កម្ពុជាកំពុងតាមដានស្ថានភាពគុណភាពទឹកទន្លេមេគង្គ​ បន្ទាប់ពីឧបទ្ទវហេតុក្រឡាប់រថយន្ត​ដឹក​អាស៊ីត ៣០ តោន លេចធ្លាយចូលទន្លេ នៅឡាវ

ក្រសួងបរិស្ថានបានចាត់ក្រុមការងារជំនាញចុះត្រួតពិនិត្យស្ថានភាពគុណភាពទឹកទន្លេមេគង្គនៅតាមតំបន់ ព្រំដែនជាប់ប្រទេសឡាវ និងយកសំណាកទឹកមកធ្វើការវិភាគតាមដានជាប្រចាំ និងបាន​ចាត់មន្ត្រីនៅប្រចាំការ តាមដានស្ថានភាពគុណភាពទឹកនៅទន្លេមេគង្គ ពិសេសនៅតំបន់រ៉ាមសារ​ក្នុងខេត្តស្ទឹងត្រែង។

ចំណាត់ការនេះ កើតមានឡើង ​បន្ទាប់ពីឧបទ្ទវហេតុក្រឡាប់រថយន្តដឹកអាស៊ីតស៊ុលហ្វូរិច (Sulfuric Acid) នៅភូមិភូសាងខាំ ក្នុងខេត្តហ្លួងប្រាបាង ប្រទេសឡាវ កាលពីថ្ងៃទី ០៣ ខែមេសា ដែល​បណ្តាល​ឱ្យមាន​ការលេចធ្លាយ​អាស៊ីតស៊ុលហ្វូរិច ប្រមាណជា ៣០ តោន ធ្លាក់ចូលស្ទឹងណាមខាន់ ដែលស្ទឹងនេះ ហូរចូល​ទន្លេ មេគង្គ​ត្រង់ចំណុចទីក្រុងហ្លួងប្រាបាង ហើយមានចម្ងាយប្រមាណ ១.៣៧០ គីឡូម៉ែត្រ ពីព្រំ ប្រទល់កម្ពុជា-ឡាវ។

សេចក្ដីប្រកាសព័ត៌មានរបស់ក្រសួងបរិស្ថាន​ចេញផ្សាយនៅថ្ងៃទី ០៩ ខែមេសា ឆ្នាំ ២០២៤ នេះ លើកឡើង​ថា៖ «ក្រសួង​បរិស្ថានបានធ្វើការយកចិត្តទុកដាក់ក្នុងអាទិភាពខ្ពស់ ដោយ​បានចាត់ក្រុម​ការងារជំនាញចុះទៅធ្វើការត្រួតពិនិត្យស្ថានភាពគុណភាពទឹកទន្លេមេគង្គនៅតាមតំបន់ ព្រំដែនជាប់​ប្រទេសឡាវ និងយកសំណាកទឹកមកធ្វើការវិភាគតាមដានជាប្រចាំ»។

​ទន្ទឹមនឹងនេះដែរ ក្រសួងបានសហការជាមួយក្រសួង ស្ថាប័នពាក់ព័ន្ធតាមយន្តការ​ដែលមានស្រាប់​រវាង ប្រទេសទាំងពីរ តាមរយៈគណៈកម្មាធិការជាតិទន្លេមេគង្គកម្ពុជា ដើម្បីតាមដាន និងផ្លាស់ប្តូរ​ព័ត៌មាន​ពាក់ព័ន្ធ នឹងករណីខាងលើនេះ និងធ្វើការជូនដំណឹងជា​សាធារណៈចំពោះ​ការវិវត្តណាមួយ​ពីស្ថានភាពគុណភាពទឹក ទន្លេមេគង្គជាបន្តទៀត៕

អត្ថបទ៖ ឡេង ដេត