ក្រសួងអប់រំ មិនតម្រូវឱ្យសិស្សថ្នាក់ទី ៦ ប្រឡង​ចូលអនុវិទ្យាល័យដូចថ្នាក់ទី ៩ នោះទេ

លោកស្រី ឃួន វិច្ឆិកា អ្នកនាំពាក្យក្រសួងអប់រំយុវជននិងកីឡាបានអះអាងថា ក្រសួងអប់រំមិនតម្រូវឱ្យសិស្សថ្នាក់ទី ៦ ចូលអនុវិទ្យាល័យប្រឡងដូចថ្នាក់ទី ៩ នោះទេ ប៉ុន្តែក្រសួងអនុញ្ញាតឱ្យសិស្សណាដែលមានពិន្ទុមធ្យមភាគក្រោមប្រាំធ្វើតេស្តនៅចុងឆ្នាំ​ដើម្បីផ្តល់ឱកាសឱ្យសិស្សទាំងនោះបានឡើងថ្នាក់ទី ៧។

ការអះអាងរបស់អ្នកនាំពាក្យធ្វើឡើង​ បន្ទាប់ពីមានអាណាព្យាបាលសិស្សមួយចំនួនមាន​ការភ័ន្តច្រឡំការ​ធ្វើតេស្តចុង​ឆ្នាំចូលអនុវិទ្យាល័យទៅនឹងការប្រឡងថ្នាក់ទី ៩ ឬឌីប្លូម។

លោកស្រីបានមានប្រសាសន៍នៅព្រឹកថ្ងៃទី ១៤ ឧសភានេះថា សិស្សថ្នាក់ទី ៦ មិនតម្រូវឱ្យប្រឡងដូចថ្នាក់ទី៩ទេ។ សាលារៀន​រៀបចំការប្រឡងឆមាសទី១ និងទី២ ដូចធម្មតា ហើយបូកសរុបលទ្ធផល។ បើបានពិន្ទុមធ្យមភាគប្រចាំឆ្នាំចាប់ពី ៥,០០ ឡើងទៅ គឺអនុញ្ញាតឱ្យឡើងថ្នាក់ទី ៧ បើក្រោមមធ្យមភាគ គឺអនុញ្ញាតឱ្យមានការធ្វើតេស្តចុងឆ្នាំ។ បើនៅតែធ្លាក់ទៀត​ ត្រូវរៀនត្រួតថ្នាក់។

លោកស្រីបានពន្យល់បន្ថែមថា «ការធ្វើតេស្តចុងឆ្នាំសម្រាប់សិស្សទី ៦ ក្នុងការឡើងចូលអនុវិទ្យាល័យនេះគឺ​អនុវត្តសម្រាប់​​សិស្សដែលមានពិន្ទុមធ្យមភាគតិចជាងប្រាំ។ មានន័យថាសិស្សដែលមានពិន្ទុតិចជាងប្រាំឡើងទៅ តម្រូវឱ្យសិស្ស​​នោះធ្វើតេស្តចុងឆ្នាំ បើទទួលបានលទ្ធផលល្អ ទើបអាចឡើងថ្នាក់ទី ៧ ដូចសិស្សដទៃទៀតដែរ»។

លោកស្រីបានបន្តទៀតថា ការធ្វើតេស្តសម្រាប់សិស្សមានលទ្ធផលសិស្សមិនគ្រប់មធ្យមភាគនេះ បានអនុវត្តជាង ២០ ឆ្នាំ​ហើយ។ ដូចនេះសូមអាណាព្យាបាល និងមានតាបិតាសិស្សកុំមានការភ័ន្តច្រឡំបន្តទៀត ហើយសូមបន្តជួយជំរុញឱ្យកូនៗខិតខំរៀនដើម្បីឱ្យទទួលបានលទ្ធផលល្អទាំងអស់គ្នា។

នៅពេលសិស្សថ្នាក់ទី ៦ ចូលថ្នាក់ទី ៧ ដែលជាកម្រិតអនុវិទ្យាល័យនៅតាមសាលានីមួយៗ​ ក៏មានការធ្វើតេស្តបន្ថែមដល់សិស្សានុសិស្សបន្តទៀត ដើម្បីចម្រាញ់យកសិស្សណាទទួលបានពិន្ទុល្អចូលរៀននៅថ្នាក់ A ទទួលបានពិន្ទុមធ្យមរៀនថ្នាក់ B និងពិន្ទុអន់ជាងគេរៀននៅថ្នាក់D។ ប៉ុន្តែក៏មានសាលាខ្លះមិនមានការធ្វើតេស្តបន្ថែមទេគឺយកតាមពិន្ទុដែលសិស្សម្នាក់ៗទទួលបានពីថ្នាក់បឋមតែម្តង។

ការជ្រើសរើសពិន្ទុនេះដើម្បីសម្រិតសម្រាំងសិស្សដែលមានសមត្ថភាពងាយស្រួលបំប៉នបន្ថែមតំណាងឱ្យសាលាដើម្បីធ្វើការចូលរួមប្រកួតប្រជែងជាសិស្សពូកែឬចូលរួមកម្មវិធីប្រឡងផ្សេងៗទៀតត៕

អត្ថបទ៖សំអឿន