ឧបករណ៍នេសាទខុសច្បាប់នៅស្រុកបូរីជលសារ ខេត្តតាកែវ មួយចំនួនធំត្រូវបានបង្ក្រាប និងបំផ្លាញចោល

មន្ត្រីនាយខណ្ឌរដ្ឋបាលជលផលនៃខេត្តតាកែវ បានចុះបង្រ្កាប និងបំផ្លាញចោលសម្ភារៈ បទល្មើនេសាទ បានមួយចំនួនធំ នៅភូមិសាស្រ្តស្រុកបូរីជលសារ។

ប្រតិបត្តការណ៍បង្ក្រាបរបស់មន្ត្រីជលផល នារដូវបិទការនេសាទនេះ ធ្វើឡើងនៅថ្ងៃទី០៧ ខែសីហា ឆ្នាំ២០២៤ ដោយមន្ត្រីនាយផ្នែកបូរីជលសារ និងនាយសង្កាត់នេសាទសេកយំ សហការណ៍ជាមួយគណៈបញ្ជាការឯកភាពស្រុកបូរីជលសារ ដែលដឹកនាំកម្លាំងដោយលោក នាង សំណាង អភិបាលរងស្រុកបូរីជលសារ។

តាមការបញ្ជាក់ពីលោកអភិបាលរងស្រុកដែលដឹកនាំកម្លាំងបង្ក្រាបបញ្ជាក់ ការចុះបង្ក្រាបបទល្មើសនេសាទនេះ ធ្វើឡើងនៅចំណុចខាងមុខ អធិការដ្ឋាននគរបាលស្រុកតែម្តង ហើយជនល្មើសមិនត្រូវបានស្គាល់អត្តសញ្ញាណទេ ព្រោះបានរត់គេចខ្លួនបាត់។ ដោយឡែកវត្ថុតាងដែលបង្រ្កាបបានរួមមានសៃយ៉ឺនស្បៃមុងចំនួន២០មាត់លូ របាំងស្បៃមុងប្រវែង ១២០០ម៉ែត្រ បង្គោលឬស្សីចំនួន ៦៥០បង្គោល និងត្រីចម្រុះទម្ងន់ ៥០គ.ក្រ។

បច្ចុប្បន្នវត្ថុតាងដែលរកឃើញទាំងអស់ត្រូវបានប្រមូលចេញពីទឹក ដើម្បីយកទៅបំផ្លាញចោល៕

អត្ថបទ៖ វីរៈ