ខេត្តស្វាយរៀង មាន​អ្នកប៉ះពាល់ ជាង​១០០​នាក់ មាន​ទាំង​ព្រះសង្ឃ​ទៀត

លោកវេជ្ជបណ្ឌិត កែរ រដ្ឋា ប្រធានមន្ទីរសុខាភិបាលខេត្តស្វាយរៀងបានឲ្យដឹងនៅរសៀលថ្ងៃទី២៨មីនានេះថា ក្រុមការងារឆ្លើយតបបន្ទាន់ បានស្រាវជ្រាវរកឃើញអ្នកប៉ះពាល់ផ្ទាល់និងប្រយោលពាក់ព័ន្ធនឹងព្រឹត្តិការណ៍សហគមន៍​២០​កម្ភៈ​សរុប១០៤នាក់។

ក្នុងចំណោមអ្នកពាក់ព័ន្ធចំនួន១០៤នាក់នោះ មានអ្នកប៉ះពាល់ផ្ទាល់ចំនួន៣៩នាក់ ក្នុងនោះនៅ​​ក្រុង​បាវិត​មាន​ចំនួន២០នាក់ និងនៅស្រុករមាសហែកចំនួន១៩នាក់ រួមទាំងព្រះសង្ឃ៣អង្គផងដែរ។ ចំណែកអ្នកប៉ះពាល់ប្រយោលវិញមានចំនួន៦៥នាក់ ក្នុងនោះនៅបាវិតចំនួន៣៣នាក់ និងនៅស្រុករមាសហែកចំនួន៣២នាក់។

លោកបានបន្តទៀតថា ព្រឹត្តិការណ៍សហគមន៍២០កម្ភៈ ទូទាំង​ខេត្តស្វាយរៀង មានអ្នកឆ្លងសរុបចំនួន៦នាក់ ជាសះស្បើយចំនួន២នាក់ និងនៅសល់៤នាក់កំពុងសម្រាកព្យាបាលនៅមន្ទីរពេទ្យ។

គួរបញ្ជាក់ថា គិតត្រឹមថ្ងៃទី២៨ខែមីនាឆ្នាំ២០២១នេះ កម្ពុជាមានអ្នកឆ្លងកូវីដ១៩ក្នុងព្រឹត្តិការណ៍សហគមន៍២០កម្ភៈចំនួន១៧០៤នាក់នៃអ្នកឆ្លងសរុបទូទាំងប្រទេស២២៣៣នាក់អ្នកជាសះស្បើយចំនួន១១៦៦នាក់ អ្នកសម្រាកពេទ្យ១០៥៤នាក់និងអ្នកស្លាប់ចំនួន១០នាក់៕

អត្ថបទ៖ សំអឿន