នារីវ័យក្មេងម្នាក់មកលោតទឹកលើស្ពានជ្រោយចង្វារលិចបាត់ បន្សល់ទុកម៉ូតូមួយគ្រឿង និងទូរស័ព្ទ

នារីស្រស់ស្អាតវ័យក្មេងម្នាក់ជិះម៉ូតូមកលោតទឹកពីលើស្ពានជ្រោយចង្វារលិចបាត់ បង្កការភ្ញាក់ផ្អើលដល់ពលរដ្ឋជាច្រើន កាលពីវេលាម៉ោង១០និង៣០នាទីយប់ ថ្ងៃទី១៥ ខែកក្កដា ឆ្នាំ២០២៥ នៅក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។

យោងតាមការឱ្យដឹងពីប្រជាពលរដ្ឋដែលឃើញហេតុការណ៍បានឲ្យដឹងថា នារីវ័យក្មេងដែលលោតទឹកពីស្ពានជ្រោយចង្វារ ជិះម៉ូតូម៉ាក HONDA BEAT ពណ៌ស ភ្នំពេញ 1KV-1574 មកលើស្ពានជ្រោយចង្វារ តាមទិសដៅពីរង្វង់មូលព្រហ្ម ឡើងទៅរង្វង់មូលគួចកាណុង។ ប្រភពបន្តថា នៅពេលឡើងបានពាក់កណ្តាលស្ពាន នារីរូបនោះក៏បានឈប់ម៉ូតូ និងបានទុកទូរស័ព្ទនៅជិតម៉ូតូ ហើយក៏ឡើងទៅលើបង្កាន់ដៃស្ពានលោតចុះទៅក្រោមលិចចូលក្នុងទឹកបាត់ខ្លួនទៅ។

ហេតុការណ៍នេះបានបង្កការភ្ញាក់ផ្អើលដល់អ្នកដើរតាមផ្លូវ និងអ្នកជិះយានយន្តជាច្រើន និងបានរាយការណ៍ជូនសមត្ថកិច្ចឲ្យអន្តរាគមន៍ភ្លាមៗ។ បន្ទាប់មកសមត្ថកិច្ចបានមកដល់ទីតាំងកើតហេតុ និងបានយកម៉ូតូ និងទូរស័ព្ទជនរងគ្រោះទៅរក្សាទុកនៅប៉ុស្តិ៍នគរបាលរដ្ឋបាលសង្កាត់ជ្រោយចង្វារ ដើម្បីរង់ចាំឲ្យក្រុមគ្រួសារមកទទួល និងអនុវត្តតាមនីតិវិធីបន្ត៕

អត្ថបទ៖ សំណាង