ទេសចរចូលកម្សាន្ត ខេត្តរតនគិរី កើនឡើងជាង ៩៤% ក្នុងឱកាស ចូលឆ្នាំចិន-វៀតណាម

លោក ង៉ែត ពិទូ ប្រធានមន្ទីរទេសចរណ៍ខេត្ត បានឱ្យ “កម្ពុជាថ្មី” ដឹងថា រយៈពេល ៣ថ្ងៃ ពីថ្ងៃទី៩ ដល់ទី១១ ខែកុម្ភៈ ឆ្នាំ២០២៤ នៃពិធីបុណ្យចូលឆ្មាំចិន-វៀតណាម នេះ ខេត្តរតនគិរីទទួលបានភ្ញៀវទេសចរសរុបមានចំនួន ៨ ២៨៣ នាក់ មានការកើនឡើង ៩៤,៦៧% បើប្រៀបធៀបឆ្នាំមុន។

លោកប្រធានបានបញ្ជាក់ទៀតថា ក្នុងនោះភ្ញៀវទេសចរមានចំនួន ៨ ១៥០ នាក់ មានការកើនឡើង ៩៧,៥៨% ចំណែក ភ្ញៀវអន្តរជាតិ មានចំនួន ១៣៣ នាក់ មានការកើនឡើង  ២,៣១%។ អំឡុងពេល ៣ថ្ងៃនេះ សេវាកម្មស្នាក់នៅ សេវាកម្មម្ហូបអាហារ និងសេវាកម្មដឹកជញ្ជូនភ្ញៀវ ពុំមានការតំឡើងថ្លៃគួរឱ្យកត់សម្គាល់ឡើយ។

លោក ង៉ែត ពិទូ បានឱ្យដឹងបន្ថែមថា ក្រោមការដឹកនាំរៀបចំដោយ លោក ញ៉ែម សំអឿន អភិបាល នៃគណៈខេត្តរតនគីរី បានយកចិត្តទុកដាក់ខ្ពស់ក្នុងការរៀបចំឱ្យមានសោភ័ណភាពទីប្រជុំជន ទីក្រុង និងតាមបណ្ដាក្រុងស្រុកទាំងអស់ក្នុងខេត្តរតនគិរី។ ដោយមានការរៀបចំភ្លើងបំភ្លឺទីសាធារណៈ តាមបណ្តាអង្គភាពរបស់រដ្ឋ និងវិស័យឯកជន ដើម្បើលើកស្ទួយ សោភ័ណភាពទីក្រុង ក្នុងការផ្តល់សេវាកម្មជូនប្រជាពលរដ្ឋក្នុងខេត្ត ក៏ដូចភ្ញៀវទេសចរជាតិនិងអន្តរជាតិ ដែលបានមកទស្សនាខេត្តរតនគិរី៕

អត្ថបទ៖ វុទ្ធឦសាន