មណ្ឌលឆៀករថយន្ត​កើន​ដល់ ២២ ទីតាំង ​ទូទាំំង​ប្រទេស ក្រោយ​​ទីតាំង​ថ្មី​មួយ​ទៀតបើកនៅ​ខេត្ត​តាកែវ

មណ្ឌលត្រួតពិនិត្យលក្ខណៈបច្ចេកទេសយានជំនិះ (ឆៀក) បាន​ពង្រីកដល់ ២២ ទីតាំង ដែល​គ្របដណ្តប់ ១៥ រាជធានី​ខេត្ត។

នៅ​ព្រឹកមិញនេះ មណ្ឌលត្រួតពិនិត្យលក្ខណៈបច្ចេកទេស​យានជំនិះសាខាខេត្តតាកែវរបស់ក្រុមហ៊ុន ខេមបូឌា ម៉ូធ័រ វីហ៊ីឃល អ៊ីនស្ពេកសិន ខមភេនី (CMVIC) បានប្រកាស​​បើក​ដំណើរការ​ជា​ផ្លូវការ​។

មណ្ឌលឆៀកថ្មីខេត្តតាកែវមានទំហំផ្ទៃដីប្រមាណ ៤ ពាន់ម៉ែត្រការ៉េ ដែលចាប់ផ្តើមសាងសង់ឡើងនៅដើមខែតុលា ឆ្នាំ​២០២៣ ហើយបញ្ចប់ការ​សាងសង់​នៅខែឧសភា ឆ្នាំ២០២៤។ មណ្ឌលនេះរួមមានសំណង់អគារដែលបំពាក់ដោយឧបករណ៍​ឆៀក​ចំនួន ១ ខ្សែ ផលិតនៅប្រទេសចិន ឆ្នាំ២០២៣ ក្នុងនោះរួមមានឧបករណ៍វាស់ផ្សែងសាំង-ម៉ាស៊ូត វាស់ល្បឿន វាស់ស៊ីផ្លេ វាស់លំងាកចង្កូត វាស់បាច់ពន្លឺហ្វាកូត ថ្លឹងទម្ងន់យាន និងវាស់កម្លាំង ហ្វ្រាំង និងមើលដោយភ្នែក៖ មើលជុំវិញយាន មើលបាតយានក្នុងយាន និងប្រព័ន្ធម៉ាស៊ីន។

បើតាម​មន្រ្តីក្រសួង​សាធារណការ​និង​ដឹកជញ្ជូន បច្ចុប្បន្ន​ទូទាំង​ប្រទេស​មានមណ្ឌលត្រួតពិនិត្យលក្ខណៈបច្ចេកទេសយានជំនិះដែលកំពុងដំណើរការសរុប ២២ ទីតាំង គឺនៅរាជធានីភ្នំពេញមានចំនួន ៨ ទីតាំង និងបណ្តា​ខេត្តមានចំនួន ១៤ទីតាំង ដែល​មាន​ដូចជាខេត្តបាត់ដំបង ខេត្តកំពង់ចាម ខេត្តសៀមរាប ខេត្តព្រះស៊ីហនុ ខេត្តកំពង់ស្ពឺ ខេត្តក្រចេះ ខេត្តរតនគីរី ខេត្តកំពង់ឆ្នាំង ខេត្តព្រះវិហារ ខេត្តកំពង់ធំ ខេត្តបន្ទាយមានជ័យ ខេត្តស្វាយរៀង ខេត្តកំពត និងខេត្តតាកែវ។

លោក ប៉េង ពោធិ៍នា រដ្ឋមន្រ្តីក្រសួង​សាធារណការ​និង​ដឹកជញ្ជូន​បានគូសបញ្ជាក់ថា មណ្ឌលត្រួតពិនិត្យលក្ខណៈបច្ចេកទេស​យានជំនិះសាខាខេត្តតាកែវ គឺជាសមិទ្ធផលថ្មីមួយបន្ថែមទៀត និងជាយន្តការមួយក្នុងការបង្ខិតការផ្តល់សេវាសាធារណៈឱ្យបានកាន់តែជិតប្រជាពលរដ្ឋ បង្កលក្ខណៈងាយស្រួល ចំណេញពេលវេលា និងកាត់បន្ថយការចំណាយ ក៏ដូចជាបង្កើនប្រសិទ្ធភាព និងតម្លាភាពនៃការផ្តល់សេវាសាធារណៈរបស់ក្រសួង និងអង្គភាពថ្នាក់ក្រោមជាតិជូនដល់ប្រជាពលរដ្ឋ ស្របតាមគោលនយោបាយរបស់រាជរដ្ឋាភិបាល។

លោក​រដ្ឋមន្រ្តី​បានលើកឡើង​ថា ការស្នើសុំត្រួតពិនិត្យលក្ខណៈបច្ចេកទេសយានជំនិះ បច្ចុប្បន្ននេះ​ត្រូវបាន​ធ្វើឡើងតាមប្រព័ន្ធ​ស្វ័យ​ប្រវត្តិកម្ម ដើម្បីសម្រួលដល់ការផ្តល់សេវាសាធារណៈប្រកបដោយតម្លាភាព ប្រសិទ្ធភាព និងគណនេយ្យភាព ដែលប្រព័ន្ធស្វ័យប្រវត្តិកម្មនេះកំពុងដើរតួនាទីយ៉ាងសំខាន់ក្នុងការធ្វើកំណែទម្រង់ និងបង្កើនជំនឿទុកចិត្តនៃការផ្តល់សេវាសាធារណៈជូនបងប្អូនប្រជាពលរដ្ឋ៕