អុំទូកកៃយ៉ាក់តាមដងទន្លេមេគង្គចម្ងាយ ៥០ គីឡូម៉ែត្រ ជួយផ្សព្វផ្សាយ​ទេសចរណ៍នៅខេត្តស្ទឹងត្រែង

មន្ទីរទេសចរណ៍ខេត្តស្ទឹងត្រែង បានរៀបចំ​ដំណើរកម្សាន្ត​អុំទូកកៃយ៉ាក់​តាមដងទន្លេមេគង្គចាប់ចេញពីចំណុចក្រោលសេះ តំបន់ទេសចរណ៍ទឹកធ្លាក់ព្រះនិមិត្តព្រំប្រទល់ទឹកដីឡាវ មកដល់ទឹកដីក្រុងស្ទឹងត្រែង ដើម្បីលើកស្ទួយវិស័យទេសចរណ៍ ។

លោក អ៊ន់ ប៉ោសឿន ប្រធានមន្ទីរទេសចរណ៍ខេត្តស្ទឹងត្រែង​បានបញ្ជាក់ថា ការរៀបចំអុំទូកៃយ៉ាកនេះគឺជាការយកចិត្តទុកដាក់រួមសហការគ្នាពីគ្រប់ភាគីពាក់ព័ន្ធ ដើម្បីធ្វើឱ្យសម្រចផែនការមេឆ្នាំ ២០២២ -២០២៦ ក្នុងគោលដៅលើកកម្ពស់វិស័យទេសចរណ៍​នៅភាគឦសានក្នុងការទាក់ទាញភ្ញៀវទេសចរមកលេងឱ្យបានច្រើន។

ទន្ទឹមការ​រៀបចំនេះ មន្ត្រីជំនាញពាក់ព័ន្ធបានធ្វើការសិក្សាពីចំណុចហានិភ័យមួយចំនួននៅតាមដងទន្លេ និងដាក់សញ្ញា​ហាមឃាត់មិនឱ្យឆ្លងកាត់ដើម្បីសុវត្ថិភាពធ្វើដំណើរបស់ភ្ញៀវទេសចរ បញ្ចៀសនូវឧបសគ្គផ្សេងៗ។

លោក សេង សុធា អ្នកសម្របសម្រួលប្រចាំនៅរមណីយដ្ឋានកោះហានបានបញ្ចាក់ថា នេះជាដំណើរ​កម្សាន្ត​បែបផ្សងព្រេង ព្រោះត្រូវ​ចំណាយពេល ១ យប់ ២ ថ្ងៃ ដោយចេញដំណើរពីចំណុច​ទឹកធ្លាក់ព្រះនិម្មិតក្នុងឃុំព្រះរំកិល ព្រំ​ប្រទល់កម្ពុជា-ឡាវ មកដល់ក្រុងស្ទឹងត្រែងដែលមានចម្ងាយ​ប្រមាណជាង ៥០ គីឡូម៉ែត្រ។

សកម្មភាពនេះនឹង​ត្រូវ​​ជិះកៃយ៉ាក់តាមជ្រលងផ្ទាំងថ្មតូចធំ ក្នុងព្រៃលិចទឹកតំបន់រ៉ាមសារ ចាប់ពីទឹកដីភូមិ​សាស្ត្រឃុំអូរស្វាយ​មកដល់តំបន់ទេសចរណ៍សហគមន៍កោះហាន និងបន្តដំណើរចុះមកដល់ទីរួមខេត្តស្ទឹងត្រែងតែម្តង ។

លោក លី មីណា អភិបាលស្រុកបុរីអូរស្វាយសែនជ័យ​បានបញ្ជាក់ថា សកម្មភាពនេះជាការផ្សព្វផ្សាយតំបន់ទេសភាពដែលរំលេចចេញពីធនធានធម្មជាតិ​នៅតាមដងទន្លេមេគង្គ ដើម្បីជំរុញវិស័យទេសចរណ៍ឱ្យមានការវិវឌ្ឍន៍ឡើងវិញ ស្របតាមយុទ្ធសាស្ត្ររបស់រាជរដ្ឋាភិបាល និងគោលដៅរបស់ក្រសួងទេសចរណ៍។

លោកបន្តថា នៅពេលវិស័យមួយនេះរីកចម្រើនឡើង ប្រជាពលរដ្ឋមានការងារធ្វើនៅក្នុងស្រុកតាមរយៈការកែច្នៃម្ហូបអាហារឱ្យមានរសជាតិ ផលិតវត្ថុអនុស្សាវរិយ៍សម្រាប់លក់ដូរ និងបានជំរុញឱ្យមានទីផ្សារទៅលើផលកសិកម្មដែលកសិករផលិតបានបន្ថែមទៀត។

ទេសចរណ៍ជិះកៃយ៉ាក់នេះមានភាពទាក់ទាញ ប្លែកអារម្មណ៍ និងបានឃើញទេសភាពស្រស់ស្អាត អមដោយព្រៃលិចទឹក កោះខ្សាច់តូចធំ ផ្ទាំងថ្មតាមដងទន្លេ ទស្សនាសត្វស្លាប និងការបោះតង់កំសាន្តលើកោះខ្សាច់ មានភាពសប្បាយរីករាយប្រកបដោយសុវត្ថិភាពខ្ពស់៕

អត្ថបទ៖ ងិនលីម