ព័ត៌មានជាតិ

ពលរដ្ឋផ្អើលនាំគ្នាទៅមើលបាតុភូតចម្លែកទឹកធ្លាក់ពីលើមែកឈើមិនឈប់នៅវត្តត្បូង

Published

1 month ago

March 6, 2021

ប្រជាពលរដ្ឋនៅក្នុង ឃុំព្រែកដំបូក ស្រុកស្រីសន្ធរ ខេត្តកំពង់ចាម បាននាំគ្នាផ្អើលទៅមើលបាតុភូតចម្លែកដែលមានទឹកធ្លាក់មិនដាច់ពីលើមែកឈើដើមច្រេះ ដែលស្ថិតនៅក្នុងវត្តប្រាសាទវត្តីហៅវត្តត្បូងហើយបាននាំគ្នាយកទៀនធូបទៅបន់ស្រន់សុំសេចក្តីសុខទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោក ផល វ៉ុន មេឃុំព្រែកដំបូកបានប្រាប់ឲ្យដឹងនៅរសៀល ថ្ងៃទី៦មីនានេះថា ព្រឹត្តិការណ៍ដែលមានទឹកធ្លាក់មិនដាច់នៅដើមច្រេះ ស្ថិតនៅក្នុងវត្តត្បូងនេះបានកើតឡើងកាលពីថ្ងៃទី៤ ម្ល៉េះហើយប្រជាពលរដ្ឋដែលមានជំនឿគិតថា វាជាបាតុភូតចម្លែកមានបារមីកាន់នៅដើមច្រេះនោះព្រោះថាដើមច្រេះនៅពីមុខទូកង សារាយផ្កាយព្រឹក។

លោកមេឃុំបានបន្តថា ដោយសារមានប្រជាពលរដ្ឋខ្លះមានអបិយជំនឿទើបបានយកធូបទៀនទៅបន់ស្រន់សុំសេចក្តីសុខបញ្ចៀសនូវឧបទ្រុបចង្រៃផ្សេងៗពិសេសជំងឺកូវីដ១៩។

តែយ៉ាងណាក៏ដោយ លោកមេឃុំបានណែនាំទៅប្រជាពលរដ្ឋថា «នេះមិនមែនជាបាតុភូតចម្លែកអ្វីទេបើពិនិត្យមើលការជាក់ស្តែងទឹកដែលធ្លាក់ហូរមកតាមមែកឈើនៃដើមច្រេះអត់ដាច់នេះគឺ

បណ្តាលមកពីទឹកមាត់សត្វរ៉ៃយំនៅលើដើមឈើច្រេះនោះទេ។ ដូចនេះសុំឈប់នាំគ្នាផ្អើលជាបន្តទៀត ត្រូវប្រុងប្រយ័ត្នចំពោះជំងឺកូវីដ១៩»។

លោកបានណែនាំដល់ប្រជាពលរដ្ឋត្រូវពាក់ម៉ាសការពារទាំងអស់គ្នានិងរក្សាគម្លាតសុវត្ថិភាពបុគ្គលដើម្បីការពារជំងឺកូវីដ១៩ដែលកំពុងរាតត្បាតក្នុងសហគមន៍នៅកម្ពុជានៅឡើយ។

លោកបានបញ្ជាក់ថា «ជាក់ស្តែងនៅថ្ងៃនេះបន្ទាប់ពីខ្ញុំបានធ្វើដំណើរចេញពីភូមិតាមល់បន្តទៅភូមិផ្ទះវាលហើយបានឈប់សម្រាកនៅក្រោមដើមអំពិលបារាំងដ៏ធំមួយក៏មានទឹកស្រក់ដូចទឹកស្រក់នៅដើមច្រេះនៅក្នុងវត្តត្បូងដែលប្រជាពលរដ្ឋនាំគ្នាផ្អើលថាបាតុភូតចំលែកដែរតែទឹកមិនស្រក់ច្រើនទេ»។

លោកផល វ៉ុន បានបន្ថែមទៀតថា បើទោះបីជាលោកខិតខំពន្យល់ណែនាំដល់ប្រជាពលរដ្ឋយ៉ាងណាក៏ដោយក៏មានប្រជាពលរដ្ឋខ្លះជឿនិងមានប្រជាពលរដ្ឋខ្លះទៀតនៅតែមិនជឿហើយនៅតែបន្តមកមើលទឹកធ្លាក់និងសុំបួងសួងសុំសេចក្តីសុខ៕

ដោយ ៖ សំអឿន

Related Topics:បាតុភូតចម្លែក