ក្រសួងអប់រំ ណែនាំឱ្យបង្កើត គណៈកម្មការគ្រប់គ្រងគ្រឹះស្ថានមធ្យមសិក្សាសាធារណៈ

ក្រសួងអប់រំ យុវជន និងកីឡា ណែនាំ ឱ្យគ្រឹះស្ថានមធ្យមសិក្សាសាធារណៈនីមួយៗត្រូវរៀបចំឱ្យមានគណៈកម្មការគ្រប់គ្រងសាលារៀន។ តាមសេចក្តីណែនាំ របស់ ក្រសួងអប់រំ យុវជន និងកីឡា ចុះថ្ងៃទី៨ ខែកុម្ភៈ ឆ្នាំ២០២៤ ស្តីពី ការបង្កើត និងដំណើរការគណៈកម្មការគ្រប់គ្រងគ្រឹះស្ថានមធ្យមសិក្សាសាធារណៈ បានលើកឡើងថា ការគ្រប់គ្រងតាមសាលារៀនជាយុទ្ធសាស្ត្រមួយ នៅក្នុងកម្មវិធីកំណែទម្រង់វិស័យអប់រំ ព្រមទាំងឆ្លើយតបទៅនឹងកំណែទម្រង់ការគ្រប់គ្រងហិរញ្ញវត្ថុសាធារណៈក្នុងវិស័យអប់រំ។

ការរៀបចំបង្កើតគណៈកម្មការ គ្រប់គ្រងគ្រឹះស្ថានមធ្យមសិក្សាសាធារណៈជាកិច្ចការសំខាន់ និងចាំបាច់សំដៅសហការជាមួយគណៈគ្រប់គ្រង សាលារៀន ក្នុងការដឹកនាំ គ្រប់គ្រងសាលារៀនប្រកបដោយតម្លាភាព គណនេយ្យភាព មានស្វ័យភាព និង ប្រសិទ្ធភាព។ ដូច្នេះគ្រឹះស្ថានមធ្យមសិក្សាសាធារណៈនីមួយៗត្រូវរៀបចំឱ្យមានគណៈកម្មការគ្រប់គ្រងសាលារៀនមួយ ដែលជារចនាសម្ព័ន្ធផ្លូវការ មានសមាសភាព តួនាទី ភារកិច្ច និងការទទួលខុសត្រូវ។

គណៈកម្មការគ្រប់គ្រងសាលារៀនត្រូវរៀបចំការប្រជុំប្រចាំត្រីមាស ៤ដងក្នុងមួយឆ្នាំសិក្សា។ ការប្រជុំ ជាសកម្មភាពពិនិត្យតាមដាន របស់គណៈកម្មការគ្រប់គ្រងសាលារៀន អំពីលទ្ធផលនៃការអនុវត្ត ផែនការ ប្រតិបត្តិប្រចាំឆ្នាំរបស់សាលារៀន គណៈគ្រប់គ្រងសាលារៀន គ្រូបង្រៀន និងអ្នកពាក់ព័ន្ធ។ គណៈគ្រប់គ្រងសាលារៀន អាចរៀបចំការប្រជុំវិសាមញ្ញករណីស្ថានភាពជាក់ស្តែងនៃមូលដ្ឋានមានតម្រូវការ។

ព័ត៌មានលម្អិត៖