ព័ត៌មានជាតិ

ចោទប្រកាន់ជនញុះញង់ចាក់វ៉ាក់សាំងស្លាប់បញ្ជូនឲ្យចៅក្រមសម្រេចតាមច្បាប់

បានផុស

៥ years មុន

នៅ

ថ្ងៃព្រហស្បតិ៍ ២៥ មីនា ២០២១

ដោយ

ភ្នំពេញ ៖ លោក គុជ គឹមឡុង ព្រះរាជអាជ្ញារង នឹងជាអ្នកនាំពាក្យអយ្យការអមសាលាដំបូងរាជធានីភ្នំពេញ បានថ្លែងឲ្យដឹងកាលរសៀលថ្ងៃទី២៥ ខែមីនា ឆ្នាំ២០២១ នេះថាលោក សេង ហៀង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានបើកការស៊ើបសួរពេញមួយថ្ងៃ លើជនសង្ស័យម្នាក់ពាក់ព័ន្ធសំណុំរឿង ដែលប្រឌិតព័ត៌មានថា ចាក់វ៉ាក់សាំងប្រឆាំងជំងឺកូវីដ-១៩ របស់ចិនបណ្ដាលឲ្យស្លាប់ ដោយបង្ហោះចែកចាយនៅលើបណ្ដាញសង្គម បានសម្រេចចោទប្រកាន់ជាផ្លូវការហើយ ពី«បទរារាំងដល់ការអនុវត្តវិធានការ» តាមមាត្រា១១ នៃច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ.១៩ និងជំងឺឆ្លងកាចសាហាវ និងគ្រោះថ្នាក់ធ្ងន់ធ្ងរផ្សេងទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមលោកគុជ គឹមឡុង យោងតាមការចោទប្រកាន់ដូចបទល្មើសដូចមានចែងខាងលើនេះ ជនសង្ស័យ នឹងត្រូវជាប់ពន្ធនាគារពី៦ខែទៅ៣ឆ្នាំ និងពិន័យជាប្រាក់ពី ២លានរៀល ទៅ ១០លានរៀល។

ជនត្រូវចោទឈ្មោះ តោ ចន្នី ភេទប្រុស អាយុ២៨ឆ្នាំ មុខរបរបើករថយន្តដឹកទំនិញ រស់នៅខណ្ឌពោធិ៍សែនជ័យ រាជធានីភ្នំពេញ ត្រូវបានក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញឃាត់ខ្លួន កាលពីព្រឹកថ្ងៃទី២៤ ខែមីនា ឆ្នាំ២០២១ ពាក់ព័ន្ធទៅនឹងការផ្សាយព័ត៌មានមិនពិត ទៅ នឹងការចាក់វ៉ាក់សាំងកូវីដ-១៩។ បន្ទាប់ពីឃើញវីដេអូផុសមានលក្ខណៈញុះញង់ និងផ្សាយខុសពីការពិតទៅនឹងការចាក់វ៉ាក់សាំងកូវីដ.១៩ នៅលើបណ្តាញសង្គម នោះភ្លាម លោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានដាក់បទបញ្ជាឲ្យសមត្ថកិច្ចជំនាញធ្វើការស្រាវជ្រាវ និងតាមចាប់ខ្លួនជនផ្សព្វផ្សាយព័ត៌មានបំពុលសង្គមម្នាក់នោះ ដើម្បីយកមកអនុវត្តតាមច្បាប់៕

ដោយ ៖ មករា