មួយថ្ងៃ​ដើរ​ជាង ៣០ គីឡូម៉ែត្រ សំលៀងកាំបិតក្លែមធុងបាសរកចំណូលផ្គត់ផ្គង់គ្រួសារ

ជារៀងរាល់ថ្ងៃបុរសវ័យកណ្តាលម្នាក់ ស្លៀកពាក់ប្លែកពីគេអាវដៃវែងក្រៅ និងអាវយឺតខាងក្នុងស្លៀកខោ​បាត់ជើង​ធំ​និងមាន​រូបបេះដូងនៅកំប៉េះគូទ និងបង់កកន្សែង​ចាកចេញពីផ្ទះជួលមួយកន្លែងនៅ​ម្តុំផ្សារព្រៃទាក្នុង​សង្កាត់ចោមចៅ​៣ ខណ្ឌពោធិ៍សែនជ័យ ជាមួយនឹងធុងបាសមួយគូនិងឧបករណ៍សំលៀងកាំបិតមានទឹកនិងសាប៊ូអូសតាម​ដងផ្លូវនានាដើរសំលៀង​កាំបិតតាមភូមិ ដើម្បីរកប្រាក់ចិញ្ចឹមជីវិតប្រចាំថ្ងៃ។

បុរសម្នាក់នោះត្រូវបានគេស្គាល់ថា ឈ្មោះ ធារី មានអាយុ ៤៥ ឆ្នាំមកពីខេត្តស្វាយរៀងបាន​ប្រកបមុខរបសំលៀងកាំបិតនេះរយៈពេល ២០ ឆ្នាំមកហើយ ដោយពីដំបូងមកភ្នំពេញធ្វើការសំណង់ទេ ដោយសាររកលុយមិនសូវបាន ហើយពិបាក​បើក​លុយធ្វើការក៏បានសម្រេចចិត្តប្តូរមកប្រកបមុខរបររដើរសំលៀងកាំបិត​តាមភូមិវិញ។

ពីដំបូងឡើយលោកដើរតាមផ្ទះប្រជាពលរដ្ឋគ្រប់ច្រកល្ហក ដើម្បីសួរអ្នកភូមិដែលត្រូវការសំលៀងកាំបិត។ បន្ទាប់មកទៀតបាន​ថតសំលេងដាក់កូនមេក្រូស្រែកតាមផ្លូវបាន ១ ទៅ ២ ឆ្នាំ បានដូរប្រើកូនធុងបាសស្ពានពីក្រោយ ក៏បានដូរទៅ​ធុង​បាស​ធំទម្ងង់ ៣០ ទៅ ៤០ គីឡូតម្លៃជាង ១០០ ដុល្លារ ដើម្បីឱ្យបានឮជាងមុនឱ្យអ្នកចង់សំលៀងកាំបិតបានដឹងតត្រៀមសំលៀង។

ក្រោយមកទៀតលោកក៏បានប្តូរទិញធុងបាសធំអូសវិញតម្លៃ ៥៥០ ដុល្លារ ដើម្បីទាក់ទាញអ្នកសំលៀងកាំបិតចង់ស្តាប់​ចម្រៀងហើយបើគេកម៉្មង់ច្រៀង លោកក៏ច្រៀងដែរតែត្រូវថែមលុយទៅតាមសន្តានចិត្តជ្រះថ្លា ដោយមិនមានការកំណត់នោះទេ។

ក្រៅពីចាក់កំដរសំលៀងកំបិត លោកក៏ជួលសម្រាប់ពិធីជប់លៀងឬខួបកំណើតលក្ខណៈគ្រួសារឬកន្លែងផឹកស៊ី​តាមផ្ទះដោយ ១ ម៉ោងតម្លៃ ១៥ ០០០ រៀលនិង ១ ថ្ងៃ ១០ ម៉ឺនរៀល ខណៈពិធីបុណ្យចូលឆ្នាំកន្លងទៅលោករកចំណូលបាន​១៥ ម៉ឺនរៀលផងដែរ។

លោក ឈ្មោះ ធារី បាន​បញ្ជាក់ថា ក្រៅពីដាក់ធុងបាស លោកក៏មានគំនិតធ្វើអ្វីផ្សេងៗដើម្បីទាក់ទាញអ្នកសំលៀងកាំបិតដោយ​​បានកាត់ខោប្លែកពីគេមានជើងធំ និងមានរូបបេះដូងនៅពីក្រោយដូចនាយក្រឹម និងនាយកុយ ធ្វើឱ្យអ្នកភូមិចាប់អារម្មណ៍។ មុខ​របរ​សម្រាប់​ចិញ្ចឹម​ជីវិតនេះ​ពោលក្នុង ១ ថ្ងៃ លោកអាចរកចំណូលបានជាមធ្យមពី ៣ ទៅ ៤ ម៉ឺនរៀល ហើយការប្រកបមុខរបរសំលៀងកាំបិត​នេះ លោកមិនដែលមានជំងឺអ្វីធ្ងន់ធ្ងរនោះទេព្រោះក្នុង ១ ថ្ងៃលោកបានដើរពី ៣០ ទៅ ៤០ គីឡូ ដែល​បានជួយលោកមានសុខភាពល្អហូបបាយបានសម្រាន្តលក់ស្រួល ចៀសវាងនូវជំងឺដង្កាត់ផ្សេងៗ។

លោកបានបន្ថែមថា ការដើរសំលៀងកាំបិតបើនៅរដូវប្រាំងរកចំណូលបានច្រើនជាងនៅរដូវវស្សា មានភ្លៀងធ្លាក់តែលោកនៅតែតស៊ូមិនរាថយដែរដើម្បីគ្រួសារ។

នៅពេលសួរថា តើលោមានបំណងចង់ផ្លាស់ប្តូរអាជីពនេះទេ លោក​បាននិយាយថា «ជាធម្មតាការប្រកបមុខរបរយូរឆ្នាំដូចជា​ដើរ​សំលៀងកំាបិតនេះក៏មានការធុញទ្រាន់ដែរ ហើយក៏ចង់ឈប់សម្រាកដែរតែមិនដឹងរកការងារអី​មកជំនួសព្រោះ​វា​ជួយផ្គតើផ្គង់គ្រួសារបានល្អប្រសើរដែរ។ អីចឹងចេះតែស៊ូទ្រាំទៅទម្រាំដល់ថ្ងៃណាដែលធ្វើមិនកើតចាំគិតទៀត»។

ទោះបីជាលោកជោគជ័យនឹងការងារប្រចាំថ្ងៃប៉ុន្តែចំពោះជីវិតគូវិញលោកបានបរាជ័យដោយប្រពន្ធមុនលោកបានលះលែងគ្នាដោយបន្សល់ទុកនូវកូន ៣ នាក់ហើយលោកក៏យកប្រពន្ធក្រោយមួយទៀតតែមិនមានកូនទេ៕

អត្ថបទ៖ សំអឿន