សន្តិសុខសង្គម

ខូចចិត្តសង្សារត្រូវបុរសផ្សេងចូលដណ្ដឹង យុវជនម្នាក់ មកលោតទឹកនៅស្ពានជ្រោយចង្វារ

បានផុស

៦ ខែ មុន

នៅ

ថ្ងៃចន្ទ ២៥ កញ្ញា ២០២៣

ដោយ

យុវជនម្នាក់ ធ្វើដំណើរមកលោតទឹកនៅស្ពានជ្រោយចង្វារ ដើម្បីបញ្ចប់ជីវិត ព្រោះខូចចិត្តដែលនារីជាគូសង្សារ ត្រូវបានបុរសផ្សេងចូលស្ដីដណ្ដឹងរៀបការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ១០ ព្រឹក ថ្ងៃទី ២៥ ខែកញ្ញា ឆ្នាំ ២០២៣ ស្ថិតនៅលើស្ពានជ្រោយចង្វារ សង្កាត់ជ្រោយចង្វារ ខណ្ឌជ្រោយចង្វា រាជធានីភ្នំពេញ។

តាមការបញ្ជាក់របស់យុវជននោះបាននិយាយប្រាប់ថា រូបគេបានស្រឡាញ់គ្នាជាមួយនារីជាសង្សាររយៈពេលមួយខែមកហើយ ដោយសន្យាជាមួយគ្នាថា មិនទៅណាចោលគ្នានោះទេ។ ប៉ុន្តែនារីជាសង្សារ បានផ្លាស់ប្ដូរចិត្ត ដោយមានបុរសម្នាក់ចូលស្ដីដណ្ដឹង ហើយនាងក៏យល់ព្រមរៀបការជាមួយនឹងបុរសម្នាក់នោះទៅវិញ។

យុវជនខាងលើបន្ថែមថា ដោយសារតែខ្លួនស្រឡាញ់ងប់ងុលនឹងគេពេក ទើបទ្រាំមិនបាន រហូតសម្រេចចិត្តមកលើស្ពានជ្រោយចង្វារ ដើម្បីលោតទឹកសម្លាប់ខ្លួន ហើយសរសេរសំបុត្រមួយច្បាប់ ដើម្បីផ្ញើជូននារីជាសង្សារនោះបានឃើញផងដែរ។ សំបុត្រដែលយុវជនរូបនេះសរសេរ បានរៀងរាប់យ៉ាងដូច្នេះថា «អូនហា បងប្រាប់អូនថា បងនឹកអូនខ្លាំងណាស់ មិនអាចបំភ្លេចបាន ហើយបងស្រលាញ់អូនខ្លាំងទៀតផង កន្លងមកយើងសន្យាជាមួយគ្នាថា មិនទៅណាចោលគ្នានោះទេ រយៈពេលមួយខែជាង យើងឆ្លងឧបសគ្គច្រើនណាស់។ ប៉ុន្តែឥឡូវនេះ អូនមានគេចូលស្ដីដណ្ដឹងហើយ អូនក៏ព្រមយកគេ បងខលទៅអូន អូនមិនលើក មិនដែលលើកសោះ អូនណាៗ បងស៊ីធូម្នាក់នេះ អូនថា បើអូនមិនបានបង អូនក៏ព្រមយកគេ។ បងលាអូនរហូតហើយ ជូនពរអូន និងគេ ស្រលាញ់គ្នារហូត។ ស្រីឈ្មោះ អូនណា ប្រុសឈ្មោះស៊ីធូ»។

បើតាមប្រភព ខណៈយុវជនម្នាក់នោះបម្រុងលោតទឹកសម្លាប់ខ្លួន ក៏ត្រូវបានប្រជាពលរដ្ឋ រួមនឹងកម្លាំងសមត្ថកិច្ច ធ្វើការជួយសង្គ្រោះទាន់ និងយកទៅប៉ុស្តិ៍នគរបាលរដ្ឋបាលជ្រោយចង្វារ ដើម្បីធ្វើការណែនាំ ទាក់ទងទៅក្រុមគ្រួសារ មកយកយុវជនខាងលើត្រឡប់ទៅផ្ទះវិញ៕

អត្ថបទ ៖ សុខា