មន្ត្រីជំនាញស្ទាក់ចាប់ពងមាន់នាំចូលពីប្រទេស​វៀតណាមខុសច្បាប់ជាង២ម៉ឺន៥ពាន់គ្រាប់តាមច្រករបៀងខេត្តតាកែវ

ក្រុមអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ នៅព្រឹកថ្ងៃទី២៦ ខែឧសភា ឆ្នាំ២០២៥នេះ បានចុះស្ទាក់ចាប់រថយន្តមួយគ្រឿងដែលលួចដឹកពងមាន់ជាង២ម៉ឺន៥ពាន់គ្រាប់ចេញពីប្រទេសវៀតណាម តាមច្រករបៀងក្នុងខេត្តតាកែវ ដោយគ្មានលិខុតអនុញ្ញាត។

ប្រតិបត្តិការនេះធ្វើនៅចំណុចជិតរង្វង់មូលកួរស្រូវ សង្កាត់ព្រែកកំពឹស ខណ្ឌដង្កោ រាជធានីភ្នំពេញ ដោយឃាត់បានរថយន្តមួយគ្រឿង ម៉ាក SSANGYONG ISTANA ពណ៌លឿង ពាក់ស្លាកលេខ ភ្នំពេញ 2R-6203 ឆែករកឃើញពងមាន់ចំនួនន ៨៥ដុំ ស្មើនឹង ២៥៥០០ ដែលអ្នកបើករថយន្ដអះអាងថា បាននាំចូលតាមច្រករបៀង ស្រុកគិរីវង់ ខេត្តតាកែវ ឆ្ពោះមកលក់ចែកចាយនៅរាជធានីភ្នំពេញ ដោយគ្មានលិខិតអនុញ្ញាតអ្វីទាំងអស់។

ក្រោយឃាត់រថយន្ត និងដកហូតពងមាន់ទាំងនេះ ត្រូវបានក្រុមអន្តរាគមន៍បង្ក្រាបបទល្មើសចលនាសត្វ នាំយកទៅរក្សាទុកនៅទីតាំងចត្តាឡីស័ក របស់អគ្គដ្ឋានសុខភាពសត្វនិងផលិតកម្មសត្វ ដើម្បីចាត់ការទៅតាមនីតិវិធីច្បាប់៕

អត្ថបទ៖ រដ្ឋា