នយោបាយ

វិសោធនកម្មច្បាប់អនុញ្ញាតឱ្យអាចដកសញ្ញាតិខ្មែរបានត្រូវសភាអនុម័ត

បានផុស

១០ ខែ មុន

នៅ

ថ្ងៃចន្ទ ២៥ សីហា ២០២៥

ដោយ

សេចក្តីព្រាងច្បាប់ស្ដីពីវិសោធនកម្មច្បាប់ស្តីពីសញ្ជាតិ ដែលអនុញ្ញាតឱ្យដកសញ្ញាតិខ្មែរបានត្រូវបានសភាជាតិអនុម័តយល់ព្រមដោយសមាជិកវត្តមាន១២០រូបលើ១២០រូបនៅព្រឹកថ្ងៃច័ន្ទ ទី២៥ ខែសីហានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្ដីព្រាងច្បាប់នេះមាន២មាត្រា និងត្រូវបានឡើងថ្លែងហេតុដោយឧបនាយករដ្ឋមន្ត្រីមហាផ្ទៃ ស សុខា បានបញ្ជាក់ថាវិសោធនកម្មច្បាប់នេះនឹងធ្វើឱ្យច្បាប់ស្តីពីសញ្ជាតិ ស្របតាមរដ្ឋធម្មនុញ្ញ ធានានូវសន្ដិភាព សន្តិសុខ បូរណភាពទឹកដី ពង្រឹងភាពស្មោះត្រង់ចំពោះជាតិ ព្រមទាំងពង្រឹងការអនុវត្តនៃការទទួលបានសញ្ជាតិខ្មែរស្របតាមច្បាប់ផងដែរ។

លោកបញ្ជាក់ថា៖ «ការដកសញ្ជាតិខ្មែរ គឺជាការកាត់ផ្តាច់ចំណងគតិយុត្តនិងនយោបាយចំពោះជនដែលក្បត់ជាតិតែប៉ុណ្ណោះ»។

លោកក៏បានលើកឡើងផងដែរថាការដកសញ្ជាតិនេះក៏រួមចំណែកផ្តល់ព័ត៌មានដល់អន្តរជាតិឱ្យមានការប្រុងប្រយ័ត្នចំពោះជនដែលត្រូវបានដកសញ្ជាតិ ដោយសារការគំរាមកំហែង ឬការប៉ះពាល់ដល់សន្តិសុខនៃពិភពលោក។

ច្បាប់សញ្ជាតិថ្មីរបស់កម្ពុជាត្រូវបានដាក់ឱ្យប្រើប្រាស់ក្នុងឆ្នាំ២០១៨ ដោយបាននិរាករណ៍ច្បាប់សញ្ជាតិចាស់ដែលបានធ្វើកាលពីឆ្នាំ១៩៩៦។ វិសោធនកម្មច្បាប់សញ្ជាតិនេះត្រូវបានធ្វើឡើងបន្ទាប់ពីសភាធ្វើវិសោធនកម្មរដ្ឋធម្មនុញ្ញមាត្រា៣៣ កាលពីថ្ងៃទី១១ ខែកក្កដា ឆ្នាំ២០២៥។

បើតាមរដ្ឋសភាការដកសញ្ជាតិខ្មែរនៅព្រះរាជាណាចក្រកម្ពុជាមិនមែនជាសញ្ញាណថ្មីនោះឡើយ ដោយហេតុថា ច្បាប់ខ្មែរនាសម័យមុនក៏បានកំណត់អំពីការដកសញ្ជាតិ ដោយឡែកចំពោះក្របខ័ណ្ឌច្បាប់នៃបណ្តាប្រទេសលើសកលលោក ក្នុងនោះមានប្រទេសប្រមាណ១៥០ប្រទេស ក៏មានច្បាប់ស្តីពីការដកសញ្ជាតិនេះដែរ៕