អ្នកនាំពាក្យក្រសួងការពារជាតិ បន្តអំពាវនាវកុំឱ្យចែករំលែកព័ត៌មានដែលគ្មានប្រភពច្បាស់លាស់

ថ្លែងជាថ្មីម្ដងទៀតក្នុងសន្និសីទសារព័ត៌មាន នៅថ្ងៃត្រង់ទី១ ខែសីហា ឆ្នាំ២០២៥នេះ លោកស្រីឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ បានបន្តអំពាវនាវដល់ប្រព័ន្ធផ្សព្វផ្សាយ រួមទាំងសាធារណៈមតិកុំឱ្យចែករំលែកព័ត៌មានដែលគ្មានប្រភពច្បាស់លាស់ ក្នុងកាលៈទេសៈដែលកម្ពុជា-ថៃ កំពុងរក្សាបទឈប់បាញ់។

លោកស្រីឧត្តមសេនីយ៍ឯក ម៉ាលី សុជាតា បានថ្លែងដូច្នេះថា «ក្រសួងការពារជាតិសូមអំពាវនាវដល់បងប្អុនអ្នកសារព័ត៌មាន និងអ្នកប្រើប្រាស់បណ្ដាញសង្គមគ្រប់ប្រភេទ សូមកុំចែករំលែកព័ត៌មាន រូបភាព វីដេអូ ដែលមិនមានប្រភពច្បាស់លាស់»។

ទន្ទឹមនឹងការអំពាវនាវដល់សារព័ត៌មាន និងបណ្ដាញសង្គមនៅក្នុងស្រុក អ្នកនាំពាក្យក្រសួងការពារជាតិកម្ពុជា ក៏បានទាមទារឱ្យសារព័ត៌មាន និងបណ្ដាញសង្គមថៃ បញ្ឈប់ជាបន្ទាន់រាល់យុទ្ធនាការផ្សព្វផ្សាយព័ត៌មានមិនពិត ដែលធ្វើឱ្យស្ថានការណ៍មានភាពតានតឹង ខណៈប្រទេសកម្ពុជា និងថៃ កំពុងតែធ្វើការជាមួយគ្នាក្នុងការដោះស្រាយដោយសន្តិវិធី ដើម្បីនាំមកវិញនូវសុខសន្តិភាពជូនប្រជាជនទាំងសងខាង។

សេចក្ដីអំពាវនាវរបស់អ្នកនាំពាក្យក្រសួងការពារជាតិកម្ពុជា បានធ្វើឡើងក្រោយនៅតែកត់សម្គាល់ឃើញការផ្សព្វផ្សាយព័ត៌មានមួយចំនួន នៅតែផ្សាយខុសពីការពិតទាក់ទងទៅនឹងស្ថានការណ៍នៃជម្លោះតាមបណ្តោយព្រំដែនរវាងកម្ពុជា-ថៃ ពិសេសទាក់ទងនឹងបទឈប់បាញ់រវាងប្រទេសទាំងពីរ ហើយជាពិសេសនោះគឺការផ្សាយដោយសារព័ត៌មានខ្លះរបស់ថៃ ដែលបាននិងកំពុងផ្សព្វផ្សាយព័ត៌មានខុសពីការពិត៕

ដោយ៖ ធឿន វ៉ាន់សុង