រដូវប្រាំង! ក្រសួងការពារជាតិប្រាប់ឃ្លាំងសព្វាវុធ ឱ្យប្រយ័ត្នកុំឱ្យមានបញ្ហាអគ្គិភ័យ ព្រោះអាចប៉ះពាល់អាយុជីវិត

ស្ថិតក្នុងរដូវប្រាំង ដែលងាយនឹងមានបញ្ហាអគ្គិភ័យ អគ្គនាយកដ្ឋានសម្ភារៈបច្ចេកទេស នៃក្រសួងការពារជាតិ ប្រាប់ឱ្យឃ្លាំងសព្វាវុធ ត្រូវប្រុងប្រយ័ត្នបង្ការកុំឱ្យមានគ្រោះអគ្គិភ័យ  ព្រោះបញ្ហានេះអាចបង្កឱ្យមានគ្រោះថ្នាក់ដល់អាយុជីវិត និងទ្រព្យសម្បត្តិ។

តាមរយៈសេចក្ដីណែនាំ អគ្គនាយកដ្ឋានសម្ភារៈបច្ចេកទេស ណែនាំដល់ បណ្តាកងឯកភាពចំណុះទាំងអស់ ជាពិសេសឃ្លាំងសព្វាវុធកា-៨៦, កា-៥, កា-៨៨, ឃ្លាំងសម្ភារៈកា-៤, រោងជាងជួសជុលចម្រុះ, យានដ្ឋានជួសជុលរថយន្ត និងវរសេនាធំដឹកជញ្ជូនការពារ ត្រូវមានម្ចាស់ការ និងប្រុងប្រយ័ត្នខ្ពស់ចំពោះដើមចមដែលអាចបង្កើតឱ្យមានគ្រោះអគ្គិភ័យកើតឡើងដូចជា ភ្លើងចង្ក្រាន ភ្លើងចង្កៀង ភ្លើងធូបទៀន ការដុតសម្រាម ដុតព្រៃ-ចំការ-វាលស្រែ ការបោះចោលកន្ទុយបារីផ្តេសផ្តាស ការតភ្ជាប់ ឬប្រើចរន្តអគ្គិសនីមិនត្រឹមត្រូវតាមបច្ចេកទេស ការទុកដាក់ប្រេងឥន្ធនៈ ឧស្ម័នចំហេះ វត្ថុ គ្រាប់ រំសេវ អាវុធងាយឆេះ ឬងាយផ្ទុះជាដើម។ល។

អគ្គនាយកដ្ឋានសម្ភារៈបច្ចេកទេស បង្គាប់ឱ្យពិនិត្យឱ្យបានហ្មត់ចត់ ឲ្យបានហ្មត់ចត់ បង្ការកុំឱ្យមានការ ឆេះរាលដាលបង្កើតជាគ្រោះអគ្គិភ័យ ដែលធ្វើឱ្យបាត់បង់ទាំងទ្រព្យសម្បត្តិ និងអាចដល់អាយុជីវិត ហើយត្រូវត្រៀមរៀបចំរិះរកមធ្យោបាយរក្សាសុវត្ថិភាពឱ្យបានគ្រប់គ្រាន់ក្នុងការបង្ការ ទប់ស្កាត់ការកើតមានជាយថាហេតុនូវអគ្គិភ័យក្នុងអង្គភាពរបស់ខ្លួន។

សូមរម្លឹកថា កាលពីថ្ងៃទី២៧ ខែមេសា​ ឆ្នាំ២០២៤ កន្លងទៅ  នៅទីតាំងទីបញ្ជាការយោធភូមិភាគទី៣ ក្នុងខេត្តកំពង់ស្ពឺ  មានករណីផ្ទុះគ្រាប់មួយ កើតឡើងដោយសារបញ្ហាបច្ចេកទេស ដែលបណ្ដាលឱ្យយោធិនចំនួន២០នាក់ បានពលីជីវិត និងយោធិនមួយ ចំនួនទៀតរងរបួស៕