Connect with us

ព័ត៌មានជាតិ

សម្តេច ម៉ែន សំអន ៖ ការពលីក្នុងបុព្វហេតុការពារជាតិ ទឹកដី ក្នុងការប្រយុទ្ធតស៊ូជាមួយកងទ័ពថៃ គឺជាវីរយុទ្ធជនស្នេហាជាតិពិតប្រាកដរបស់កម្ពុជា

បានផុស

នៅ

សម្តេច​កិត្តិ​សង្គហ​បណ្ឌិត ម៉ែន សំអន អ្នកតំណាងរាស្ត្រ​មណ្ឌល​ស្វាយរៀង និង​ប្រធាន​ក្រុមប្រឹក្សា​ជាតិ​រណសិរ្ស​សាមគ្គី​អភិវឌ្ឍន៍​មាតុភូមិ​កម្ពុជា បាន​ថ្លែងថា ការ​ពលី​ក្នុង​បុព្វហេតុ​ការពារជាតិ ទឹកដី ក្នុង​ការ​ប្រយុទ្ធ​តស៊ូ​ជាមួយ​កងទ័ព​ថៃ​ គឺជា​វីរ​យុទ្ធជន​ស្នេហា​ជាតិ​ធ្វើ​ឲ្យ​ប្រជាពលរដ្ឋ​ខ្មែរ​គ្រប់រូប​ចងចាំ​ជានិច្ច​នូវ​គុណូបការៈ​ដ៏​ថ្លៃថ្លា​នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេច​កិត្តិ​សង្គហ​បណ្ឌិត ម៉ែន សំអន ថ្លែង​បែបនេះ​ក្នុងពេល​អញ្ជើញ​ចូលរួម​ក្នុង​ពិធី​បូជាសព លោក​អនុសេនីយ៍ទោ តែម សុខ​ជា ស្ថិតក្នុង​ភូមិ​ទួល​ស្តី ឃុំ​ទួល​ស្តី ស្រុក​ចន្ទ្រា ខេត្តស្វាយរៀង កាលពី​ព្រឹក ថ្ងៃ​ព្រហស្បតិ៍ ៦​ កើត ខែស្រាព​ណ៍ ឆ្នាំម្សាញ់ សប្តស័ក ព​.​ស​. ២៥៦៩ ត្រូវ​នឹង ថ្ងៃទី​ ៣១ ខែកក្កដា ឆ្នាំ ​២០២៥។

គួរ​រំលឹក​ផងដែរ​ថា លោក​អនុសេនីយ៍ទោ តែម សុខ​ជា ជា​យោធិន​បម្រើ​ការងារ​នៅ​កងពលតូច​លេខ ៨ ចំណុះ​ឲ្យ​កងពលធំ​អន្តរាគមន៍​លេខ​ ៣ កងទ័ពជើងគោក នៃ​កងយោធពលខេមរភូមិន្ទ បាន​ពលី​ជីវិត​នៅ​លើ​សមរភូមិ​ប្រយុទ្ធ​ខេត្ត​ព្រះវិហារ កាលពី​ថ្ងៃ​សុក្រ ១៥ ​រោច ខែស្រាព​ណ៍ ឆ្នាំម្សាញ់ សប្តស័ក ព​.​ស​.២៥៦៩ ត្រូវ​នឹង​ថ្ងៃទី ​២៥ ខែកក្កដា ឆ្នាំ ​២០២៥ ជន្មាយុ ៤៣ ឆ្នាំ។

មរណភាព​របស់ លោក​អនុសេនីយ៍ទោ តែម សុខ​ជា គឺជា​ការ​បាត់បង់​នូវ​ឧ​ត្ត​ម​ស្វាមី ឪពុក ដែល​ប្រកប​ដោយ​ព្រហ្ម​វិហារធម៌។

លោក​អនុសេនីយ៍​ទោ បាន​ចូលរួម​ប្រយុទ្ធ​យ៉ាង​អង់អាច​ក្លាហាន និង​ស្វិតស្វាញ​ប្រឆាំង​ជាមួយ​ទ័ព​ឈ្លានពាន​ថៃ បានបង្ហាញ​គំរូ​វីរភាព​របស់​វីរ​យុទ្ធជន ដែល​បាន​ធ្វើ​ឲ្យ​ប្រជាពលរដ្ឋ​ខ្មែរ​គ្រប់រូប​ចងចាំ​ជា​និច្ច​នូវ​គុណូបការៈ​ដ៏​ថ្លៃថ្លា​នេះ។

នៅក្នុង​សមាន​ទុក្ខ​ដ៏​ក្រៀមក្រំ​នេះ សម្តេច​កិត្តិ​សង្គហ​បណ្ឌិត ​ក៏បាន​ចូលរួម​រំលែក​ទុក្ខ​ជាមួយ លោកស្រី អូ​ម សុ​ផានី ព្រមទាំង​ក្រុម​គ្រួសារ និង​សូម​បួងសួង ដល់​តេ​ជៈ​បារមី ​នៃ​ព្រះពុទ្ធ ព្រះធម៌ ព្រះសង្ឃ តាម​ជួយ​ថែរក្សា​ដួង​វិញ្ញាណក្ខន្ធ​របស់ លោក​អនុសេនីយ៍ទោ តែម សុខ​ជា បាន​ទៅ​សោយសុខ​ក្នុង​ឋាន​សុគតិភព​កុំបី​ឃ្លៀងឃ្លាត​ឡើយ៕

អត្ថបទ ៖ វិមាន

Helistar Cambodia - Helicopter Charter Services
Sokimex Investment Group
Sokha Hotels

ព័ត៌មានពេញនិយម