ព័ត៌មានជាតិ

ព្រែកជីកហ្វូណនតេជោជាង ១៨០ គីឡូម៉ែត្រ ជីកផ្លូវទឹកថ្មីបន្ថែមតែ ៧ គីឡូម៉ែត្រប៉ុណ្ណោះ

បានផុស

២ years មុន

នៅ

ថ្ងៃចន្ទ ២៦ សីហា ២០២៤

ដោយ

លោក ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានគូសបញ្ជាក់ថា រាជរដ្ឋាភិបាលកម្ពុជាមិនបានជីកព្រែកថ្មីទាំងស្រុងទេ គឺជីកតាមព្រែកចាស់មានតាំងពីសម័យហ្វូណន ហើយគ្រាន់តែជីកព្រែកតម្រង់បន្ថែមប្រមាណ ៣៨ គីឡូម៉ែត្រ និងជីកផ្លូវទឹកថ្មី ៧ គីឡូម៉ែត្រប៉ុណ្ណោះតភ្ជាប់ទៅកាន់ផ្លូវទឹកសមុទ្រកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងដំណើរចុះពិនិត្យទីតាំងតម្រាយផ្លូវទឹកគម្រោង «ព្រែកជីកហ្វូណនតេជោ» នៅព្រឹកថ្ងៃទី២៦ ខែសីហា ឆ្នាំ២០២៤ នេះលោក ស៊ុន ចាន់ថុល បានប្រសាសន៍ថា ព្រែកជីកហ្វូណនតេជោ ជាព្រែកមួយស្ថិតក្នុងចំណោមព្រែកចំនួន ៣ ពីសម័យបុរាណ មានព្រែកអូរកែវ ព្រែកជីកវិញតេ និងព្រែកជីកហ្វូណនតេជោ។

«យើងបានដឹងហើយថា ព្រែកជីកហ្វូណនតេជោ គឺមានប្រវែងសរុប ១៨០ គីឡូម៉ែត្រ។ អីចឹងហើយខ្ញុំសូមបញ្ជាក់ឱ្យច្បាស់ថា ក្នុងប្រវែងសរុប ១៨០ គីឡូម៉ែត្រនេះ សាងសង់ស្ទើរទាំងស្រុងលើតម្រាយខ្សែផ្លូវទឹកធម្មជាតិ និងផ្លូវទឹកបុរាណ ដែលបានបន្សល់ទុកតាំងពីសម័យហ្វូណន ក្នុងនោះផ្លូវទឹកធម្មជាតិដែលមានស្រាប់មានប្រវែង ១៣៥ គីឡូម៉ែត្រ ផ្លូវទឹកជីកតម្រង់ប្រវែង ៣៨ គីឡូម៉ែត្រ បានន័យថាយើងជីកថ្មីបន្ថែមតែ ៧ គីឡូម៉ែត្រប៉ុណ្ណោះនៅខេត្តកែប ដែលជីកតម្រង់ទៅកាន់ផ្លូវទឹកសមុទ្រកម្ពុជាតែម្តង»។ លោក ស៊ុន ចាន់ថុល បន្ថែមបែបនេះ។

លោកសង្កត់ធ្ងន់បន្ថែមថា ការជីកតម្រង់ប្រវែងជាង ៣៨ គីឡូម៉ែត្រ ដើម្បីអាចឱ្យកប៉ាល់ធ្វើនាវាចរណ៍បាន និងជីកថ្មី ៧ គីឡូម៉៉ែត្រ ដើម្បីភ្ជាប់ទៅកាន់សមុទ្រកម្ពុជា»។

ព្រែកជីកហ្វូណនតេជោ គឺជាគម្រោងប្រវត្តិសាស្ត្រលើកទី១ ក្នុងវិស័យដឹកជញ្ជូនផ្លូវទឹករបស់កម្ពុជា ដើម្បីតភ្ជាប់ប្រព័ន្ធទន្លេមេគង្គ និងផ្លូវសមុទ្រ និងបង្កើនអធិបតេយ្យភាពការដឹកជញ្ជូនតាមផ្លូវទឹករបស់កម្ពុជា កាត់បន្ថយពេលវេលា ចម្ងាយ ថវិកា នីតិវិធីសម្រាប់នាវានិងទំនិញចូល-ចេញ ធ្វើឱ្យចំណេញ និងបង្កើនល្បឿននៃការ អភិវឌ្ឍសេដ្ឋកិច្ចជាតិ ធ្វើសមាហរណកម្មដឹកជញ្ជូនផ្លូវទឹកតាមរយៈការពង្រីកការតភ្ជាប់ពហុមធ្យោបាយដឹកជញ្ជូន កាត់បន្ថយការខូចខាតផ្លូវថ្នល់ និងការកកស្ទះចរាចរណ៍ និងកាត់បន្ថយគ្រោះថ្នាក់ចរាចរណ៍លើផ្លូវថ្នល់៕

Related Topics:លោក ស៊ុន ចាន់ថុល