេខាធិការ លោក លោកស្រី ជាប្រធាននាយកដ្ឋាន និងថ្នាក់ដឹកនាំពាក់ព័ន្ធ៕

អត្ថបទ ៖ ពិសី