អគ្គនាយកស៊ីម៉ាក់ សំណូមពរបង្កើតច្បាប់ ហាមបរិភោគសាច់សុនខ

លោក ហេង រតនា ប្រតិភូ​រាជរដ្ឋាភិបាល ទទួល​បន្ទុក​ជា អគ្គនាយក​ស៊ីម៉ាក់ សំណូមពរឱ្យបង្កើតច្បាប់ ហាមការបរិភោគសាច់សុនខ (សាច់ឆ្កែ) ព្រមទាំងដាក់ទោសទៅលើជនល្មើស។

ទន្ទឹមពេលប្រទេសកូរ៉េដែលមានវប្បធម៌បរិភោគសាច់សុនខ តែបានចេញច្បាប់ហាមបរិភោគសុនខវិញ ខណៈកម្ពុជាមិនមានប្រពៃណីបរិភោគសាច់សុនខ ប៉ុន្តែនៅតែមានការបរិភោគសាច់សុនខនោះ លោក ហេង រតនា បង្ហោះសារលើបណ្ដាញសង្គមហ្វេសប៊ុក ជាសាធារណៈ នៅថ្ងៃនេះ ថា លោកយល់ថា ខ្មែរអាចធ្វេីបាន​ ទន្ទឹមពេលកម្ពុជាក៏មានច្បាប់គ្រប់គ្រងសត្វ និងចំណីអាហារមួយចំនួនដែលក្រសួងស្ថាប័នពាក់ព័ន្ធអាចយកមកអនុវត្តហាមឃាត់បាន​។ ទន្ទឹងនឹងនេះ​ លោកសូមសំណូមពរចលនាកសាងច្បាប់មួយនៅកម្ពុជានេះ​ ដេីម្បីហាមឃាត់ការបរិភោគសាច់សុនខ និងដាក់ទោសចំពោះជនល្មេីសតាមច្បាប់តែម្តង។

លោក ហេង រតនា បានអបអរសាទរចំពោះប្រទេសកូរ៉េខាងត្បូង ដែលបានសម្រេចដាក់ច្បាប់ហាមឃាត់ការបរិភោគសាច់សុនខ កាលពីថ្ងៃទី៩​ ខែមករា​ ឆ្នាំ២០២៤នេះ។ ច្បាប់ហាមឃាត់បរិភោគសាច់សុនខនេះ​ អាចពិន័យជនល្មេីសជាង ២២ ពាន់ដុល្លារ ឬជាប់គុក ៣ឆ្នាំ។ តាមរយៈព័ត៌មានអន្តរជាតិនានា លោកបានឱ្យដឹងថា នៅកូរ៉េខាងត្បូង មានអាជីវកម្មចិញ្ចឹមសុនខលក់សាច់ជាង ៣ ៥០០ កន្លែង​ និងហាងលក់សាច់សនខចំនួនជាង ៣ ០០០ កន្លែង​ មានសុនខចំនួនប្រមាណជាង ១,៥ លានក្បាល។ ប្រពៃណីកូរ៉េការបរិភោគសាច់សុនខបានចាក់ឫសជ្រៅតាំងពីសម័យបុរាណមកម៉្លេះ​ តែកូរ៉េខាងត្បូងនៅតែកែប្រែបាន។

លោក ហេង រតនា បានលើកឡើងបន្តថា ក្រឡេកមកមេីលកម្ពុជាយេីងវិញ​ មានប្រពៃណីទំនៀមទម្លាប់ថ្លៃថ្លូ​រ មិនបរិភោគសាច់សុនខនេះតាំងពីបុរាណកាលមកម៉េះ​ ប៉ុន្តែបច្ចុប្បន្ននេះ​ មានអ្នកបរិភោគសាច់សុនខកាន់តែច្រេីនឡេីងៗ ជាពិសេសក្នុងចំណោមយុវជន​។

យោងតាមឯកសារស្រាវជ្រាវបានឱ្យដឹងថា​ មានការសម្លាប់សុនខយកសាច់មានប្រមាណ ២ ទៅ ៣ លានក្បាលក្នុងមួយឆ្នាំៗ​ ហេីយកន្លែងសុនខឃាតសុទ្ធតែគ្មានច្បាប់អនុញ្ញាតិឡេីយ​ ដូចនេះការបរិភោគសាច់សុនខអាចប្រឈមនឹងគ្រោះថ្នាក់សុខភាពសាធារណៈផងដែរ។​

លោក ហេង រតនា បញ្ជាក់បន្ថែមថា ប៉ុន្តែអ្វីកាន់គ្រោះថ្នាក់ថែមទៀតនោះគឺ ប្រពៃណីទំនៀមទម្លាប់ដ៏ផូរផង់របស់ដូនតាខ្មែរត្រូវបានបំផ្លាញ​ ធ្វេីឱ្យប៉ះពាល់ធ្ងន់ធ្ងរដល់សីលធម៌សង្គម​ និងភ្លៀវទេសចរណ៍អន្តរជាតិមួយចំនួនមិនចង់មកទស្សនាកម្ពុជាដោយសារទិដ្ឋភាពអវិជ្ជមាន នៃការធ្វើអាជីវកម្មសម្លាប់សត្វសុនខធ្វេីអាហារនេះ។

គួរបញ្ជាក់ថា សត្វសុនខ ឬឆ្កែ មិនត្រឹមជួយយាមផ្ទះ ហើយជាសត្វភក្ដីចំពោះម្ចាស់ខ្លាំងប៉ុណ្ណោះទេ សត្វសុនខ ក៏ជា​កម្លាំង​សំខាន់​មួយ​នៅ​ក្នុង​ការ​រុករក​កាក​សំណល់​សង្គ្រាម ឬ​មីន​កប់​ក្នុង​ដីនៅកម្ពុជាផងដែរ​។ នៅ​មជ្ឈមណ្ឌល​កំចាត់​មីន​កម្ពុជា ​ហៅ​កាត់ CMAC មាន​ឆ្កែ​ជា​ច្រើន​ក្បាល​បាន​ចូលរួម​បេសកកម្ម​នេះ ហើយ​​មាន​សុនខមិន​តិច​​ទេ ដែល​បាន​បាត់បង់​ជីវិត​នៅ​ក្នុង​បេសកកម្ម​ដ៏​គ្រោះថ្នាក់​នោះ​។ សុនខ​ដែល​បាត់​បង់ជីវិត​ក្នុង​បេសកកម្ម​ដោះ​មីន ត្រូវ​បាន​គេ​កប់ និង​លើក​ស្លាក​ឈ្មោះ​មុខ​ផ្នូរ​ទៀត​ផង ដែល​​គុណ​បំណាច់​របស់​ឆ្កែ​នៅ​ក្នុង​បេសកកម្ម​សម្អាត​មីន​មិន​ចាញ់​មនុស្ស​ឡើយ​៕