Connect with us

ព័ត៌មានជាតិ

កម្ពុជាទទួលបានចំណូលជាង ១២១ លានដុល្លារ ពីការនាំចេញកៅស៊ូនៅខែដំបូងឆ្នាំនេះ​

បានផុស

នៅ

កម្ពុជាទទួលបានប្រាក់ចំណូលជាង ១២១ លានដុល្លារ (១២១.១៩៧.០០០) ពីការនាំចេញកៅស៊ូ និងផលិតផលធ្វើពីកៅស៊ូនៅក្នុងរយៈពេល១ ខែមករា ឆ្នាំ ២០២៤ ចំនួនេះកើនឡើង ១២៣.៥% បើធៀបរយៈពេលដូចគ្នាឆ្នាំ​ ២០២៣។ នេះបើតាមរបាយការណ៍របស់អគ្គនាយកដ្ឋានគយ និងរដ្ឋាករ​កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​ប្រធាន​សមាគម​អភិវឌ្ឍន៍​កៅស៊ូ​កម្ពុជា​លោក ម៉ែន សុភ​ក្ដិ បានប្រាប់កម្ពុជាថ្មី ​នៅថ្ងៃទី ១២ ខែកុម្ភ ឆ្នាំ ២០២៤ នេះថា ​តម្លៃកៅស៊ូបច្ចុប្បន្នលក់បានជាង ១.៤០០ ដុល្លារក្នុង១ តោន ​ដែលលោកអះអាងថា ការនាំចេញមានដំណើរការល្អ ខណៈ​កំណើននាំចេញកៅស៊ូកើនឡើង ​ដោយសារផ្ទៃដីពេញវ័យ​របស់កៅស៊ូឱ្យផលកើនឡើង​ដែល​មាន​ការបើកជៀជ័រច្រើន ​ទើបធ្វើឱ្យបរិមាណផលិត​ផលក៏កើន​ឡើងដែរ។

​លោក អោក សាវឿន ​កសិករដាំកៅស៊ូ ៥ ហិកតា នៅភូមិមាឃ ឃុំព្រែកកក់ ស្រុកស្ទឹងត្រង់ ខេត្តកំពង់ចាម បានឱ្យដឹងថា តម្លៃជ័រកៅស៊ូលោកលក់បាន ២ ១០០ រៀល ក្នុង១គីឡូ (០១ថ្ងៃថ្លឹង) ខណៈ១ យប់បាន ២.២០០។

លោកប្រាប់ថា តម្លៃនៅឆ្នាំនេះ មានភាពនឹងនរល្អ មិនដូចឆ្នាំមុនៗ ឡើងចុះគ្រប់ពេលវេលាដែល​ពេលខ្លះលក់បានតែ ១.៨០០ រៀល ក្នុង១ គីឡូ (០១ថ្ងៃថ្លឹង)។

​ទោះជាយ៉ាងណា លោកបញ្ជាក់ថា តម្លៃនេះ សម្រាប់រូបលោក គឺអាចទប់ទល់បាន ប៉ុន្តែមិនអាចឱ្យ​ចំណេញ​ច្រើននោះ​ទេ ដោយសារលោកត្រូវចំណាយទៅលើការទិញជី ថ្នាំ និងកម្លាំង​ពលកម្ម​ផ្សេងៗ។

យោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ ទំហំផ្ទៃដីដាំកៅស៊ូក្នុងឆ្នាំ ២០២៣ សរុបជាង ៤០ ម៉ឺនហិកតា។

របាយការណ៍របស់​អគ្គនាយកដ្ឋានគយ និងរដ្ឋាករ​កម្ពុជាបង្ហាញថា នៅក្នុងឆ្នាំ ២០២៣ ការនាំចេញ​កៅស៊ូ និងផលិត​ផល​ធ្វើពីកៅស៊ូទទួលបានទឹកប្រាក់ជាង ៩១៨ លានដុល្លារ (៩១៨ ៨៩៥ ០០០) កើនឡើងជិត ៧០ ភាគរយ ធៀបនឹងឆ្នាំ ២០២២៕​

អត្ថបទ៖ ឡេង ដេត

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម