នាយកស្ថាប័ន HKTDC ​ស្វែងរកកិច្ចសហការ​ ជំរុញ​​នាំ​ផលិតផល​​កម្ពុជា ឈានចូល​ទីផ្សារ​​ពិភពលោក

ក្នុង​ជំនួប​ពិភាក្សា​ការងារជាមួយ​រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នាយក​ក្រុមប្រឹក្សាអភិវឌ្ឍន៍ពាណិជ្ជកម្មក្រុងហុងកុង HKTDC ប្រចាំតំបន់អាស៊ីអាគ្នេយ៍ និងអាស៊ីខាងត្បូង បានអះអាងថា​ បណ្តាញ​ពាណិជ្ជកម្ម​ដ៏​ទូលំទូលាយ​របស់ HKTDC អាច​ជួយឱ្យ​ផលិតផល​កម្ពុជា​ឈានជើងចូលក្នុងផ្សារ​ពិភពលោកបានកាន់តែច្រើន។

ក្នុង​ជំនួប​ជាមួយ​រដ្ឋមន្រ្តី​ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កាលពីម្សិលមិញនេះ លោក Ronald Ho នាយកប្រចាំតំបន់អាស៊ីអាគ្នេយ៍ និងអាស៊ីខាងត្បូងរបស់​ស្ថាប័ន​ HKTDC បានលើកឡើងពីកិច្ចខិតខំប្រឹងប្រែង​របស់ស្ថាប័ន​ HKTDC ក្នុងការលើកកម្ពស់ពាណិជ្ជកម្មអន្តរជាតិ តាមរយៈការរៀបចំពិព័រណ៍ពាណិជ្ជកម្ម ដើម្បីផ្តល់ជាវេទិកាដ៏សំខាន់សម្រាប់ជំរុញនវានុវត្តន៍ និងកំណើននៃធុរកិច្ចថ្មី។

លោក​បាន​គូស​បញ្ជាក់​ថា ​ស្ថាប័ន HKTDC កំពុង​ស្វែងរកកិច្ចសហប្រតិបត្តិការ កិច្ចសហការផ្នែកបច្ចេកវិទ្យា និងការគាំទ្រឧស្សាហកម្មកម្ពុជាក្នុងការពង្រីកឱកាសពាណិជ្ជកម្ម ខណៈ​ដែល​បណ្តាញ​ពាណិជ្ជកម្ម​ដ៏​ទូលំទូលាយ​របស់ HKTDC អាច​​ជួយឱ្យ​ផលិតផល​កម្ពុជា​ឈានជើងចូលក្នុងផ្សារ​ពិភពលោកបានកាន់តែច្រើន។

ជាការឆ្លើយតប លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកទឹកចិត្តឱ្យស្ថាប័ន HKTDC ស្វែងរកឱកាសវិនិយោគ​លើ​ដំណោះស្រាយបច្ចេកវិទ្យាដល់វិស័យសំខាន់ៗរបស់កម្ពុជា ដែលកំពុងមានសក្តានុពលទាំងក្នុងក្របខ័ណ្ឌតម្រូវការក្នុងស្រុក ក៏ដូចជាទីផ្សារនាំចេញ។

លោក​រដ្ឋមន្រ្តី​បាន​គូស​បញ្ជាក់អំពីអាទិភាពគន្លឹះរបស់រាជរដ្ឋាភិបាលក្នុងការជំរុញបច្ចេកវិទ្យា និងបរិវត្តកម្មឌីជីថល ដោយរំលេច​ជាឧទាហរណ៍អំពីបច្ចេកវិទ្យាហិរញ្ញវត្ថុដែលកំពុងរីកចម្រើន ជាពិសេសភាពជឿនលឿននៃប្រព័ន្ធទូទាត់អេឡិចត្រូនិក​​៕