ក្រសួងបញ្ជាក់ផ្លូវការ ករណីបុរសអាយុ ៥៥ ឆ្នាំស្លាប់ដោយសារកូវីដ១៩

ក្រសួងសុខាភិបាលបានចេញសេចក្តីប្រកាសព័ត៌មានជាផ្លូវការនៅថ្ងៃទី ២៦ ខែមីនា មុននេះបន្តិចថា បុរសអាយុ ៥៥ ឆ្នាំ បានធ្លាក់ខ្លួនឈឺ និងក្អកប្រហែលជា ៣ ឬ ៤ ថ្ងៃទៅហើយ មុនពេលស្លាប់ ដោយសភាពកាន់តែធ្ងន់ធ្ងរក៏បានចូលសម្រាកព្យាបាលនៅមន្ទីរពេទ្យខ្មែរ-សូវៀត នៅថ្ងៃទី ២៥ ខែមីនា វេលាម៉ោង ១៥៖៣០ នាទី ក្នុងស្ថានភាពមានអាការហត់ដង្ហក់ខ្លាំង។

ដោយការសង្ស័យក្រុមគ្រូពេទ្យបានយកសំណាកទៅវិភាគភ្លាមៗ នៅពេលចូលមកដល់មន្ទីរពេទ្យក ហើយលទ្ធផលវិភាគវត្ថុសំណាកបង្ហាញថា មានវិជ្ជមានកូវីដ១៩ នៅម៉ោង ១១ យប់នៅថ្ងៃដដែល។

ដោយសារតែស្ថានភាពធ្ងន់ធ្ងរ ក្រុមគ្រូពេទ្យបានប្រើម៉ាស៊ីនជំនួយការដកដង្ហើម តែជាអកុសលក្នុងរយៈពេលត្រឹមតែកន្លះម៉ោង បុរសរូបនោះក៏បានធ្វើមរណកាលទៅ។

តាមការសន្និដ្ឋានរបស់គ្រូពេទ្យ បុរសវ័យ ៥៥ ឆ្នាំរូបនេះ គឺបានស្លាប់បាត់បង់ជីវិត ដោយសារជំងឺកូវីដ១៩ វ៉ៃលុកលឿន សាហាវ និងធ្ងន់ធ្ងរខ្លាំងពេក៕