ពលរដ្ឋរស់នៅតំបន់រមណីយដ្ឋាន ទេសចរណ៍អូរឫស្សីកណ្ដាល ស្នើសុំតបណ្ដាញភ្លើង

ប្រជាពលរដ្ឋជាច្រើនគ្រួសាររស់នៅតាមផ្លូវបេតុងចូលទៅកាន់រមណីយដ្ឋានទេសចរណ៍អូរឬស្សីកណ្ដាល (អូរច្រឡង់) ស្ថិតនៅក្នុងឃុំអូរឬស្សីកណ្ដាល ស្រុកសៀមបូក ខេត្តស្ទឹងត្រែង ពុំទាន់មានបណ្ដាញអគ្គិសនីគ្រប់គ្រាន់ដើម្បីប្រើប្រាស់នៅឡើយទេ។

លោកស្រី សោម សុខលាង ប្រធានសហគមន៍អេកូទេសចរណ៍អូរឫស្សីកណ្ដាលបានរៀបរាប់ឱ្យដឹងថា បច្ចុប្បន្ននៅក្នុងរមណីយដ្ឋាន រួមទាំងប្រជាពលរដ្ឋជាច្រើនគ្រួសារដែលមានផ្ទះក្បែរគ្នាពុំទាន់មានភ្លើងអគ្គិសនីប្រើប្រាស់ដូចប្រជាពលរដ្ឋរស់នៅតាមដងផ្លូវជាតិលេខ៧នៅឡើយទេ។

កន្លងមក ពួកគាត់បានដាក់សំណើទៅអាជ្ញាធរមូលដ្ឋានដើម្បីឲ្យជួយអន្តរាគមន៍ដែរប៉ុន្តែមិនទាន់ចេញជាលទ្ធផលទាល់តែសោះ។ រឿងនេះប្រជាពលរដ្ឋក៏ធ្លាប់បានលើកឡើងនៅក្នុងវេទិកាសាធារណៈផងដែរនិយាយពីការស្នើសុំឲ្យមានតបបណ្ដាញភ្លើងប្រើប្រាស់ ពីព្រោះប្រជាពលរដ្ឋរាល់ថ្ងៃនេះប្រើភ្លើងប្រព័ន្ធពន្លឺព្រះអាទិត្យចាប់អាគុយទៅតាមលទ្ធភាពជាបណ្ដោះអាសន្ន។

លោកស្រីបាននិយាយទៀតថា រមណីយដ្ឋានអូរឫស្សីកណ្តាលទាំងមូលនៅមិនទាន់មានភ្លើង ពេលភ្ញៀវមកម្ដងៗ ក៏ត្រូវការបញ្ចូលទូរសព្ទ ឬចាក់ឧបករណ៍បំពងសំឡេងធុងបាសជាដើម ដើម្បីកម្សាន្តវានៅតែបង្កផលលំបាកដល់ភ្ញៀវអត់មានភ្លើងប្រើ បើនិយាយពីចម្ងាយពីរមណីយដ្ឋានទៅផ្លូវជាតិមិនឆ្ងាយប៉ុន្មានទេ បើមានភ្លើងប្រើវាល្អសម្រាប់ប្រជាពលរដ្ឋហើយ​ភ្ញៀវទេសចរក៏សប្បាយចិត្តដែរ។

លោក យិន ម៉ៅ មេឃុំអូរឫស្សីកណ្ដាលបាននិយាយឲ្យដឹង នៅព្រឹកថ្ងៃទី ០៩ ខែមករា ឆ្នាំ ២០២៤ថា ប្រជាពលរដ្ឋជាង១០ គ្រួសាររស់នៅតាមដងផ្លូវចូលទៅតំបន់ទេសចរណ៍ពុំមានភ្លើងអគ្គិសនីប្រាកដមែន ប្រជាពលរដ្ឋនៅតំបន់នោះបាន​ដាក់សំណើសុំជាច្រើនដងរួចទៅហើយរហូតលើកមតិដោយផ្ទាល់នៅក្នុងវេទិកាសាធារណៈក៏នៅមិនទាន់បានទៀត។ខាងអគ្គិសនីសន្យាថា នឹងតឱ្យប្រើប្រាស់ប៉ុន្តែមិនទាន់ឃើញ។

លោកមេឃុំបាននិយាយមិនរំពឹងថា ខាងអគ្គិសនីនឹងតបបណ្ដាញភ្លើងឲ្យបានឆាប់ឡើយពីព្រោះប្រជាពលរដ្ឋនៅមានចំនួនតិចតួចហើយការចំណាយតបណ្ដាញភ្លើងលើសពីចំណូល។

រីឯលោក ស៊ា ប៉ាច ប្រធានអគ្គិសនីកម្ពុជាសាខាខេត្តស្ទឹងត្រែងបាននិយាយប្រាប់អ្នកយកព័ត៌មានថា តំបន់នោះស្ថិតនៅក្រោមការផ្គត់ផ្គង់ចែកចាយរបស់សេវាករឯកជន អូរពងមាន់ មិនស្ថិតក្រោមអគ្គិសនីស្ទឹងត្រែងនេះទេ៕

អត្ថបទ៖ ងិនលីម