ព្រែកជីកហ្វូណនតេជោ អាចនឹងបើកការដ្ឋានសាងសង់នៅចុងឆ្នាំនេះ ឬយ៉ាងយូរដើមឆ្នាំ២០២៥

សម្ដេចមហាបវរធិបតី ហ៊ុន​ ម៉ាណែត បានបញ្ជាក់នៅព្រឹកថ្ងៃអាទិត្យ នេះ ថា គម្រោងព្រែកជីកហ្វូណនតេជោ អាចនឹងបើកការដ្ឋានសាងសង់ជាផ្លូវការនៅចុងឆ្នាំ២០២៤ នេះ​ ឬយ៉ាងយូរបំផុតនៅឆ្នាំ២០២៥។ សម្ដេចបានព្រលយបែបនេះ ក្នុងឱកាសសំណេះសំណាលជាមួយសមាគម សហជីព កម្មករសេដ្ឋកិច្ចក្រៅប្រពន្ធ័ និង សមាគមន៍បុគ្គលិកសិក្សា អបអរសាទរខួបលើកទី១៣៨ទិវាពលកម្មអន្តរជាតិនៅជ្រោយចង្វា នាព្រឹកថ្ងៃទី២៨ ខែមេសា ឆ្នាំ២០២៤។

សម្ដេចធិបតី ហ៊ុន ម៉ាណែត បានរំឮកថយក្រោយថា​ កាលពីអំឡុងដំណើរទស្សនកិច្ចផ្លូវការរបស់សម្ដេចទៅកាន់ប្រទេស នៅខែតុលា ឆ្នាំ២០២៣ កន្លងទៅ កម្ពុជាបានចុះហត្ថលេខាជាមួយក្រុមហ៊ុនចិនលើកិច្ចព្រមព្រៀងដើម្បីគម្រោងព្រែកជីកមួយនេះម្ដងរួចហើយ។

ជាមួយគ្នានេះ សម្ដេចនាយករដ្ឋមន្ត្រីក៏បានបង្ហើបឱ្យដឹងថា កម្ពុជា នឹងចុះហត្ថលេខាជាមួយក្រុមហ៊ុនម្ដងទៀត នៅរយៈពេលប៉ុន្មានខែឆាប់ៗខាងមុខនេះ ពោលគឺនៅអំឡុងខែកក្កដា ខែសីហា ឬខែកញ្ញា។

គួរជម្រាបជូនថា នៅទូទាំងនគរ រាប់ទាំងសម្ដេចតេជោ ស្ថាប័នកំពូលរបស់ជាតិ មន្ត្រីជាន់ខ្ពស់នៃរាជរដ្ឋាភិបាលកម្ពុជាអ្នកជំនួញ និស្សិត យុវជន និងពលរដ្ឋខ្មែរ នៅទូទាំងនគរបានចេញមកគាំទ្រចំពោះគម្រោងព្រែកជីកហ្វូណនតេជោ ប្រៀបបាននឹងគ្រាប់ទឹកភ្លៀងធ្លាក់រាប់សិបគ្រាប់ក្នុងពេលតែមួយ ដែលសម្ដេចធិបតី បានចាត់ទុកថា រូបភាពបែបនេះ ជាកម្លាំងជាតិនិយមដ៏ធំធេង មានតម្លៃជាងលុយ១០ពាន់លានដុល្លារ៕