បើថៃនៅតែគឃ្លើនបង្ហោះដ្រូនចូលដែនអាកាសកម្ពុជា នោះកម្ពុជានឹងមានវិធានការឆ្លើយតបចាំបាច់

អ្នកនាំពាក្យក្រសួងការពារជាតិលោកស្រី ម៉ាលី សុជាតា ប្រកាសទាត់ចោលការបង្ហោះផ្សព្វផ្សាយដោយសារព័ត៌មានថៃមួយចំនួន ដែលបានចោទថាកម្ពុជាបានបង្ហោះដ្រូនចូលទឹកដីថៃ។ ផ្ទុយមកវិញកម្ពុជាអំពាវនាវឱ្យភាគីថៃបញ្ឈប់សកម្មភាពបង្ហោះដ្រូនចូលដែនអាកាសកម្ពុជាជាបន្ទាន់ បើពុំនោះទេនឹងមានវិធានការឆ្លើយតបជាការចាំបាច់។

ការទាត់ចោលនេះ បន្ទាប់ពីសារព័ត៌មានថៃមួយចំនួនបានយកវីដេអូការបង្ហោះដ្រូនមកធ្វើការអត្ថាធិប្បាយ និងចោទថាដ្រូននោះជារបស់កម្ពុជា។ ថ្លែងចេញពីសេចក្តីសង្ខេបព័ត៌មានប្រចាំថ្ងៃ ស្តីពី «លទ្ធផលនៃការអនុវត្តបទឈប់បាញ់រវាងកម្ពុជា-ថៃ» នៅថ្ងៃទី ០៣ ខែសីហានេះ លោកស្រី ម៉ាលី សុជាតា អះអាងថា៖«កម្ពុជាសូមច្រានចោលការផ្សព្វផ្សាយដោយគ្មានមូលដ្ឋាន និងផ្ទុយពីការពិតរបស់សារព័ត៌មានថៃមួយចំនួន ដោយថ្មីៗនេះ បានផ្សាយយករូបភាពវីដេអូក្លែងក្លាយ មកធ្វើអត្ថាធិប្បាយ បកស្រាយជាខ្លឹមសារបំភ្លៃមិនពិត លាបពណ៌ ថាដ្រូននោះជារបស់កម្ពុជា បានហោះចូលទឹកដីថៃ»។

លោកស្រីសង្កត់ធ្ងន់ថា ទង្វើទាំងអស់នេះ មិនត្រឹមតែមិនបានចូលរួមដល់ការរក្សាស្ថានភាពឱ្យមានភាពល្អប្រសើរនោះទេ ប៉ុន្តែបង្កើតឱ្យមានការកើនឡើងនូវកម្តៅ»។ ជាមួយគ្នានេះ កម្ពុជាអំពាវនាវឱ្យភាគីថៃ ចៀសវាងការបង្ហោះដ្រូនរបស់ខ្លួនចូលក្នុងដែនអាកាសកម្ពុជាទៀត បើពុំនោះទេកម្ពុជានឹងមានវិធានការឆ្លើយតបសមស្របចំពោះសកម្មភាពរំលោភបំពានទាំងអស់នោះ៕