ប្រធានរដ្ឋសភាជំរុញអាស៊ែបៃហ្សង់វិនិយោគកសិកម្មកម្ពុជាសម្រាប់នាំចេញ

ប្រធានរដ្ឋសភា សម្ដេចរដ្ឋសភាធិការធិបតី ឃួន សុដារី បាន​ជំរុញដល់ឯកអគ្គរដ្ឋទូតអាស៊ែបៃហ្សង់លោក ស៊ូវគី មេឌីហ្សាដា (Shovgi Mechdizade) ទាក់ទាញអ្នកវិនិយោគពីប្រទេសលោកមកកាន់កម្ពុជាទៅលើឧស្សាហកម្មកែច្នៃ ថាមពល កសិកម្ម សុខាភិបាល។

ថ្លែងក្នុងជំនួបជាមួយលោក ស៊ូវគី មេឌីហ្សាដា នៅព្រឹកថ្ងៃទី៣១ ខែមករា ឆ្នាំ២០២៤នេះ នៅវិមានរដ្ឋសភា សម្ដេចមហារដ្ឋសភាធិការធិបតី ឃួន សុដារី បាន​លើកឡើងពីសក្ខានុពលនៃកំពង់ផែកម្ពុជាដែលផ្ដល់ភាពងាយស្រួលក្នុងការដឹកជញ្ជូន​ចេញចូលតាមផ្លូវទឹក។

សម្ដេចរដ្ឋសភាធិការធិបតី ឃួន សុដារី បាន​បញ្ជាក់ថា ប្រទេសទាំងពីរនៅមានសក្តានុពលផ្សេងៗជាច្រើនទៀត ដើម្បីជំរុញ និងបង្កើនការវិនិយោគផងដែរ ក្នុងនោះការនាំចេញនូវផលិតផលកសិកម្មពីកម្ពុជា ដូចជា អង្ករ ម្រេច ផ្លែស្វាយ គ្រាប់ស្វាយចន្ទី និងវិស័យសុខាភិបាលជាដើម។

ឯកអគ្គរដ្ឋទូតអាស៊ែបៃហ្សង់លោក ស៊ូវគី មេឌីហ្សាដា បានគូសបញ្ជាក់ថានឹងខិតខំលើកកម្ពស់ទំនាក់ទំនងប្រទេសទំាងពីរឱ្យកាន់តែរឹងមាំនិងរីកចម្រើនបន្ថែមទៀតដោយនៅក្នុងនោះ បានសន្យាថានឹងកៀរគរអ្នកវិនិយោគអាស៊ែបៃហ្សង់ មកកម្ពុជាបន្ថែមទៀត។

ប្រទេសអាស៊ែបៃហ្សង់គឺប្រទេសពុំមានព្រំដែនសមុទ្រអន្តរជាតិនោះទេដែលជាហេតុធ្វើឱ្យមានការលំបាកក្នុងការនាំចេញរបស់ខ្លួន។ ទំនិញចំបងនៃការនាំចេញរបស់ប្រទេសនេះគឺប្រេង និងឧស្ម័នធម្មជាតិដែលគ្រប់គ្រងលើការនាំចេញ៩៥% ហើយមធ្យោបាយនៃការនាំចេញបានគឺត្រូវបញ្ជូនតាមបំពង់ឧស្ម័នទៅកានតួគី រុស្សី និងសមុទ្រខ្មៅ មុននឹងត្រូវបញ្ចេញទៅកាន់ទីផ្សារអន្តរជាតិ៕

អត្ថបទដោយ ហ៊ុន សិរីវឌ្ឍន៍