ព័ត៌មានជាតិ

ក្រសួងអប់រំ នឹងពង្រីកការផ្ដល់អាហារដល់សិស្សកម្រិតមត្តេយ្យ និងបឋមសិក្សា ជាង ១៣ ម៉ឺននាក់បន្ថែមទៀត

បានផុស

១ year មុន

នៅ

ថ្ងៃសុក្រ ២ ឧសភា ២០២៥

ដោយ

ក្រសួងអប់រំ យុវជន និងកីឡា នឹងពង្រីកការផ្តល់អាហារក្តៅៗ ដ៏មានជីវជាតិជារៀងរាល់ព្រឹកដល់សិស្សានុសិស្សនៅកម្រិតមត្តេយ្យសិក្សា និងបឋមសិក្សាប្រមាណជាង ១៣ ម៉ឺននាក់បន្ថែមទៀត ចាប់ពីឆ្នាំ ២០២៥ ដល់ ឆ្នាំ ២០២៩ ដើម្បីលើកកម្ពស់សុខភាព និងកាត់បន្ថយអត្រាបោះបង់ការសិក្សារបស់សិស្ស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គម្រោងដែលមានតម្លៃ ១០ លានដុល្លារនេះ ក្រសួងអប់រំ យុវជន និងកីឡា បានសហការជាមួយទីភ្នាក់ងារ សហប្រតិបត្តិការអន្តរជាតិកូរ៉េ និងកម្មវិធីស្បៀងអាហារពិភពលោក ដើម្បីបន្តគាំទ្រកម្មវិធីផ្តល់អាហារតាមសាលារៀនដោយប្រើប្រាស់កសិផលក្នុងសហគមន៍នៅកម្ពុជា ខណៈបច្ចុប្បន្នកម្មវិធីផ្តល់អាហារតាមសាលារៀនរបស់រដ្ឋាភិបាលបានផ្តល់អាហារជូនដល់សិស្សានុសិស្សប្រមាណ ១៩០ ០០០ នាក់ នៅតាមសាលាបឋមសិក្សាចំនួន ៦៨៦ សាលា។

គម្រោងនេះជាការវិនិយោគបន្ថែមថ្មីពីសាធារណរដ្ឋកូរ៉េក្នុងដំណាក់កាលទី ២ បន្ថែមលើសមិទ្ធផលកន្លងមកកាលពីដំណាក់កាលទី ១ (២០២០-២០២៤) និងអនុញ្ញាតឱ្យក្រសួងអប់រំ យុវជន និងកីឡា និងកម្មវិធីស្បៀងអាហារពិភពលោក អាចផ្តល់អាហារក្តៅៗ ដ៏មានជីវជាតិជារៀងរាល់ព្រឹក ក្នុងរយៈពេល ៥ ឆ្នាំ បន្តទៀត ជូនដល់សិស្សានុសិស្សនៅមតេ្តយ្យសិក្សា និង បឋមសិក្សាចំនួន ១៣៣ ៣០០ នាក់ នៅតាមសាលាបឋមសិក្សា ៤២៨ សាលា ដែលសាលារៀនទាំងនេះ នឹងត្រូវផ្ទេរចូលទៅក្នុងកម្មវិធីផ្តល់អាហារតាមសាលារៀនរបស់រដ្ឋាភិបាលទៅតាមដំណាក់កាលជាបន្តបន្ទាប់រហូតអស់ទាំងស្រុងនៅត្រឹមឆ្នាំ ២០២៨។

លោកបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍នៅក្នុងពិធីចុះហត្ថលេខាជាមួយលោកស្រី Moon Jung Choi នាយិកា នៃទីភ្នាក់ងារសហប្រតិបត្តិការអន្តរជាតិកូរ៉េ ប្រចាំប្រទេសកម្ពុជា កាលពីពេលថ្មីៗ នេះថា កម្មវិធីផ្តល់អាហារតាមសាលារៀននេះមិនត្រឹមតែបានធ្វើឱ្យប្រសើរឡើងនូវលទ្ធភាពទទួលបានអាហារូបត្ថម្ភ គ្រប់គ្រាន់សម្រាប់កុមារប៉ុណ្ណោះទេ គឺថែមទាំងជាការវិនិយោគលើអនាគតរបស់ប្រទេសកម្ពុជាទាំងមូល ដោយបានជួយកសាងប្រព័ន្ធអប់រំមួយឱ្យរឹងមាំ មានភាពធន់ជាងមុន និងបានរួមចំណែកគាំទ្រដល់គោលដៅអភិវឌ្ឍន៍ជាតិ។

លោកស្រី Moon Jung Choi នាយិកា នៃទីភ្នាក់ងារសហប្រតិបត្តិការអន្តរជាតិកូរ៉េ ប្រចាំប្រទេសកម្ពុជា មានប្រសាសន៍ថា ការគាំទ្រនៅក្នុងដំណាក់កាលទី ២ នេះ គឺបានបញ្ជាក់ជាថ្មីនូវការប្ដេជ្ញាចិត្តរបស់រដ្ឋាភិបាលនៃសាធារណរដ្ឋកូរ៉េ ក្នុងការគាំទ្រដល់ការអភិវឌ្ឍប្រកប ដោយនិរន្តរភាព និងបរិយាបន្ន សម្រាប់ប្រជាជនកម្ពុជា តាមរយៈការគាំទ្រប្រព័ន្ធជាតិ ដែលមានតួនាទីផ្តល់នូវការអភិវឌ្ឍយូរអង្វែងក្នុងវិស័យអប់រំ អាហារូបត្ថម្ភ និងជីវភាពរស់នៅតាមទីជនបទ។

លោកស្រី គ្លែរ កូណាន់ នាយិកា នៃកម្មវិធីស្បៀងអាហារពិភពលោកប្រចាំកម្ពុជា បានមានប្រសាសន៍ថា កិច្ចសហការជាថ្មីជាមួយទីភ្នាក់ងារសហប្រតិបត្តិការអន្តរជាតិកូរ៉េ និងក្រសួងអប់រំ យុវជន និង កីឡា ជាឧទាហរណ៍ដ៏មានអានុភាពមួយអំពីរបៀប នៃកិច្ចសហការគ្នា ដែលអាចធ្វើឱ្យប្រសើរឡើងនូវសុខុមាលភាពរបស់កុមារ ការបង្កើនគុណភាព នៃការសិក្សា និងការកសាងសហគមន៍ដែលមានភាពធន់បន្ថែមទៀត។

លោកស្រីបានបន្តថា កម្មវិធីស្បៀងអាហារពិភពលោក មានមោទនភាពបំផុតក្នុងការបន្តគាំទ្រដល់ដំណើររបស់ប្រទេសកម្ពុជា ក្នុងការឆ្ពោះទៅកាន់ភាពជាម្ចាស់យ៉ាងពេញលេញ នៃកម្មវិធីផ្តល់អាហារតាមសាលារៀនប្រកបដោយនិរន្តរភាព៕

អត្ថបទ ៖ សំអឿន