ដំណាំកសិកម្មដែលរងការវាយប្រហារពីសត្វដង្កូវហ្វូង ស្រោចស្រង់បាន ក្រោយអន្តរាគមន៍ទាន់ពេល

ដំណាំកសិកម្មដែលត្រូវបានរងការវាយប្រាហារពីសត្វដង្កូវហ្វូងប្រមាណ ២ ម៉ឺន ៣ ពាន់ ហិកតានៅ ១៥ ខេត្ត បានលូត​លាស់​ឡើងវិញ បន្ទាប់ពីមានការអន្តរគមន៍ពីក្រសួងកសិកម្ម រុក្ខាប្រមាញ់ ​និងនេសាទ និងអាជ្ញាធរ​ពាក់​ព័ន្ធ បានទាន់ពេលវេលា។

លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ ប្រាប់កម្ពុជាថ្មី នៅថ្ងៃទី ២៨ ខែមិថុនា ឆ្នាំ ២០២៤ នេះថា ស្ថានភាពដង្កូវហ្វូង ត្រូវបានគ្រប់គ្រងបាន​ហើយ ដោយសារតែ​ក្រសួង​​កសិកម្ម និងអាជ្ញាធរពាក់ព័ន្ធបានចុះ​អន្តរាគមន៍ទូទាំងប្រទេសទាន់ពេលវេលា ខណៈដែលមានការចូលរួម​ពីប្រជា​កសិករ នៅចំពេលដែលអាកាសធាតុអំណោយផល។

លោក ឃឹម ហ្វីណង់បញ្ជាក់ថា៖ «ភ្លៀងធ្លាក់ចុះមក ដង្កូវលិចទឹកងាប់ រីឯមេអំបៅក៏ថមថយដែរ នៅពេល​មានភ្លៀង ហើយ​ពងមេអំបៅក៏មិនញាស់ ហើយដក់ឌឿដែលមាននៅក្នុងដី អត់អាចក្លាយទៅជាមេអំបៅបាន ដល់ចឹងស្ថានភាពបានល្អប្រសើរឡើង»។

លោកបញ្ជាក់ថា ដំណាំដែលប៉ះពាល់កន្លងមក ភាគច្រើនបានលូតលាស់ឡើងវិញទាំងអស់ ដូចជាស្រូវ ទោះបីដង្កូវស៊ីដល់ដីហើយ ក៏លាស់ឡើងវិញដែរ ដំឡូងមីក៏ដូចគ្នា លែងជា​បញ្ហាប្រឈមហើយ។

មន្ត្រីអ្នកនាំពាក្យរូបនេះបានបញ្ជាក់ថា ប្រភពនៃការកកើតមានដង្កូវហ្វូង ដោយសារតែ ការប្រែប្រួល​អាកាសធាតុ អាកាសធាតុក្ដៅខ្លាំង អូសបន្លាយ​រយៈពេលវែង។

លោក ឃឹម ហ្វីណង់លើកឡើងថា៖ «រដូវក្ដៅហើយសើម អំណោយផលសម្រាប់​សត្វចង្រៃដូច​ជាដង្កូវដែលកើតចេញពីមេអំបៅ នៅពេលដែលអាកាសធាតុក្ដៅខ្លាំងវដ្ដជីវិតរបស់វាថយពី ៤០-៥០ ថ្ងៃ ធ្លាក់នៅតែ ៣០ ថ្ងៃ ឆាប់ញាស់ ឆាប់ធំ ឆាប់បង្កកំណើតក្លាយជាមេអំបៅ ហើយក៏ឆាប់ពង ដែលធ្វើឱ្យដង្កូវផ្ទុះឡើងលឿន។

ក្រសួងកសិកម្ម រុក្ខាប្រមាញ់ និងនេសាទ បានចុះអន្តរាគមតាំងពីចាប់ផ្ដើមដំបូង ប្រសិនបើមិនបានអន្តរាគមន៍ទាន់ពេលវេលា ករណីនេះ នឹងមានទំហំខូចខាតធំ។

លោក អិល ឈិញ ប្រធានសមាគមដំឡូងមីខ្មែរប្រាប់កម្ពុជាថ្មីនៅថ្ងៃនេះដែរថា ស្ថានភាពដង្កូវហ្វូងបានធូរ​ស្រាលហើយ បន្ទាប់ពីមន្ត្រីរដ្ឋាភិបាល និងក្រុមហ៊ុនជីថ្នាំបានចុះផ្សព្វផ្សាយថ្នាំ​ឱ្យកសិករយក​ទៅបាញ់ រួមផ្សំនឹងមានភ្លៀងធ្លាក់ធ្វើឱ្យងាប់មេអំ​បៅ។

លោកបញ្ជាក់ថា៖ «កាលដំបូងដង្កូវស៊ីលឿនណាស់ ពេលទៅឃើញពីល្ងាច ទិញថ្នាំទៅបាញ់ តែចំប្រភេទថ្នាំខ្សោយ ដល់ព្រឹកឡើងទៅមើលខ្ទេចអស់តែម្ដង»។ ទោះយ៉ាងណា ទំហំខូចខាត​នៅខេត្តឧត្តរមានជ័យត្រឹមតែ ៥ ហិកតាប៉ុណ្ណោះ ក្រៅពីនេះ គឺប៉ះពាល់តិចតូច។

យោងតាមរបាយការណ៍របស់ក្រសួងកសិកម្ម មានផ្ទៃដីដំណាំកសិកម្មប្រមាណ ២ ម៉ឺន ៣ ពាន់ហិកតា ស្ថិតនៅ​ក្នុង​ខេត្ត​​ចំនួន ១៥ បាន​​រងផលប៉ះពាល់ ​ដោយសារ​ដង្កូវហ្វូង ក្នុងនោះទំហំខូចខាតមានតិចតួច ដោយសារការអន្តរាគមនបានទាន់ពេលវេលា។

ក្នុង​ចំណោម​ផ្ទៃដី​កសិកម្ម​​​​ដែលរងការវាយប្រហារពីសត្វដង្កូវហ្វូងមានដំណាំស្រូវ ១ ម៉ឺន ៥ ពាន់ ៨ រយហិកតា និងដំណាំឧស្សាហកម្មជាង ៨ ពាន់ហិកតាដែលមានដំឡូងមី និងពោត។

ខេត្តដែលកើតមានករណីដង្កូវហ្វូងនេះ រួមមាន ខេត្តកំពង់ធំ ខេត្តកំពង់ចាម ខេត្តកំពង់ឆ្នាំង ប៉ះពាល់ ១៥០ ហិកតា ខេត្តកំពង់ស្ពឺ ចំនួន ១៥៧ ហិកតា ខេត្តកំពង់ធំ ៤ ១៨៣ ហិកតា ខេត្តព្រះវិហារ ៤ ពាន់ហិកតា ខេត្តសៀមរាបជិត ២ ពាន់ហិកតា ខេត្តតាកែវជាង ៥ ពាន់ហិកតា និងខេត្តមួយចំនួនទៀត៕

អត្ថបទ៖ ឡេង ដេត