ព័ត៌មានជាតិ

សម្ដេចតេជោមិនឯកភាពនឹងការលើកឡើងថាបរទេសនាំចូលបន្លែផ្លែឈើមានគីមីដើម្បីឱ្យខ្មែរឈឺរួចទៅព្យាបាលនៅស្រុកគេ

បានផុស

១ year មុន

នៅ

ថ្ងៃអង្គារ ៣ មិថុនា ២០២៥

ដោយ

ប្រធានសមាជរដ្ឋសភា និងព្រឹទ្ធសភា សម្ដេចតេជោ ហ៊ុន សែន បដិសេធទៅនឹងការលើកឡើងរបស់លោក ម៉ុង ឬទ្ធី ដែលបាននិយាយពីបារម្ភលើបន្លែផ្លែឈើប្រទេសជិតខាងដែលបានចាក់សារធាតុគីមីដាក់លក់នៅលើទីផ្សារធ្វើឱ្យប៉ះពាល់សុខភាពពលរដ្ឋដើម្បីពេលពលរដ្ឋឈឺទៅព្យាបាលនៅស្រុកគេទៀត។ សម្ដេចថាគ្មានអ្នកណាចង់ឱ្យអ្នកណាឈឺទេគួរតែមានការប្រុងប្រយ័ត្នខ្លួនឯង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងកិច្ចប្រជុំសមាជរដ្ឋសភា ព្រឹទ្ធសភា ព្រឹកថ្ងៃទី៣ ខែមិថុនា ឆ្នាំ២០២៥នេះ សម្ដេចតេជោ ហ៊ុន សែន មានប្រសាសន៍ដាស់តឿនថាគ្មានអ្នកណាចង់ឱ្យអ្នកណាឈឺទេ ដោយជំរុញឱ្យមានការប្រុងប្រយ័ត្នខ្លួនឯង ដោយសម្ដេចបានរម្លឹកទៅដល់ក្រសួងសុខាភិបាល ពាណិជ្ជកម្ម និងអ្នកពាក់ព័ន្ធទាក់ទងនឹងសុវត្ថិភាពចំណីអាហារ ភូតគាមអនាម័យ ត្រូវពង្រឹងការត្រួតពិនិត្យលើកិច្ចការនេះឱ្យបានច្បាស់លាស់។

សម្ដេចថា៖ «ម៉ុង ឬទ្ធី លើកឡើងខ្ញុំមិនឯកភាពត្រង់ចំណុចមួយដែលថាគេចាក់គីមីដើម្បីឱ្យយើងឈឺទៅដេកពេទ្យស្រុកគេនោះ។ និយាយចឹងខុសហើយ នេះមិនអាចនិយាយចឹងទេ គ្រាន់តែដាស់តឿនទេ។ ព្រោះថាគ្មានអ្នកណាចង់ឱ្យអ្នកណាឈឺទេ តែបញ្ហានោះគឺត្រូវប្រុងប្រយ័ត្នខ្លួនឯង»។

ការលើកឡើងរបស់សម្ដេចតេជោគឺបានឆ្លើយតបទៅសមាជិកព្រឹទ្ធសភា លោក ម៉ុង ឬទ្ធី ដែលបានលើកឡើងក្នុងប្រធានបទសមាជទាក់ទងនឹងកសិកម្មដែលបានបង្ហាញពីក្ដីបារម្ភលើផលិតផលបន្លែ ផ្លែឈើ និងសាច់សត្វ ដែលនាំចូលមកពីបរទេសដែលអាចមានប្រើប្រាស់គីមីច្រើនធ្វើឱ្យប៉ះពាល់ដល់សុខភាព។

លោកលើកឡើងយ៉ាងដូច្នេះថា៖ «ឈើហូបផ្លែដែលប្រទេសជិតខាងគេលក់ឱ្យយើងគឺគេឈប់ប្រើហើយទើបគេលក់ឱ្យយើង គេអត់ចង់ឱ្យយើងទទួលបានផលច្រើនទេ! គេចង់ឱ្យយើងទទួលបានផលតិចដើម្បីយើងនាំបន្លែផ្លែឈើពីគេមក ហើយជួនកាលមានគីមីចឹងទៀតយើងត្រូវទៅដេកពេទ្យស្រុកគេហើយក៏ថាបានដែរ»។

សម្ដេចតេជោ ហ៊ុន សែន បានចាត់ទុកការលើកឡើងនេះគឺខុស ដោយជំរុញឱ្យមានការពង្រឹងលើសមត្ថភាពត្រួតពិនិត្យខ្លួនឯងដោយថាគុណភាពនៃការរស់នៅរបស់ប្រជាជនខ្មែរកាន់តែប្រសើរហើយនៅពេលនេះដែលត្រូវការហូបចុក «ឆ្អែត ឆ្ងាញ់ និងធានាគុណភាព»។

គួរឱ្យដឹងថាថ្ងៃនេះជាថ្ងៃទី២នៃសមាជរដ្ឋសភា ព្រឹទ្ធសភា ដែលពិភាក្សាលើប្រធានបទទាក់ទងនឹងកសិកម្មដែលមានសមាជិករដ្ឋសភា និងព្រឹទ្ធសភាឡើងថ្លែងចំណាប់អារម្មណ៍ចំនួន២១នាក់ ទាក់ទងនឹងវិស័យកសិកម្ម និងផ្ដល់ធាតុចូលដើម្បីជួយដល់វិស័យកសិកម្មរបស់កម្ពុជាផងដែរ៕

Related Topics:សម្ដេចតេជោ ហ៊ុន សែន

សេចក្ដីជូនដំណឹង៤ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា