របួសធ្ងន់ ២នាក់ ក្នុងករណីគ្រោះថ្នាក់ចរាចរណ៍ រថយន្ត និងម៉ូតូប៉ះទង្គិចគ្នា នៅមុខផ្សារដំណាក់ចង្អើរ

មនុស្ស ២នាក់ បានរងរបួសធ្ងន់ ក្នុងករណីគ្រោះថ្នាក់ចរាចរណ៍ ជិះម៉ូតូទៅប៉ះទង្គិចជាមួយរថយន្ត ប្រភេទបែនដឹកដីខ្នាតធំ ក្នុងទិសដៅស្របគ្នា។ ហេតុការណ៍នេះ បានកើតឡើងនៅវេលា ៧និង ៥០នាទីព្រឹកថ្ងៃទី ១១ ខែមីនា ឆ្នាំ ២០២២ ត្រង់ចំណុចខាងកើតផ្សារដំណាក់ចង្អើរ ក្នុងភូមិដំណាក់ចង្អើរ សង្កាត់ព្រៃធំ ក្រុង/ខេត្តកែប លើកំណាត់ផ្លូវជាតិលេខ ៣៣។

ប្រភពព័ត៌មានពីកន្លែងកើតហេតុ បានឲ្យដឹងថា គ្រោះថ្នាក់ចរាចរណ៍នេះ ផ្តើមឡើងដោយសារភាគីទាំងសងខាង បើកបរខ្វះការប្រុងប្រយ័ត្ន ខណៈរថយន្តដឹកដីនៅខាងមុខបត់ឆ្វេង តែចៃដន្យស្រាប់តែម៉ូតូ C125 ជែងពីក្រោយរថយន្តមិនបានពិនិត្យ ពីស្ថានភាពគ្រោះថ្នាក់នៅចំពោះមុខ គាប់ជួនពេលរថយន្ត​បត់ឆ្វេង ភាគីម៉ូតូក៏បើកទៅបុកចំកង់រថយន្តផ្នែកខាងមុខ បណ្តាលឲ្យរងរបួសបាក់ជើងទាំងពីរនាក់តែម្តង ហើយម៉ូតូរងការខូចខាតយ៉ាងធ្ងន់ធ្ងរ ផងដែរ។

ប្រភពដដែល បានបញ្ជាក់ទៀតថា ភាគីម៉ូតូជិះគ្នា ២នាក់សុទ្ធតែជាយុវជន ដែលមានអាយុក្រោម ២០ឆ្នាំ ដែលគេដឹងថា ធ្វើដំណើរមកពីខេត្តព្រះសីហនុ តែពេលនេះមិនទាន់ស្គាល់ឈ្មោះ ខណៈពេលសមត្ថកិច្ចប្រញាប់ប្រញាល់ ដឹកបញ្ជូនទៅសង្គ្រោះនៅឯមន្ទីរពេទ្យ។

ក្រោយពីមានករណីគ្រោះថ្នាក់ចរាចរណ៍ភ្លាម សមត្ថកិច្ចបានចុះមកអន្តរាគមន៍ ដោយយករថយន្តរបស់អធិការដ្ឋាននគរ បាលក្រុងកែប ដឹកបញ្ជូនទៅសង្គ្រោះភ្លាមៗ នៅមន្ទីរពេទ្យ៕

អត្ថបទ៖ សេង ណារិទ្ធ