ភ្នំធិបតីនឹងក្លាយជាគោលដៅទេសចរណ៍ដ៏ទាក់ទាញ ក្នុងរយៈពេលខ្លីខាងមុខនេះ

នេះជាលើកទីពីរហើយ ដែលមន្រ្តីថ្នាក់ក្រសួង និងថ្នាក់ខេត្តបាត់ដំបង បានចុះពិនិត្យលើកគោលដៅភ្នំធិបតីក្នុងស្រុកគាស់ក្រឡ ដើម្បីរៀបចំឱ្យក្លាយជាគោលដៅទេសចរណ៍ពិសេសមួយទៀត ក្រោយការរៀបចំនៅភ្នំសំពៅដោយជោគជ័យលើវិស័យ ទេសចរណ៍។

ការចុះពិនិត្យលើទីតាំងខាងលើនេះ បានប្រព្រឹត្តទៅកាលពីថ្ងៃទី១២ ខែមិថុនា ឆ្នាំ២០២៥ ដោយមានការចូលរួម និងដឹកនាំពីលោក ប៉ាក់ សុខុម រដ្ឋលេខាធិការក្រសួងទេសចរណ៍ និងជាថ្នាក់ដឹកនាំទទួលបន្ទុកមន្ទីរទេសចរណ៍ខេត្តបាត់ដំបង និងលោក ឆាយ ម៉ាទីណាល់ ជាអភិបាលរងខេត្តទទទួលបន្ទុក ព្រមទាំងមាជិកសមាជិកានៃគណៈកម្មាធិការអភិវឌ្ឍន៍ ទេសចរណ៍ខេត្តបាត់ដំបង និងអង្គភាពពាក់ព័ន្ធជុំវិញខេត្តសរុបទាំងអស់ចំនួន៣៨រូប។

មន្ត្រីនៃមន្ទីរទេសចរណ៍ខេត្ត បានឱ្យដឹងថា កិច្ចប្រជុំស្តីពីការតាមដានត្រួតពិនិត្យវឌ្ឍនភាពការងារអភិវឌ្ឍទេសចរណ៍ឆ្នាំ ២០២៥ ដើម្បីត្រៀមរៀបចំផែនការអភិវឌ្ឍទេសចរណ៍ខេត្តបាត់ដំបងឆ្នាំ២០២៦-២០៣០ ដើម្បីលើកកម្ពស់លើវិស័យទេសច រណ៍ក្នុងខេត្តបាត់ដំបងឱ្យបានកាន់តែមានវិសាលភាពនៅទូទាំងខេត្តបាត់ដំបង។ ក្នុងកិច្ចប្រជុំទទួលបានធាតុចូលមតិយោបល់និងសំណូមពរល្អៗពីអ្នកពាក់ព័ន្ធផងដែរ ដើម្បីរួមគ្នាស្វែងរកដំណោះស្រាយ ដាក់គោលដៅ ត្រៀមផែនការ និងស្នើ សុំគោលការ និងការអន្តរាគមន៍ដល់ថ្នាក់ដឹកនាំបន្ថែម ក្នុងការអភិវឌ្ឍន៍។

ទន្ទឹមនឹងនេះ អង្គប្រជុំបានឯកភាព និងគាំទ្រលើផែនការសកម្មភាពរបស់រដ្ឋបាលខេត្ត ដែលកំពុងអនុវត្តលើផែនការសកម្មភា ពក្នុងការរៀបចំកែលម្អ និងអភិវឌ្ឍនៅតំបន់ភ្នំធិបតី ដែលស្ថិតនៅភូមិជើងទិញ ឃុំធិបតី ស្រុកគាស់ក្រឡ ខេត្តបាត់ដំបង មាន ចម្ងាយប្រមាណ ៤៣គីឡូម៉ែត្រពីទីរួមខេត្តបាត់ដំបង។ ភ្នំនេះមានទំហំប្រមាណ ២៥០ហិកតា ដើម្បីឱ្យក្លាយជាទៅគោលដៅទេ សចរណ៍ដ៏ទាក់ទាញបែបអេកូ-ទេសចរណ៍ ទេសចរណ៍បែបសាសនា និងកសិ-ទេសចរណ៍ ក្នុងពេលដ៏ខ្លីខាងមុខនេះ តែពុំមា នការបញ្ជាក់ថាតើត្រូវអនុវត្តន៍នៅពេលណានៅឡើយ។

លោក ប៉ាក់ សុខុម រដ្ឋលេខាធិការក្រសួងទេសចរណ៍ បានបញ្ជាក់ថា ការរៀបចំ និងកែច្នៃលើទីតាំងភ្នំធិតីតាមការគ្រោងទុក ត្រូវមានការរៀបចំដូចជា ដាក់ស្លាកឈ្មោះរមណីយដ្ឋាន(ដាក់ផ្លូវចូល),ដាក់បង្គោលកំណត់ដែនរមណីយដ្ឋាន,រៀបចំស្លាកបង្ហាញពត៌មានទេសចរណ៍,រៀបចំស្លាករមណីយដ្ឋាន(និមិត្តសញ្ញារមណីយដ្ឋាន),រៀបចំចំណតសមស្រប,រៀបចំទីសក្ការៈបូជា,រៀបចំបុស្តិ៍យាម និងកន្លែងផ្តល់ពត៌មានទេសចរណ៍។ ព្រមទាំងរៀបចំសាងសង់បង្គន់អនាម័យ,រៀបចំសួនច្បារ និងកន្លែងថតរូប,រៀបចំកន្លែងអង្គុយសម្រាក,រៀបចំជណ្តើរឈើឡើងភ្នំនិងបង្កាន់ដៃដែលបច្ចុប្បន្នឡើងតាមផ្លូវចាស់គឺឡើងតាមថ្ម,រៀបចំដាក់ភ្លើងបំភ្លឺ,រៀបចំកន្លែងសមាធិ,រៀបចំទីតាំងសម្រាប់Visit Flow(អាចរៀបចំជាផ្លូវដើរលក្ខណៈស្ពានឈើ),រៀបចំដាក់មគ្គុទេសក៍ទេសចរប្រចាំ ការរៀបចំសាងសង់កន្លែងលក់វត្ថុអនុស្សាវរីយ៍និងវត្ថុដង្វាយទីសក្ការៈ,រៀបចំកន្លែងលក់ភេសជ្ជៈនិងអាហារបួសឬអាហារសម្រន់សម្រាប់ភ្ញៀវ,រៀបចំភូមិជុំវិញ ឬសហគមន៍ចូលរួមជាមួយរមណីយដ្ឋាន ជាដើម។

លោកថា ភាគីពាក់ព័ន្ធទាំងថ្នាក់ជាតិ និងថ្នាក់ក្រោមជាតិ រួមគ្នាលើកកម្ពស់ការផ្សព្វផ្សាយទេសចរណ៍ឲ្យបានកាន់តែទូលំទូលា យថែមទៀតស្របតាមពាក្យស្លោក “ទេសចរណ៍ដើម្បីទាំងអស់គ្នា ទាំងអស់គ្នាដើម្បីទេសចរណ៍” ដែលដាក់ចេញដោយសម្តេ ចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងពាក្យស្លោក “ទេសចរណ៍រីកលូតលាស់ ក្នុងសន្តិភាព” ដែលដាក់ចេញដោយសម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ចំណែកពាក្យស្លោកថា “បុគ្គលម្នាក់ៗជាអ្នកផ្សព្វផ្សាយទេសចរណ៍កម្ពុជាម្នាក់” បានដាក់ចេញដោយមហាគ្រួសារក្រសួងទេសចរណ៍ ផងដែរ។

បើតាមលោកអនុរដ្ឋលេខាធិការ “យើងតែងតែលើកឡើងថា រដូវកាលភ្ញៀវតិច “Low Season”ចន្លោះពីខែឧសភា ដល់ខែ តុលា(រដូវមានភ្លៀងធ្លាក់)នោះ ត្រូវបានក្រសួងទេសចរណ៍បានប្តូរមកប្រើជាពាក្យថាជារដូវកាលបៃតង”Green Season” ដើម្បីជំរុញការផ្សព្វផ្សាយវិស័យទេសចរណ៍នារដូវកាលនេះ ពីព្រោះរដូវកាលបៃតងគ្រប់ទីកន្លែង ពោរពេញទៅដោយភាព ស្រស់បំព្រង និងមានភាពបៃតង៕

អត្ថបទ៖សៅ សារិទ្ធ