ក្រោមស្ពានជ្រោយចង្វារ ក្លាយជាចំណតរថយន្ដ​ដឹកទំនិញ និងជម្រកជនអនាថា

សណ្តាប់ធ្នាប់នៅក្រោមស្ពានជ្រោយចង្វារ ក្នុងមូលដ្ឋានសង្កាត់ជ្រោយចង្បារ ខណ្ឌជ្រោយចង្វារ នៅតែមិនមានរបៀបរាបរយល្អ ទោះបីជាអាជ្ញាធរចុះរៀបចំជាច្រើនលើកច្រើនសារយ៉ាងណាក៏ដោយ ខណៈក្រុមរថយន្ដដឹកទំនិញ រ៉ឺម៉កដឹកធ្យូង រ៉ឺដឹកអីវ៉ាន់ និងជាពិសេស ក្លាយជាជម្រកជនអនាថា សេពគ្រឿងញៀន ថែមពីនេះទៅទៀតគំនរសំរាម និងសំរាមរាយប៉ាយ បង្កអោយបរិស្ថានទីនោះ កខ្វក់ និងបាត់បង់សណ្តាប់ធ្នាប់។

លោក ឯក វិសិដ្ឋ ប្រជាពលរដ្ឋដែលរស់នៅក្បែរនោះបានលើកឡើងថា ទីតាំងក្រោមស្ពានជ្រោយចង្វារ កម្ពូជា-ចិន និងក្រោមស្ពាន ជ្រោយចង្វារ កម្ពុជា-ជប៉ុន កន្លងមកជារើយៗ ក៏មានកម្លាំងអាជ្ញាធរមូលដ្ឋានចុះរៀបចំសណ្តាប់ធ្នាប់ ណែនាំ និងប្រមូលជនអនាថាទាំងនោះទៅខាងមន្ទីរសង្គមកិច្ចផងដែរ។ តែទោះជាយ៉ាងណាសកម្មភាពនេះបានតែមួយរយៈប៉ុណ្ណោះ ក៏មានរថយន្ដដឹកទំនិញ តូចធំ រ៉ឺម៉កម៉ូតូ ចតត្រៀបត្រាវាធ្វើអោយសោភ័ណភាព បរិស្ថាន អនាម័យ ទីក្រុងស្អាត បែរជាមិនមានទៅវិញ។

លោក ឈួន សុថាត អនុប្រធានសណ្តាប់ធ្នាប់ខណ្ឌជ្រោយចង្វារ បានអោយដឹងថា ទីតាំងក្រោមស្ពាននេះ លោកតែងដឹកនាំកម្លាំងសណ្តាប់ធ្នាប់ខណ្ឌ ដឹកនាំដោយលោកអភិបាលរងខណ្ឌ ប៉ូលិសខណ្ឌ ចុះរៀបចំណែនាំក្រុមឡានដឹកទំនិញ បងប្អូនប្រជាពលរដ្ឋ កុំអោយយកទីតាំងជាកម្មសិទ្ធិ ឬទីសាធារណៈចត ដើម្បីផលប្រយោជន៍ផ្ទាល់ខ្លួននោះទេ។ ចំណែកជនអនាថា កម្លាំងក៏ធ្លាប់បានប្រមូលប្រគល់ជូនទៅមន្ទីរសង្គមកិច្ចរហូត តែមិនបានប៉ុន្មានក៏មានជនអនាថាផ្សេង ឬមុខដដែលៗ មកស្នាក់អាស្រ័យទីនោះដដែល។ ប្រភពបានបន្តថា លោកនឹងជម្រាបជូនទៅថ្នាក់លើ ដើម្បីស្នើសុំគោលការណ៍ ចុះរៀបចំជាលក្ខណៈបញ្ជាការឯកភាព កម្លាំងទាំង៣របស់ខណ្ឌ ទើបមានប្រសិទ្ធភាព៕

អត្ថបទ៖ សំណាង