ឆ្លងចរន្តអគ្គិសនី អេស្ការមួយគ្រឿងឆេះស្ទើរខ្ទេចទាំងស្រុង ខេត្តបាត់ដំបង

ក្នុងពេលកំពុងកាយដីស្រែ អេស្ការមួយគ្រឿង ត្រូវបានអណ្តាតភ្លើងឆាបឆេះយ៉ាងសន្ធោសន្ធៅ នៅកណ្តាលវាលស្រែ។   

ហេតុការណ៍ដ៏គួរភ្ញាក់ផ្អើលនេះ បានកើតឡើង  នៅថ្ងៃទី ១៩ ខែមីនា ឆ្នាំ ២០២៤ វេលាម៉ោងប្រមាណ ២ រសៀល  នៅត្រង់ចំណុចដីស្រែ ក្នុងភូមិបឹងរាំង សង្កាត់អូរម៉ាល់ ក្រុងបាត់ដំបង។   

អ្នកបើកបរជាជនរងគ្រោះ មានឈ្មោះ រ៉េត សារ៉ូន ភេទ ប្រុស អាយុ ៣៥  ឆ្នាំ មានទីលំនៅ ភូមិកើតហេតុបានរៀបរាប់ថា ការឆាបឆេះនេះ គឺខណ:ពេលដែលលោកកំពុងបញ្ជាកាយដី ស្រាប់តែឮសម្លេងផ្ទុះបន្តិចក៏មានអណ្តាតភ្លើងឆេះឡើងតែម្តង ទើបលោកទៅទាញបំពង់ពន្លត់អគ្គីភ័យមកបាញតែជួយមិនបានឡើយដោយសារភ្លើងឆេះខ្លាំងពេក។

ក្រោយពេលកម្លាំងសមត្ថកិច្ចចុះពិនិត្យគឺសង្គេតឃើញថា មូលហេតុ គឺឆ្លងប្រព័ន្ធភ្លើង នៅពេលកំពុងបើកកាយពង្រាបដីស្រែ។ ក្នុងហេតុការណ៍គ្រោះថ្នាក់អគ្គិភ័យនេះ  មិនបង្កគ្រោះថ្នាក់ដល់មនុស្ស ឬសត្វឡើយ៕

អត្ថបទ : សោ និយមរ័ត្ន