ព័ត៌មានជាតិ

អនុប្រធានទី២រដ្ឋសភាជំរុញយុវជនរួមគ្នាបង្ហាញការពិតពីកម្ពុជាទៅកាន់ពិភពលោក

បានផុស

១០ ខែ មុន

នៅ

ថ្ងៃចន្ទ ៤ សីហា ២០២៥

ដោយ

អនុប្រធានទី២ នៃរដ្ឋសភាលោក វង សូត បានជំរុញដល់យុវជនកម្ពុជាសាមគ្គីជាធ្លុងមួយ ដើម្បីប្រឆាំងតបតព័ត៌មានក្លែងក្លាយ និងផ្សព្វផ្សាយពីការពិតដែលកំពុងកើតឡើងនៅកម្ពុជាឱ្យអន្តរជាតិបានដឹង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លើកឡើងក្នុងជំនួបក្រុមនិស្សិតជ័យលាភីអាហារូបករណ៍ទៅសិក្សានៅប្រទេសជប៉ុន ព្រឹកថ្ងៃទី៤ ខែសីហា ឆ្នាំ២០២៥ លោក វង សូត បានលើកឡើងថា និស្សិតទាំងងស់គឺជាទូតសុឆន្ទៈរបស់កម្ពុជាដែលដើរតូនាទីយ៉ាងសំខាន់ក្នុងការការពារផលប្រយោជន៍ជាតិ ជាពិសេសត្រូវចូលរួមលើកកម្ពស់កិត្យានុភាពជាតិនៅលើឆាកអន្តរជាតិ។

លោកថា៖ «យុវជនត្រូវជឿជាក់លើចំណាត់ការរបស់រាជរដ្ឋាភិបាល ក្នុងកាដោះស្រាយជម្លោះព្រំដែនជាមួយថៃ ហើយយុវជនខ្លួនឯងត្រូវសាមគ្គីគ្នាជាធ្លុងមួយ ដើម្បីប្រឆាំងតបត ចំពោះ ការបង្កើតព័ត៌មានក្លែងក្លាយ មូលបង្កាច់កម្ពុជា ក្នុងគោលបំណង បំភាន់ភ្នែកអន្តរជាតិ។ ក្នុងន័យនេះ យុវជនយើង គឺជាកម្លាំងដ៏សំខាន់របស់ជាតិ ក្នុងការផ្សព្វផ្សាយពីការពិតដែលកំពុងកើតឡើងនៅកម្ពុជា ឱ្យអន្តរជាតិបានដឹង ដោយប្រើប្រាស់ប្រព័ន្ធបណ្តាញសង្គមនានា»។

ក្នុងកម្មវិធីនេះលោក វង សូត ព្រមទាំងនិស្សិតទាំងអស់បានធ្វើការស្មិងស្មាធិ៍ គោរពវិញ្ញាណក្ខន្ធវីរកងទ័ពដែលបានពលីជីវិតលើសមរភូមិប្រយុទ្ធជាមួយទ័ពថៃ ក្នុងបុព្វហេតុការពារដែនអធិបតេយ្យ និងបូរណភាពទឹកដីកម្ពុជាផងដែរ។

ជម្លោះប្រដាប់អាយុរយៈពេល៥ថ្ងៃរវាងកម្ពុជានិងថៃបណ្ដាលឱ្យមានទាហានស្លាប់ និងរបួសជាច្រើននាក់ ដែលផ្ដើមចេញពីការឈ្លានពានរបស់ថៃនៅប្រាសាទតាមាន់ធំដោយបានរាយបន្លាលួស និងបាញ់ប្រហារមកលើទាហានខ្មែរមុន។ ជម្លោះនេះបានឈានដល់បទឈប់បាញ់មួយនៅថ្ងៃទី២៨ បន្ទាប់ពីមានការជួបគ្នារវាងនាយករដ្ឋមន្ត្រីកម្ពុជា និងនាយករដ្ឋមន្ត្រីស្ដីទីថៃ ក្រោមការសម្របសម្រួលដោយម៉ាឡេស៊ី ដោយផ្ដួចផ្ដើមគំនិតដោយសហរដ្ឋអាមេរិក និងតាមដានដោយប្រទេសចិន៕