ករណីលូ១តម្លៃ៤០ដុល្លា៖ អាជ្ញាធរ ថាមិនបានយកលុយពីពលរដ្ឋឡើយ គឺពលរដ្ឋជួលភាគីឯកជនឱ្យដាក់ខ្លួនឯង

លោក ប៉ាន់ ខែម ប៊ុនថន ប្រធានក្រុមការងាររដ្ឋាភិបាលចុះជួយក្រុងប៉ោយប៉ែត និងរដ្ឋបាលសង្កាត់ប៉ោយប៉ែត បានឱ្យដឹងថា អាជ្ញាធរ មិនបានបង្ខិតបង្ខំឱ្យពលរដ្ឋក្នុងសង្កាត់ប៉ោយប៉ែត ត្រូវតែដាក់លូខាងមុខផ្ទះ និងមិនបានយកថវិកាពីពលរដ្ឋចំពោះការដាក់លូឡើយ គ្រប់យ៉ាងគឺពលរដ្ឋ បានព្រមព្រៀងជាមួយភាគីឯកជនឱ្យដាក់លូ១ក្នុងតម្លៃ៤០ដុល្លារ។  

លោក ប៉ាន់ ខែមប៊ុនថន និងរដ្ឋបាលសង្កាត់ប៉ោយប៉ែត ចេញមកបំភ្លឺដូច្នេះ ប​ន្ទាប់ពីមានគណនីហ្វេសប៊ុកមួយឈ្មោះ MaLay yu0973329337 បានបង្ហោះជាវីដេអូ ភ្ជាប់ជាមួយខ្លឹមសារថា៖«ជួយស៊ែអោយថ្នាក់លេីៗឃេីញផងបងប្អូនបញ្ជាក់ផ្សាកណ្ដាលប៉ោយប៉ែតទាពីប្រជាជន60$ ដំណាក់ទឹកភូមិចន័គិរី40$យកចុះតែត្រឹមលូ1តា5មុឺនរឺ3មុឺនបានហេីយប្រជាជនក្រៗណាស់ ហេីយចង់ទិញដាកខ្លួនឯង តែលឺគេប្រាប់ថាមិនអោយដាក់ទេ»។

ចំពោះបញ្ហាដាក់លូ តាមបណ្ដោយផ្លូវដែលទើបស្ថាបនា រដ្ឋបាលសង្កាត់ប៉ោយប៉ែត រម្លឹកថា  កន្លងមកមានប្រជាពលរដ្ឋរស់នៅ ភូមិចាន់គីរី សង្កាត់ប៉ោយប៉ែត ក្រុងប៉ោយប៉ែត បានស្នើសុំមកអង្គភាពភូមិ សុំឱ្យអាជ្ញាធរជួយស្ថាបនា ផ្លូវថ្មីមួយខ្សែ ជូនពួកគាត់ក្នុងការធ្វើដំណើរឱ្យបានស្រួល ជាពិសេសមានការលំបាកខ្លាំងនៅរដូវវស្សា។  ក្រោយពីទទួលបានព័ត៌មាននេះអាជ្ញាធរភូមិ ក៏បានរាយការណ៍មកសង្កាត់ ហើយក្រុមការងារសង្កាត់បានចុះទៅភ្លាមៗ ដើម្បីពិនិត្យមើលពីស្ថានភាពផ្លូវដែលប្រជាពលរដ្ឋស្នើសុំខាងលើ ។

បន្ទាប់ពីបានចុះពិនិត្យ និងសិក្សារួចមកគណៈកម្មការ អភិវឌ្ឍន៍សង្កាត់ ក៏បានឯកភាពគ្នាយកគ្រឿងចក្រទៅឈូសឆាយសម្រួលជូនជាបណ្តោះអាសន្ន និងបានកាយ ប្រឡាយរំដោះទឹកសងខាងផ្លូវ ដើម្បីកាត់សំណើមដីជាមុនសិន រួចទើបធ្វើការចាក់ថ្មមិក និងកៀរកិនជូនឱ្យបានស្អាត។

រដ្ឋបាលសង្កាត់ប៉ោយប៉ែត បានឱ្យដឹង ក្នុងចន្លោះពេលនោះដែរ មានប្រជាពលរដ្ឋមួយចំនួនដែលមានលទ្ធភាពបានទំនាក់ទំនងជាមួយក្រុមហ៊ុនដាក់លូ ដើម្បីដាក់លូខាងមុខផ្ទះរបស់គាត់ដោយមានការព្រមព្រៀងគ្នា ក្នុងតម្លៃលូមួយកង់ថ្លៃ៤០ដុល្លា រួមទាំងកម្លាំងពលកម្មផង ចំណែកប្រជាពលរដ្ឋដែលពុំទាន់មានលទ្ធភាព ពួកគាត់បានធ្វើជាស្ពានឆ្លងដោយរក្សាប្រឡាយរំដោះទឹកនៅដដែល។

រដ្ឋបាលសង្កាត់ប៉ោយប៉ែត បានបញ្ជាក់ថា ការដាក់លូជាការព្រមព្រៀងរវាងក្រុមហ៊ុន និងប្រជាពលរដ្ឋ គ្មានជាប់ពាក់ព័ន្ធជាមួយអាជ្ញាធរមូលដ្ឋាន ដូចគណនីហ្វេសប៊ុក ឈ្មោះ Malay yu0973329337 បានធ្វើការបង្ហោះជាវីដេអូឡើយ៕​

អត្ថបទ៖អ ពៅ