ព័ត៌មានជាតិ

ក្រសួងការងារ ប្រកាសឱ្យពលរដ្ឋខ្មែរធ្វើតេស្តជំនាញ និងតេស្តភាសាជប៉ុន ដើម្បីទៅធ្វើការនៅជប៉ុន

បានផុស

២ years មុន

នៅ

ថ្ងៃសៅរ៍ ៧ កញ្ញា ២០២៤

ដោយ

ក្រសួងការងារ និងបណ្តុះបណ្តាលវិជ្ជាជីវៈ បានប្រកាសឱ្យពលរដ្ឋខ្មែរទៅធ្វើតេស្តជំនាញ និងតេស្តភាសាជប៉ុន ដើម្បីបានទៅធ្វើការនៅប្រទេសជប៉ុនទទួលបានប្រាក់ខែខ្ពស់ជួយលើកស្ទួយជីវភាពគ្រួសារកាន់តែប្រសើរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងនៅក្នុងសេចក្តីជូនដំណឹងមួយដែលទើបចេញផ្សាយនៅថ្ងៃទី ០៦ កញ្ញា នេះថា យោងតាមការជូនដំណឹងពីក្រសួងយុត្តិធម៌ នៃប្រទេសជប៉ុន ក្រសួងការងារ និងបណ្តុះបណ្តាលវិជ្ជាជីវៈ សូមជូនដំណឹងដល់ទីភ្នាក់ងារជ្រើសរើសឯកជនទាំងអស់ និងសាធារណជនដែលមានបំណងទៅ ធ្វើការនៅប្រទេសជប៉ុន ក្នុងគម្រោងពលករជំនាញ ឱ្យបានជ្រាបថាអង្គភាពទទួលបន្ទុកការធ្វើតេស្តជំនាញ និង តេស្តភាសាជប៉ុន នឹងរៀបចំការធ្វើតេស្តជំនាញ និងតេស្តភាសាជប៉ុនតាមរយៈ ប្រព័ន្ធកុំព្យូទ័រ (CBT) ក្នុងគម្រោងពលករជំនាញ។

លោករដ្ឋមន្ត្រីបានបន្តថា ចំពោះការកាលបរិច្ឆេទធ្វើតេស្តភាសាជប៉ុនមូលដ្ឋាន តេស្តផ្នែកសេវាថែទាំ តេស្តផ្នែកសំណង់ តេស្តផ្នែកកសិកម្ម និងតេស្តផ្នែកភោជនីយដ្ឋាន នឹងធ្វើឡើងនៅថ្ងៃទី ១០-១៣ តុលា ថ្ងៃទី ១៧-២០ តុលា និងថ្ងៃទី ២៣-២៧ និង ៣០ ខែតុលា ឆ្នាំ ២០២៤។ ថ្ងៃទី ២,៦,៧,៩ និង ១០ ខែវិច្ឆិកា ឆ្នាំ ២០២៤ និងថ្ងៃទី ១៨,១៩ និងថ្ងៃទី ២៤ ខែវិច្ឆិកា ឆ្នាំ ២០២៤ នៅវិទ្យាស្ថានអភិវឌ្ឍន៍វិស័យ អប់រំ (EDI) ដែលមានអាសយដ្ឋាន ៖ ផ្ទះលេខ ៩A ផ្លូវលេខ ៣៧០ សង្កាត់បឹងកេងកង ១ ខណ្ឌបឹងកេងកង រាជធានីភ្នំពេញ។ ក្នុងនោះ ដោយតម្លៃចុះឈ្មោះធ្វើតេស្តភាសាជប៉ុនមូលដ្ឋាន ចំនួន ៣៦ ដុល្លារ តេស្តផ្នែកសេវាថែទាំតម្លៃ ១៤ ដុល្លារ តេស្តផ្នែកសំណង់តម្លៃ ១៤ ដុល្លារ តេស្តផ្នែកកសិកម្មតម្លៃ ៣៣ ដុល្លារ និងតេស្តផ្នែកភោជនីយដ្ឋានតម្លៃ ៣៣ ដុល្លារ។

លោករដ្ឋមន្ត្រី បានបន្តទៀតថា លក្ខខណ្ឌចុះឈ្មោះធ្វើតេស្តជំនាញ និងតេស្តភាសាជប៉ុន គឺចាប់ពីអាយុ ១៧ ឆ្នាំឡើងទៅ ដោយមិនគិតពី កម្រិតវប្បធម៌ឡើយហើយឯកសារចាំបាច់ដែលត្រូវយកមកជាមួយនៅថ្ងៃធ្វើតេស្តរួមមានអត្តសញ្ញាណប័ណ្ណ លិខិតឆ្លងដែន ឬប័ណ្ណបើកបរ។

គួរបញ្ជាក់ថា គិតត្រឹម ២០២៣ កម្ពុជា បានផ្តល់ឱកាសការងារនៅក្រៅប្រទេសជូនប្រជាពលរដ្ឋចំនួន ១ ៣៥៦ ៦១៦ នាក់ ស្រីចំនួន ៥៥២ ៨៥១ នាក់ ក្នុងនោះនៅប្រទេសជប៉ុន មានពលករចំនួន ២០ ០៥៦ នាក់ ស្រី ៩ ១៥៥ នាក់ ភាគច្រើនជាកម្មសិក្សាការីទទួលបានប្រាក់ខែ ១ ៤០០ ដុល្លារ ក្នុង ១ ខែ ដោយពួកគេទៅធ្វើការលើផ្នែកវេចខ្ចប់ សំណង់ ចំណីអាហារ សេវាកម្ម សណ្ឋាគារ ភោជនីយដ្ឋាន កសិកម្មដាំដុះ និងចិញ្ចឹមសត្វ៕

អត្ថបទ ៖ សំអឿន